Իսրայէլ Իրանի Հետ Բացայայտ Եւ Բաց Ճակատումի Մէջ Է. Քաց

0123syr isra

0123syr isra

ԹԵԼ ԱՒԻՒ, ԴԱՄԱՍԿՈՍ, «Ռոյթըրզ».- Սուրիական օդային պաշտպանութեան համակարգերը 21 Յունուարի գիշերը դէմ դրին իսրայէլեան հրթիռային լայնածաւալ յարձակումի մը, որ կ՛երկարէր մինչեւ Սուէյտա նահանգը: Իսրայէլեան յարձակումը կեդրոնացած էր մասնաւորաբար Քասուայի եւ Քնէյթրայի վրայ: Մինչ սուրիական աղբիւրներ հաղորդեցին, որ տասնեակներով հրթիւռներ վնասազերծուած են, Մարդկային իրաւանց սուրիական դիտարանը յայտարարեց, թէ իսրայէլեան յարձակումին պատճառով արձանագրուեցան 11 զոհեր, մինչ Ռուսիոյ պաշտպանութեան նախարարութիւնը հաղորդեց, որ զոհուեցան սուրիացի 4 զինուորներ եւ 6 ուրիշներ վիրաւորուեցան՝ աւելցնելով, որ արձանագրուած նիւթական վնասը սահմանափակ է: Սուրիոյ մէջ ռուսական Հմէյմիմ ռազմակայանի կեդրոնը յայտարարեց, թէ սուրիական հակաօդային ուժերը Իսրայէլի կողմէ արձակուած առաւել քան 30 «Քրուզ» հրթիռներ վնասազերծեցին: Նաեւ, Սուրիոյ զինուորական աղբիւր մը «Մայատին» արբանեակային պատկերասփիւռի կայանին յայտնեց, որ իսրայէլեան վերջին յարձակումը ցարդ տեղի ունեցած յարձակումներուն մէջ ամէնէն լայնածաւալն էր:

Իր կարգին, Իսրայէլ յայտնեց, որ իր օդուժը ռմբակոծեց Սուրիոյ մէջ իրանեան «Քուտս» ջոկատին պատկանող թիրախներ, իսկ իսրայէլեան բանակի բանբեր Աւիխայ Ատրահի յայտնեց. ««Քուտս» ջոկատին դէմ օդային լայնածաւալ հարուածներուն պատճառը իրանեան ուժի մը Դամասկոսի շրջանէն Կոլանի բարձունքներու հիւսիսային շրջանին ուղղութեամբ ցամաքէ ցամաք միջին հասողութեամբ հրթիռ արձակելն էր»։

Իր կարգին, Իսրայէլի տեղեկահաւաքի նախարար Եսրայէլ Քաց նշեց. «Իսրայէլ մուտք գործեց Իրանի հետ բացայայտ եւ բաց ճակատումի մէջ, եւ պիտի չարտօնենք, որ անիկա Սուրիոյ մէջ իր ներկայութիւնը ամրապնդէ։ Իսրայէլ պատրաստ է անհրաժեշտութեան պարագային այս ճակատումին մէջ մագլցողական քայլերու դիմելու»:

«Կոլանի բարձունքներու հիւսիսային մասին մէջ չմշկումի կեդրոն մը սուրիական հողերէն ենթարկուեցաւ հրթիռարձակման: Հրթիռը վնասազերծուեցաւ իսրայէլեան «Պողպատեայ գմբէթ»ին ճամբով: Բոլոր անոնք, որոնք մեր դէմ յարձակում կը գործեն, ատոր գինը սուղ պիտի վճարեն», ազդարարեց ան:

Աւելի ուշ, Իսրայէլի վարչապետ Պենիամին Նեթանիահու յայտարարեց, թէ իսրայէլեան օդային հարուածը թիրախ դարձուցած է Իրանը եւ անոր օժանդակող սուրիական ուժերը՝ շեշտելով. «Մեզ քանդել սպառնացողները ամբողջական հետեւանքները պիտի կրեն»:

Նշենք, որ իրանեան օդուժի հրամանատարը յայտարարեց. «Պատրաստ ենք Իսրայէլի դէմ վճռորոշ ճակատամարտին, որ պիտի յանգի անոր գոյութեան դադրեցման»:

Յիշեցնենք, որ Կիրակի օր եւս սուրիական հակաօդային պաշտպանութեան համակարգերը դէմ դրած էին երկրին հարաւային շրջանին վրայ իսրայէլեան օդային յարձակումի մը: Յարձակումին հետեւանքով մարդկային զոհեր չէին արձանագրուած:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top