Յովիկ Աբօ Սաղտճեանի Անուան «Քեփիթըլ Կէյթուէյ»ի Ձմեռնային Ծրագիրը Ցարդ Մեծագոյնն Է

0000ANCA_CGP_Winter_2019_Group

0000ANCA_CGP_Winter_2019_Group

ՈՒԱՇԻՆԿԹԸՆ.- Ամերիկայի Հայ Դատի յանձնախումբին կողմէ տնօրինուող եւ Յովիկ Աբօ Սաղտճեանի անուան «Քեփիթըլ Կէյթուէյ» ձմեռնային ծրագիրը արդէն իսկ ընթացքի մէջ է եւ կը հանդիսանայ մեծագոյնը իր 16ամեայ պատմութեան ընթացքին։

Արդարեւ, Միացեալ Նահանգներու տարբեր շրջաններէ, Աւստրալիայէն, Գանատայէն եւ Հայաստանէն համալսարանի 11 շրջանաւարտներու արդէն իսկ մայրաքաղաք Ուաշինկթընի մէջ իրենց արհեստավարժ ասպարէզին նախաքայլերը կ՛առնեն:

Ծրագիրի վարիչ Թերեզա Երիմեան կը յայտնէ, թէ տպաւորիչ են այս տարուան ծրագիրին մասնակցողներուն իրագործումները եւ անոնց ցուցաբերած խանդավառութիւնը։

Ան ծրագիրին մասնակցողներուն ներկայացուցած է ծրագիրին մանրամասնութիւնները, որմէ ետք անոնք յաւելեալ տեղեկութիւններ ստացած են նախորդ տարիներու ծրագիրներու մօտաւորապէս 20 մասնակիցներուն հետ կազմակերպուած հաւաքի մը ընթացքին։ Այդ շրջանաւարտներէն շատեր արդէն իսկ մայրաքաղաքին մէջ հաստատուած քաղաքական, առեւտրական եւ խորհրդակցական հիմնարկութիւններու մէջ կ՛աշխատին։

Նորեկները նաեւ մասնակցած են շարք մը սեմինարներու, որոնց գլխաւոր նպատակն էր զարգացնել աշխատանք ճարելու անոնց ձիրքերը: Այս տարուան ծրագիրին մասնակիցողներն են՝ Ալեքս Աւանէսզատէ, Պիանքա Պերնարտի, Ալեքսանտր Կալիցքի, Անի Կարապետեան, Նաթալի Մանուկեան, Միքայէլ Մաթոսեան, Մարք Փափազեան, Արմինէ Սարգսեան, Էլըն Սարգիսեան, Գարուն Չոլաքեան եւ Մանէ Ոսկանեան։

Նշենք, որ «Քեփիթըլ Կէյթուէյ» ծրագիրը հաստատուած է 2003ին։ Անոր մասնակցող համալսարանական նոր շրջանաւարտներ ձրիաբար կ՛ապրին անոր կեդրոնատեղիին մէջ, երբ քոնկրեսական զանազան գրասենեակներու կամ այլ հաստատութեանց մէջ կ՛ամբողջացնեն իրենց եռամսեայ վարժողական ծրագիրները: Ծրագիրը կը կրէ անունը երիտասարդ հանգուցեալ գործիչ Յովիկ Սաղտճեանի, որ մահացած էր ինքնաշարժի  արկածի մը հետեւանքով: Անոր ընտանիքը, այս նպատակին համար հաստատուած հիմնադրամով, վերջին տասնամեակին յատկանշական աջակցութիւն ցուցաբերած է ծրագիրին: Յատկանշական օժանդակութիւն տրամադրուած է նաեւ Գըրգ Գըրգորեանի «Լինզի» հաստատութեան, Կերի Քաֆեսճեանի, Ճիւլիըն եւ Անեթ Սեթեաններու, Նորմըն Միլըրի անուան բարեսիրական հիմնադրամի, Ֆրենք եւ Պարպարա Հեքիմեաններու, ինչպէս նաեւ Ամերիկահայ վեթերաններու Միլֆըրտի (Մեսեչուսեց) կեդրոնին կողմէ: Հանգուցեալ բարերարուհի եւ համայնքային ղեկավար Մարթա Արամեանի ի յիշատակ Արամեան ընտանիքին կատարած նուիրատուութեամբ՝ «Արամեան Տուն»ի գնումը մեծապէս նպաստեց այս ծրագիրին ընդարձակման:

Ծրագիրին մասին յաւելեալ տեղեկութեանց համար՝ այցելել anca.org/gateway կայքը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top