Հայց. Առաքելական Եկեղեցւոյ Հոգեւոր Եղբայրակցութեան Ներկայացուցիչները Այցելեցին Ազգային Առաջնորդարան

0000Brotherhood1

0000Brotherhood1

ԼԱ ՔՐԵՍԵՆԹԱ.- Հաւատարիմ մնալով տարիներու բարի աւանդութեան, Հայաստանեայց Առաքելական եկեղեցւոյ Հոգեւոր եղբայրակցութեան ներկայացուցիչները, գլխաւորութեամբ վարչութեան ատենապետ Աւօ Գապաքչուզեանի, Երեքշաբթի, 15 Յունուարին, Ամանորի եւ Ս. Ծնունդի տօնին առիթով շնորհաւորանքի այցելութեան մը եկան Ազգային առաջնորդարան եւ «Սիւլահեան» դահլիճին մէջ հիւրընկալուեցան Արեւմտեան թեմի առաջնորդ Մուշեղ արք. Մարտիրոսեանի կողմէ։ Հանդիպումին ներկայ եղան Նարեկ Ա. քհնյ. Փեհլիվանեան եւ Մովսէս քհնյ. Շաննագեան։

Տօնական օրերուն առիթով բարի մաղթանքներու փոխանակումէն ետք, հիւր ներկայացուցիչները առաջնորդը տեղեակ պահեցին իրենց աշխատանքներէն ու ծրագիրներէն։ Անոնք նաեւ շնորհակալութիւն յայտնեցին, որ սրբազանն ու հոգեւորականաց դասու անդամներ հովանաւոր ու զօրավիգ կը կանգնին իրենց աշխատանքներուն, ներկայ ըլլալով տօնական օրերու եւ այլ ձեռնարկներու։ Անոնք այս այցելութիւնը նկատեցին մեր եկեղեցւոյ ու ազգային աւանդներուն նկատմամբ ուխտի վերանորոգումի առիթ։ Կարեւորութեամբ վեր առնուեցաւ եկեղեցւոյ ու ազգի ծառայական ասպարէզներուն մէջ երիտասարդներու ներգրաւման կարեւորութիւնը։

Առաջնորդը գնահատանքով արտայայտուեցաւ եղբայրակցութեան գործունէութեան եւ մեր եկեղեցւոյ հանդէպ հաւատարմութեան մասին, յաջողութիւն մաղթելով անոր յառաջիկայ աշխատանքներուն։

Հրաժեշտի պահուն, հիւրերը եղբայրակցութեան անունով խորհրդանշական նուէր մը յանձնեցին Ազգային առաջնորդարանին, իսկ սրբազանը յուշանուէրներ յանձնեց անոնց։

0000Brotherhood2

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top