Եւրոպական Միութիւնը Դրական Ազդակներ Կը Տեսնէ Արցախի Բանակցութեանց Մէջ

0123EU-Artsakh

0123EU-Artsakh

ԵՐԵՒԱՆ.- «Ազատութիւն» ձայնասփիւռի կայանը կը հաղորդէ, որ Եւրոպական Միութեան արտաքին քաղաքականութեան բարձրագոյն յանձնակատար Ֆետերիքա Մոկերինիի գրասենեակին կողմէ 19 Յունուարին հրապարակուած յայտարարութեան մէջ նշուած է, որ Պրիւքսէլ դրական ազդակներ կը տեսնէ Արցախի տագնապին շուրջ բանակցութիւններուն մէջ եւ կ՛ակնկալէ, որ կողմերը ամբողջութեամբ իրականացնեն վերջին հանդիպումներուն ընթացքին ձեռք բերուած համաձայնութիւնները:

«Հայաստանի վարչապետ Նիկոլ Փաշինեանի եւ Ատրպէյճանի նախագահ Իլհամ Ալիեւի վերջին հաղորդակցութիւնները, ինչպէս նաեւ արտաքին գործոց նախարարներու հանդիպումները՝ ԵԱՀԿի Մինսկի խմբակի համանախագահներուն հովանիին տակ, դրական ազդակներ կը հաղորդեն ղարաբաղեան տագնապի խաղաղ լուծման», յայտարարեց Եւրոպական Միութեան արտաքին քաղաքականութեան բարձրագոյն յանձնակատարին բանբերը՝ Մայա Քոսիանչիչ:

«Եւրոպական Միութիւնը կը սպասէ անոնց արդիւնքներուն ամբողջական իրականացման, ներառեալ՝ արտաքին գործոց նախարարներու վերջին համաձայնութեան կատարումը՝ ըստ որուն անհրաժեշտ է շօշափելի քայլերու ձեռնարկել՝ իրենց հասարակութիւնները խաղաղութեան պատրաստելու ուղղութեամբ, ինչպէս նաեւ քննել քայլեր՝ բանակցութիւնները վերականգնելու համար: Եւրոպական Միութիւնը կը շարունակէ բոլորովին աջակցիլ ԵԱՀԿի Մինսկի խմբակի համանախագահներու ջանքերուն, Եւրոպական Միութեան Կովկասի գծով յատուկ ներկայացուցիչին միջոցով, ինչպէս նաեւ կողմերուն միջեւ վստահութիւնը ամրապնդող քայլերով: Բոլորը պիտի շահին տեւական խաղաղութենէն, որ կարելիութիւն պիտի տայ Հարաւային Կովկասին՝ ամբողջովին իրականացնելու իր կարելիութիւնները», եզրակացուց Եւրոպական Միութեան դիւանագիտութեան պետին բանբերը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top