Նիկոլ Փաշինեան Զիւրիխի Մէջ Հանդիպումներ Ունեցաւ Խումբ Մը Գործարարներու Հետ

0122zurich

0122zurich

Աշխատանքային այցելութեամբ Զուիցարիա գտնուող Հայաստանի վարչապետ Նիկոլ Փաշինեան Զիւրիխի մէջ հանդիպումներ ունեցաւ խումբ մը գործարարներու հետ: Վարչապետի աշխատակազմի տեղեկատւութեան եւ հասարակայնութեան հետ կապերու վարչութենէն կը տեղեկացնեն, թէ կողմերը քննարկեցին Հայաստանի մէջ ներդրումային զանազան ծրագիրերու իրականացման կարելիութիւնները եւ հեռանկարները:

Վարչապետը Զուիցերիա-Հայաստան առեւտուրի պալատի նախագահ Մայք Պարոնեանի հետ քննարկեց դեղագործութեան շրջագիծին մէջ Հայաստանի մէջ իրականացուող ներդրումային ծրագիրի ընդլայնման վերաբերող հարցեր: Մայք Պարոնեան նշեց, որ այժմ երեւանեան ընկերութիւնը կը զբաղի հումքի վերամշակումով, եւ իրենց նպատակն է Հայաստանի մէջ կազմակերպել նաեւ դեղերու արտադրութիւն եւ իրականացնել արտածում: Կը նախատեսուի յառաջիկայ հինգ տարիներուն ընթացքին ներդրել առաւել քան տասը միլիոն տոլար՝ ստեղծելով բարձր աշխատավարձով նոր աշխատատեղեր: Մայք Պարոնեան վարչապետին ներկայացուց նաեւ նորագոյն արհեստագիտութիւններու միջոցով ուժանիւթի արտադրութեան եւ պղինձի վերամշակման վերաբերեալ ներդրումային այլ ծրագիրներ:

Զուիցերիացի գործարար Հանս Շուէյկարթ Հայաստանի կառավարութեան ղեկավարին ներկայացուց արեւային ուժանիւթի արտադրութեան ներդրումային մեծ ծրագիր մը: Նիկոլ Փաշինեան ողջունեց Շուէյկարթի նախաձեռնութիւնը եւ ներկայացուց ուժանիւթի ոլորտին մէջ կառավարութեան յառաջիկայ տարիներու ռազմավարութիւնը եւ այդ բնագաւառի զարգացման հեռանկարները: Նիկոլ Փաշինեան առաջարկեց գործարարին ծրագիրը կեանքի կոչելուն վերաբերող հարցերը քննարկել Ուժանիւթի ենթակառուցուածքներու եւ բնական պաշարներու նախարարութեան հետ՝ զանոնք արդիւնաւէտ կերպով իրականացնելու նպատակով:

0122zurich1

Նիկոլ Փաշինեանը հանդիպեցաւ նաեւ «Ֆրանք Միւլլեր» ընկերութեան նախագահ, զուիցերիահայ յայտնի գործարար եւ բարերար Վարդան Սրմաքեշի գլխաւորած պատուիրակութեան հետ: Հանդիպման ընթացքին քննարկուեցան գիւղատնտեսութեան, սնունդի արդիւնաբերութեան, շինարարութեան, դրամատնային համակարգի, ոսկեգործութեան, ժամագործութեան եւ մասնագիտական կրթութեան ոլորտներուն մէջ շարք մը ներդրումային ծրագիրներու իրականացման վերաբերող հարցեր: Վարչապետը կարեւոր համարեց ներկայացուած ծրագիրներուն իրականացումը մեր երկրէն ներս եւ յայտնեց կառավարութեան պատրաստակամութիւնը՝ գոյութիւն ունեցող մեքենակառոյցներու ծիրին մէջ օժանդակելու անոնց իրականացման: Նիկոլ Փաշինեան նշեց, որ կառավարութիւնը պիտի շարունակէ գործարար միջավայրի բարելաւման ուղղուած քայլերը եւ շահագրգռուած է Հայաստանի մէջ նոր ներդրումներու իրականացումով եւ աշխատատեղերու ստեղծումով:

Նիկոլ Փաշինեան Վարդան Սրմաքեշի հետ քննարկեց նաեւ «Հին Երեւան» ծրագիրի իրականացման վերաբերող հարցեր: Կառավարութեան ղեկավարը ընդգծեց պատմամշակութային յուշարձաններու պահպանութեան սկզբունքին կարեւորութիւնը եւ այդ շէնքերուն հանդէպ առաւելագոյն խնամք ապահովելու անհրաժեշտութիւնը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top