Յովհաննու Կարապետի Տօնին Առիթով Եպիսկոպոսական Պատարագ Եւ Մեծարանք Հոլիվուտի Ս. Կարապետ Եկեղեցւոյ Մէջ

St Garabed 6 (533x800)

ՓՈՔՐԻԿ ՀԱՅԱՍՏԱՆ.- Հայաստանեայց առաքելական եկեղեցին 14 Յունուարին նշեց Ս. Յովհաննու Կարապետի տօնը, որ նաեւ անուանակոչութեան տօնն է Հոլիվուտի Ս. Կարապետ Մայր եկեղեցւոյ։

Այս առիթով, Արեւմտեան թեմի առաջնորդ Մուշեղ արք. Մարտիրոսեան Կիրակի, 13 Յունուարին, Ս. պատարագ մատուցեց, յաւուր պատշաճի քարոզեց եւ մատաղի օրհնութիւն կատարեց եկեղեցւոյ մէջ։ Ս. սեղանին սպասարկեցին եկեղեցւոյ հոգեւոր հովիւը՝ Վիգէն Ա. քհնյ. Վասիլեան եւ սարկաւագները։

Պատարագին ներկայ էին Ազգային Կեդրոնական վարչութեան անդամներէն Կայծակ Զէյթլեան, Ազգային վարչութեան ատենապետ Կարօ Էշկիեան եւ անդամներ՝ տոքթ. Նաւասարդ Գազազեան եւ Ճորճ Չորպաճեան, ՀՅԴ Հոլիվուտի «Գարեգին Նժդեհ» կոմիտէութեան, Ռոզ եւ Ալեք Փիլիպոս Ազգային վարժարանի եւ Մարի Փոսթոյեան մանկամսուրի, ՀՄԸՄի Լոս Անճելըս մասնաճիւղի, ՀՕՄի «Մայր» մասնաճիւղի, «Րաֆֆի» Ռումանահայ եւ Տարօն-Տուրուբերանի հայրենակցական միութիւններու, Հայաստանեայց առաքելական եկեղեցւոյ հոգեւոր եղբայրակցութեան, «Ասպարէզ» օրաթերթի եւ եկեղեցւոյ ժողովականութեան ներկայացուցիչներ։ Ներկայ էին նաեւ եկեղեցւոյ օծման կնքահայրը՝ Վահէ Կարապետեան եւ նոր խորանի բարերար տէր եւ տիկին Յակոբ եւ Հայկուհի Դաղլեանները։

Իր պատգամին մէջ, առաջնորդ սրբազանը փառք տուաւ Աստուծոյ եւ նշեց, որ կը տօնենք Քրիստոսի ծննդեան ութօրէքը, որ Յիսուսի անուանակոչութեան տօնն է, եւ այս տարի կը զուգադիպի եկեղեցւոյ անուանակոչութեան տօնախմբութեան։ Ապա ան վեր առաւ Ս. Յովհաննէս Մկրտիչի աստուածանուէր կեանքն ու սրբակեաց կենցաղը, յատկապէս շեշտելով, որ սուրբը եղած է նախակարապետը Յիսուսի ճանապարհին, որ արքայութեան կ՛առաջնորդէ։ Ան յիշեց, թէ նախքան Յովհաննէս Մկրտիչի ծնունդը՝ Գաբրիէլ հրեշտակապետը անոր ծնողներուն՝ Զաքարիային եւ Եղիսաբէթին աւետած էր, թէ զաւակ մը պիտի ունենան, որ «Տիրոջ առջեւէն պիտի քալէ՝ Եղիայի հոգիով եւ զօրութեամբ լեցուած, որպէսզի հայրերը իրենց որդիներուն հետ հաշտեցնէ եւ անհնազանդները առաջնորդէ արդարներու իմաստութեան, եւ այսպիսով Տիրոջ գալուստին նախապատրաստուած ժողովուրդ մը պատրաստէ» (Ղուկ. 1։17)։

Սրբազան հայրը այս տօնը ուխտի վերանորոգման օր համարեց եւ ըսաւ. «Յովհաննէս Մկրտիչ իր կեանքի օրինակով կոչ կ՛ուղղէ մեր օճախներուն, որ մեր ընտանեկան, ազգային թէ հաւաքական կեանքերուն մէջ ապրինք հաշտ կեանք մը, փոխադարձ հանդուրժողութեան եւ համերաշխութեան մթնոլորտին մէջ»։

