Արայիկ Յարութիւնեան Կ՛այցելէ Լոս Անճելըսի Հայկական Դպրոցներ

0118arayik1

 

0118arayik1

ԵՐԵՒԱՆ.- Աշխատանքային այցելութեամբ Միացեալ Նահանգներ գտնուող Հայաստանի կրթութեան եւ գիտութեան նախարարի պաշտօնակատար Արայիկ Յարութիւնեան 16 Յունուարին այցելեց Լոս Անճելըսի հայկական դպրոցներ, կը հաղորդէ նախարարութիւնը:

Յարութիւնեան նախ այցելեց «Ար.Տի. Ուայթ» նախակրթարանը, ուր կրթութիւնը երկու լեզուներով է՝ հայերէն եւ անգլերէն: Նախարարի պաշտօնակատարը հանդիպեցաւ դպրոցի պատասխանատուներուն եւ տնօրէնին հետ, քննարկեց շարք մը հարցեր, ներառեալ՝ դասագիրքերու եւ ուսուցիչներու վերապատրաստումներու վերաբերեալ:

Յարութիւնեան այցելեց նաեւ Շարլոթ եւ Էլիզ Մերտինեան Հայ աւետարանական վարժարանը, ուր տեղի ունեցած ձեռնարկին ընթացքին հանդէս եկաւ ելոյթով: Իր խօսքին մէջ ան նշեց, որ Հայաստանի նոր կառավարութեան համար Սփիւռքի հետ համագործակցութիւնը առաւել կարեւոր է Հայաստանի մէջ վերջերս տեղի ունեցող տնտեսական զարգացումներուն պարունակին մէջ, երբ առաջնահերթ դարձած է Միացեալ Նահանգներու գիտակրթական եւ արհեստագիտական ներուժի ներգրաւումը: Նախարարի պաշտօնակատարը շնորհակալութիւն յայտնեց ջերմ ընդունելութեան համար՝ ընդգծելով Սփիւռքի հայկական համայնքներուն մասնակցութեան կարեւորութիւնը՝ Հայաստանի մէջ տեղի ունեցած յեղափոխութեան համար:

«Վերջին օրերին զարմանքով նկատել եմ, որ Սփիւռքի մեր հայրենակիցները՝ փոքրից մինչեւ մեծ, սկսել են ապրել բացառապէս հայրենիքի խնդիրներով. նրանք ուշադիր հետեւել եւ, ըստ էութեան, մասնակից են դարձել յեղափոխութեանը. փոքրերը երգում են յեղափոխութեան երգերը, հարցեր տալիս դրա առաջնորդների մասին», նշեց Արայիկ Յարութիւնեան:

Այնուհետեւ, նախարարի պաշտօնակատարը այցելեց ՀԲԸՄի Մանուկեան-Տեմիրճեան վարժարան, ծանօթացաւ վարժարանին եւ ուսումնական ծրագիրներուն: Այցելութեան ընթացքին համաձայնութիւն գոյացաւ ՀԲԸՄի աւագ դպրոցներու աշակերտներուն համար Հայաստանի մէջ ուսումնական վարժողական ծրագիր իրականացնել շուրջ:

Յիշեցնենք, որ Հայաստանի կրթութեան եւ գիտութեան նախարարի պաշտօնակատար Արայիկ Յարութիւնեան Միացեալ Նահանգներ կը գտնուի Ամերիկահայ ճարտարագէտներու եւ գիտնականներու միութեան նախագահ Ճան Էմանուէլ Շիրաճեանի հրաւէրով: Կը նախատեսուին նաեւ այցելութիւններ Հարաւային Քալիֆորնիոյ համալսարանը եւ Քալիֆորնիոյ համալսարանի Լոս Անճելըսի մասնաճիւղը (UCLA), ինչպէս նաեւ հանդիպումներ քաղաքային իշխանութիւններու, գիտական եւ արհեստագիտական ընկերութիւններու ներկայացուցիչներու հետ:

0118Arayig2

0118arayik2

0118Arayig1

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top