Մանուէլ Գրիգորեան Կալանաւորուեցաւ

0122manuel

0122manuel

ԵՐԵՒԱՆ.- «Արմէնփրէս»ը կը տեղեկացնէ, թէ Հայաստանի Ազգային ժողովի նախկին պատգամաւոր, ԵԿՄ նախկին նախագահ Մանուէլ Գրիգորեան տեղափոխուեցաւ «Երեւան-Կեդրոն» քրէակատարողական հիմնարկ եւ բանտարկուեցաւ:

Հայաստանի վերաքննիչ դատարանը որոշում տուած էր բաւարարելու Ազգային ժողովի նախկին պատգամաւոր, ԵԿՄ նախկին նախագահ Մանուէլ Գրիգորեանի գրաւով ազատ արձակելու առաջին ատեանի դատարանի որոշման դէմ Գլխաւոր դատախազութեան բողոքը:

21 Դեկտեմբերին, Մանուէլ Գրիգորեան, 25 միլիոն դրամ գրաւի դիմաց կալանքէ ազատ արձակուած էր: 24 Դեկտեմբերին, Դատախազութիւնը վերաքննիչ բողոք ներկայացուցած էր Մանուէլ Գրիգորեանի խափանման միջոցի փոփոխութեան դէմ: Մանուէլ Գրիգորեանին մեղադրանք առաջադրուած է Քրէական օրէնսգիրքի 235րդ յօդուածի 2րդ մասին հիման վրայ՝ ապօրինի կերպով ռազմամթերք ձեռք բերելուն եւ այլ անձերու հետ նախնական համաձայնութեամբ պահելուն համար, ինչպէս նաեւ քրէական օրէնսգիրքի 179րդ յօդուածի 3րդ մասի 1ին հիման վրայ՝ խումբ մը անձերու հետ նախնական համաձայնութեամբ իւրացման եղանակով իր վստահութեան յանձնուած առանձնապէս մեծ չափերու ուրիշին գոյքը յափշտակելուն համար: 16 Յունիսին, Մանուէլ Գրիգորեան ձերբակալուած էր, ապա՝ 19 Յունիսին, Ազգային ժողովի պատգամաւորներու քուէարկութեամբ, զրկուած պատգամաւորական անձեռնմխելիութենէն ու դատարանի որոշումով՝ կալանաւորուած: Կալանքի տակ գտնուած միջոցին, պատգամաւորի պաշտպանները բազմաթիւ անգամներ բարձրաձայնեցին անոր առողջական հարցերուն մասին՝ նշելով, որ իրենց պաշտպանեալի կեանքին վտանգ կը սպառնայ: Ազգային անվտանգութեան ծառայութեան (ԱԱԾ) տարածած հաղորդագրութեան մէջ ըսուած էր, որ Մանուէլ Գրիգորեանին պատկանող հանգստեան գօտին վերածուած էր զինապահեստի, դասական եւ ժամանակակից տասնեակ ինքնաշարժներու կեդրոնի: Ակնալիճի ամառանոցը Գրիգորեանի համար ծառայած էր նաեւ «զինուորի բաժին» նշագրումով սնունդի, մաքրութեան պարագաներու, դեղորայքի, զինուորական հանդերձանքի պահեստարանի: Զինուորներուն հասցէագրուած արկղերուն կից նամակներէն յայտնի կը դառնայ, որ արկղերուն պարունակութիւնը 2016ի ապրիլեան քառօրեայ պատերազմի օրերուն ուղարկուած օգնութիւնն էր առաջնագիծի զինուորներուն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top