Ապա, առաջնորդը իր օրհնութիւնը տուաւ՝ ըսելով. «Իմ աղօթքս է, որ արդար, հնազանդ, Աստուծոյ հաւատարիմ զաւակները ըլլանք, որպէսզի սիրով, խաղաղութեամբ եւ արդարութեամբ ապրինք եւ այդ արդարութիւնը անդրադառնայ մեր անհատական թէ հաւաքական կեանքերուն վրայ, միշտ ուղղուինք ճշմարիտ լոյսին եւ պատրաստ ըլլանք Քրիստոսի երկրորդ գալստեան՝ հաւատքով, յոյսով եւ սիրով»։

Անդրադառնալով հայրենիքի ներկայ իրադարձութիւններուն՝ ան յիշեց, թէ յաջորդ օրը, նորընտիր Ազգային ժողովը իր պատասխանատուութիւնը պիտի ստանձնէ եւ աղօթեց, որ Աստուած առաջնորդէ մեր հայրենի պատասխանատուները, արդար ու համերաշխ հիմքերով յառաջ տանելու մեր հայրենիքը։

«Տէր Ողորմեա»ի պահուն, յատուկ աղօթք բարձրացուեցաւ բոլոր հիւանդներուն բժշկութեան, յատկապէս եկեղեցւոյ եւ ՀՅԴ Կեդրոնական կոմիտէի անդամներէն Կարօ Իսբէնճեանին առողջութեան համար, որ սրտի վիրաբուժական գործողութենէ ետք ապաքինման շրջան մը կը բոլորէր։

Պատարագի աւարտին, հոգեհանգստեան պաշտօն կատարուեցաւ ննջեցեալ ծառայողներուն եւ բարերարներուն յիշատակին, ապա առաջնորդը կատարեց մատաղի օրհնութիւնը։

ՍԻՐՈՅ ՃԱՇ ԵՒ ՄԵԾԱՐԱՆՔ

 

Այնուհետեւ, ներկաները անցան եկեղեցւոյ «Կարապետեան» սրահը, ուր հովանաւորութեամբ առաջնորդ սրբազանին ու կազմակերպութեամբ եկեղեցւոյ հոգեւոր հովիւին ու հոգաբարձութեան, տեղի ունեցաւ եկեղեցւոյ անուանակոչութեան տօնին յատուկ սիրոյ ճաշը։

Նշենք, որ այս տօնին առիթով, տարիներու բարի աւանդութիւն է, որ եկեղեցին պատիւի արժանացնէ գաղութին մէջ երկար տարիներու ծառայական վաստակ կերտած նուիրեալները։ Այս տարի, պատիւի արժանացաւ Յակոբ Առաքելեան, որ տասնամեակներ ծառայած է եկեղեցւոյ, ՀՄԸՄի Լոս Անճելըսի մասնաճիւղին եւ «Րաֆֆի» Ռումանահայ հայրենակցական եւ մշակութային միութեան։

Ձեռնարկը ունէր գեղարուեստական բաժին մը, զոր ճոխացուցին եկեղեցւոյ կիրակնօրեայի եւ  Ռոզ եւ Ալեք Փիլիպոս Ազգային վարժարանի աշակերտները։ Կիրակնօրեայի աշակերտներէն Աշոտ Վարպետեան եւ Նուարդ Մարապեան արտասանեցին «Հաւատամք»ը, իսկ հայկական մենապարով ելոյթ ունեցաւ Սիլվի Խաչատրեան։ Ռոզ եւ Ալեք Փիլիպոս Ազգային վարժարանի 11րդ կարգի աշակերտուհիներէն Մերի Մոնոսեանի խօսքէն ետք, խումբ մը աշակերտներ երգեցին «Թիփի բորան»ը, 4րդ կարգէն Զոյի Զակրապեան արտասանեց «Ա.Բ.Գ. Դ., տղաս կարդա՛» ոտանաւորը, իսկ 5րդ կարգէն Ինեսսա Տիարեան եւ Թիֆընի Էմիրզեան ներկայացուցին պար մը։ Շահան Տագէսեան, Նուարդ Մարապեան եւ Մեղեդի Փոլատեան՝ կիթառի ընկերակցութեամբ, երգեցին «Բարի արագիլ»ը, իսկ Լալէ Խաչերեան, Նիքոլ եւ Քլոյի Թաշճեաններ ներկայացուցին կենդանի պատկեր մը՝ հիմնուած Զաւէն Սիւրմէլեանի «Ասք ծառ տնկելու մասին» բանաստեղծութեան վրայ։ Ժագլին Մկրտչեան եւ Քրիստին Ալմաճեան երգեցին «Արի իմ սոխակ»ը, իսկ 6րդ կարգի աղջիկները պար մը ներկայացուցին «Հայաստանը մերն է» երգի հետեւողութեամբ։

