Մարդկային Իրաւանց Դէտը Կը Քննադատէ Հայաստանի Նախկին Իշխանութիւնը Եւ Կը Գովէ Ներկայ Իշխանութիւնը

0118HRW Arm

0118HRW Arm

ՊԵՐԼԻՆ, «Ազատութիւն».- «Մարտ 1ի գործով նախորդ իշխանութիւններուն կողմէ իրականացած հետաքննութիւնը միակողմանի էր», գրուած է իրաւապաշտպան Մարդկային իրաւանց դէտ (Human Rights Watch) կազմակերպութեան կողմէ 17 Յունուարին հրապարակուած տարեկան զեկոյցին մէջ՝ նշելով, որ այդ հետաքննութեան հետեւանքով դատարանին առջեւ կանգնած էին միայն ընդդիմադիրները եւ 52 ցուցարարներ բանտարկուած էին:

Հայաստանի նոր իշխանութիւնները վերակենդանացուցին այդ հետաքննութիւնը՝ մեղադրանքներ ներկայացնելով երեք նախկին բարձրաստիճան պաշտօնատարներու դէմ, ներառեալ՝ նախկին նախագահ Ռոպերթ Քոչարեանի, պաշտպանութեան նախկին նախարար Միքայէլ Յարութիւնեանի ու Զինուած ուժերու գլխաւոր շտաբի նախկին ղեկավար Եուրի Խաչատուրովի՝ սահմանադրական կարգը տապալելու յանցանքով, կ՛արձանագրէ միջազգային կառոյցը՝ նոյն ժամանակ ընդգծելով. «Նախապէս կատարուած անիրաւութիւնները հետաքննելէ ետք, իշխանութիւնները պէտք է բոլորովին յարգեն բոլոր ազատազրկուածներուն իրաւունքները եւ երաշխաւորեն արդարադատութեան անկախութիւնը»:

0118Hwr_armenia_human_rightsԱմփոփելով անցեալ տարի Հայաստանի մէջ մարդկային իրաւունքներու պաշտպանութեան ոլորտին մէջ տեղի ունեցած զարգացումները, հեղինակաւոր կազմակերպութիւնը կը նշէ, որ ընդդիմութեան առաջնորդ Նիկոլ Փաշինեան դարձաւ վարչապետ՝ նախագահ Սերժ Սարգսեանի դէմ Ապրիլին եւ Մայիսին քանի մը շաբաթ շարունակուած բողոքի ցոյցերէն ետք: «Սահմանուած առաւելագոյն՝ երկու նստաշրջան նախագահելէ ետք, Սարգսեան կը փորձէր մնալ իշխանութեան ղեկին՝ իր կուսակցութեան աջակցութեամբ ստանձնելով վարչապետի պաշտօնը», կը յիշեցնէ Մարդկային իրաւանց դէտը՝ ընդգծելով, որ Սերժ Սարգսեանի հրաժարականէն ետք Փաշինեան ժառանգեց երկիր մը, որ ընկղմած էր զեղծարարութեանց եւ մարդկային իրաւունքներու բազմաթիւ խախտումներու մէջ:

Զեկոյցը կը նշէ, որ Սեպտեմբերին Փաշինեանի կառավարութեան առաջարկով խորհրդարանը օրէնսդրական փոփոխութիւններ վաւերացուց, որոնցմով ընտրութիւններուն ընթացքին կաշառք առաջարկելու եւ առնելու համար սահմանուեցաւ քրէական պատիժ՝ մինչեւ վեց տարուան բանտարկութեամբ։

«Դեկտեմբերի ընտրութիւնները միջազգային դիտորդներու գնահատականով՝ կը վայելէին հասարակութեան լայն վստահութիւնը եւ զերծ էին նախորդ ընտրութիւններուն ընթացքին արձանագրուած խախտումներէն, ներառեալ՝ ընտրակաշառքէն եւ ընտրողներու վրայ ճնշումներէն», կ՛ընդգծեն զեկոյցին հեղինակները։

«Ազատ եւ արդար քուէարկութիւնը առաջին յատկանշական եւ կարեւոր քայլն է Հայաստանի նոր իշխանութիւններուն համար, սակայն այդ միայն սկիզբն է», կը յայտնէ կազմակերպութեան ներկայացուցիչ Կիորկի Կոկիա՝ շեշտելով. «Իշխանութիւնները պէտք է իրենց տրուած լիազօրութիւնը օգտագործեն եւ բարեփոխումներ արձանագրեն՝ մարդկային իրաւունքներու վերաբերեալ հարցերը լուծելու համար, որովհետեւ անոնց պատճառով էր, որ մարդիկ փողոց դուրս եկած էին»:

Քննադատելով նախորդ իշխանութիւնները, կազմակերպութիւնը նոյն ժամանակ գովասանքի խօսքեր կը հնչեցնէ նոր իշխանութիւններուն հասցէին՝ իրաւապահներու կողմէ կիրառուած բռնութիւններուն վերաբերեալ եւ տարիներով սառեցուած գործերը աւարտին հասցնելու, մեղաւորները պատժելուն համար:

«Յունիսին իշխանութիւնները մեղադրանք առաջադրեցին ոստիկաններու դէմ, «Սասնայ Ծռեր»ուն նկատմամբ բռնութիւն կիրառելու գծով», նշած է իրաւապաշտպան կառոյցը:

Խրախուսելով նոր իշխանութիւնները՝ զեկոյցը կը շեշտէ, թէ Փաշինեանի կառավարութիւնը տակաւին շատ բան ունի ընելիք, օրինակ՝ հաշմանդամութիւն ունեցող անձերու եւ միասեռականներու իրաւունքները պաշտպանելու եւ հաւասար պայմաններ ապահովելու հարցով:

Այս տարուան զեկոյցին մէջ ամենակոշտ քննադատութեան արժանացած է կանանց իրաւունքներու պաշտպանութեան ոլորտը եւ միջազգային կազմակերպութիւնը կը նշէ, որ ընտանեկան բռնութիւնը կը շարունակէ լուրջ հարց մնալ Հայաստանի մէջ: Ոստիկանութեան համաձայն՝ 2018ի առաջին հինգ ամիսներուն արձանագրուած է կանանց նկատմամբ բռնութեան 864 դէպք, որոնցմէ 223ը՝ ընտանիքներու մէջ: Կանանց իրաւանց պաշտպանութեամբ զբաղող գործիչները նաեւ համոզուած են, որ ընտանեկան բռնութիւններու բազմաթիւ դէպքեր լռութեան կը մատնուին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top