«Պարտուած» «Իսլամական Պետութիւն»ը Առնուազն 4 Ամերիկացիներ Եւ 14 Ուրիշներ Սպաննեց Սուրիոյ Մէջ

0118syr

0118syr

ԼՈՆՏՈՆ, «Պի.Պի.Սի.».- Քրտական «Հաուար» լրատու գործակալութիւնը կը տեղեկացնէ, թէ Չորեքաշաբթի, 16 Յունուարին, քրտական հակակշիռին տակ գտնուող հիւսիսային Սուրիոյ  Մընպեճ քաղաքին ճաշարաններէն մէկուն մէջ տեղի ունեցած ահաբեկչական յարձակումի մը ընթացքին սպաննուեցան առնուազն 18 հոգի, ներառեալ՝ երկու ամերիկացի զինուորներ, Միացեալ Նահանգներու պաշտպանութեան նախարարութեան քաղաքային պաշտօնեայ մը, ինչպէս նաեւ ամերիկեան ուժերուն սպասարկութիւններ մատուցող ամերիկեան ոչ-կառավարական ընկերութեան մը ամերիկացի պաշտօնեան։

Տասնեակներով վիրաւորներուն մէջ եւս կան երեք ամերիկացի զինուորներ, որոնք յարձակումէն անմիջապէս ետք ռազմական ուղղաթիւռով աւելի ապահով վայր մը փոխադրուեցան։

Հակառակ այն իրողութեան, որ Միացեալ Նահանգներու նախագահ Տանըլտ Թրամփ Սուրիոյ մէջ պարտուած հռչակած էր «Իսլամական պետութիւն» ահաբեկչական կազմակերպութիւնը, անսալով այդ մասին Թուրքիոյ նախագահ Ռեչեփ Թայիփ Էրտողանի երաշխիքներուն, նոյն այդ կազմակերպութիւնը ստանձնեց Մընպեճի մէջ տեղի ունեցած եւ հաւանաբար անձնասպանական գործողութիւն մը հանդիսացած յարձակումին պատասխանատուութիւնը:

Կարգ մը քաղաքական մեկնաբաններ կը յայտնեն, թէ «Իսլամական պետութիւն»ը այս արարքին դիմած էր վարկաբեկելու համար Թրամփը, անհիմն դարձնելով անոր պնդումները։

Թրամփ այդ պնդումը կատարած էր արդարացնելու համար Սուրիա հաստատուած մօտաւորապէս 2000 ամերիկացի զինուորները հեռացնելու իր որոշումը։

Ռուսական «Սփութնիք» լրատու գործակալութիւնը հաղորդեց, որ պայթումը տեղի ունեցած է այն պահուն, երբ Մընպեճի զինուորական խորհուրդէն ղեկավարներ հանդիպում մը կ՛ունենային ամերիկեան պատուիրակութեան հետ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top