Աւարտին, «Հերոսների կենացը» զուգերգով ելոյթ ունեցան 9րդ կարգէն Սաթիկ Սէրայտարեան եւ Փարէն Տէր Սարգիսեան, ընկերակցութեամբ բոլոր մասնակցողներուն։

Այնուհետեւ խօսք առաւ եկեղեցւոյ հոգեւոր հովիւը։ Տէր հայրը նախ գնահատանքով արտայայտուեցաւ աշակերտներուն ներկայացուցած յայտագիրին մասին՝ շեշտելով, որ անոնք վկայեցին, թէ մեր եկեղեցին ու դպրոցը կը հանդիսանան հայկական ժառանգութեանց պահպանման հիմնաքարերը։ Ապա ան հակիրճ կերպով անդրադարձաւ մեծարեալին ծառայական կեանքին, եւ հոգաբարձութեան ատենապետ Մարտիկ Պուլտուքեանի հետ յուշատախտակ մը յանձնեց Առաքելեանին։

ՀՄԸՄի Լոս Անճելըսի մասնաճիւղի վարչութեան ատենապետը՝ Օննիկ Պէրպէրեան, իր կարգին, դրուատիքով խօսեցաւ մասնաճիւղի հիմնադիր այս անդամի վաստակին մասին եւ յանուն վարչութեան՝ յուշանուէր մը յանձնեց անոր։

Խօսք առաւ նաեւ Առաքելեանի դուստրը՝ Լուիզա Կոլշըն, որ անդրադառնալէ ետք իր հօր ծառայական վաստակին՝ վեր առաւ ծառայողներ գնահատելու եւ արժեւորելու կարեւորութիւնը։

Առաջնորդ սրբազանը իր եզրափակիչ խօսքով գնահատեց հոգեւոր հովիւը, հոգաբարձութիւնը, կիրակնօրեայի եւ Փիլիպոս վարժարանի աշակերտները, իրենց մատուցած գեղեցիկ յայտագիրին համար։ Ան յատուկ կերպով շնորհաւորեց բոլոր նուիրատուները եւ օրհնութեան գիրով մը պատուեց մեծարեալը։ Իր գիրին մէջ, ան գնահատանքով կ՛արտայայտուի Առաքելեանի բազմատասնեակ տարիներու ծառայութեանց մասին՝ նշելով, որ իր ծննդավայր Ռումանիայէն Լոս Անճելըս տեղափոխուելէն ետք, ան «աւելի քան կէս դար լիարժէք կերպով մասնակից դարձած է մեր շրջանի հայկական կեանքին ու ներդրում ունեցած է բազմաթիւ ասպարէզներու մէջ, եղած է Հոլիվուտի Ս. Կարապետ Մայր եկեղեցւոյ ու ՀՄԸՄի Լոս Անճելըսի մասնաճիւղի հիմնադիրներէն, մասնակցութիւն բերած է Ռոզ եւ Ալեք Փիլիպոս Ազգային երկրորդական վարժարանի հիմնադրութեան, նոյն ժամանակ մեր մշակոյթին ու հասարակական կեանքին մէջ ներդրում ունեցած է «Րաֆֆի» Ռումանահայ միութեան ճամբով։ Ան վարած է պատասխանատու պաշտօններ, իսկ անոր բարերարութիւնները հաւասարապէս բաշխուած են մեր եկեղեցւոյ, դպրոցին, Հայաստանին ու Արցախին»։

Սրբազանը վեր առաւ մեծարեալին արժանիքները՝ ընդգծելով, որ ան գործած է հաւատարիմ մնալով զինք ու սերնդակիցները պատրաստողներուն աւանդին եւ սկզբունքներուն՝ խորապէս գիտակցելով, որ մեր եկեղեցին, ուսումնարանն ու հայկական միութիւնները անփոխարինելի դեր ունին հայրենիքէն հեռու աճող մեր օճախներու պահպանման ու բարգաւաճման մէջ։ «Ան կատարած է աստուածահաճոյ գործ ու արժանի է բարձր գնահատանքի ու վարձատրութեան», եզրակացուց առաջնորդը։

Շնորհակալութեան եւ երախտագիտութեան խօսք արտասանեց նաեւ մեծարեալը, որ արտայայտուեցաւ իր գործին մղում տուող զգացումներուն ու ազգին հանդէպ հաւատարմութեան մասին։

Ձեռնարկը վերջ գտաւ առաջնորդ սրբազան հօր «Պահպանիչ»ով ու «Կիլիկիա»ի երգեցողութեամբ։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top