Համայնքներու Ընկերային-Տնտեսական Ծրագիրներուն Պիտի Տրամադրուի 10 Միլիառ Դրամ 

ԵՐԵՒԱՆ.- Հայաստանի Հանրապետութեան կառավարութիւնը որոշած է այս տարի 10 միլիառ դրամ յատկացնել նպաստ (նպաստները համայնքին կողմէ իրականացուող առանձին նպատակային ծրագիրի կատարման համար անհատոյց եւ անվերադարձ տրուող դրամական միջոցներն են):

Ըստ «Արմէնփրէս»ի՝ 11 Փետրուարին, համայնքապետներու հետ հանդիպման ընթացքին, այս մասին յայտնեց վարչապետ Նիկոլ Փաշինեան՝ ըստ որուն, հարց կայ նպաստային ծրագիրներու միջոցով իրականացնել յատկապէս ենթակառուցուածքներուն վերաբերող ծրագիրներ:

Վարչապետը նշեց, որ Հայաստանի Հանրապետութեան կայուն զարգացման գրաւականը համայնքներու ընկերային-տնտեսական յառաջընթացն է:

Անդրադառնալով համայնքներու հարցերուն՝ վարչապետը ըսաւ, որ Հայաստանի մէջ համայնքներու ղեկավարները կը տարբերին իրենց անցած ճանապարհով, կենսագրութեամբ եւ արժանիքներով: «Իմ ընկալումով «միջին վիճակագրական» համայնքի ղեկավարը պէտք է վայելէ համայնքին աջակցութիւն: Մենք կը խօսինք համայնքներուն մէջ ներդրումային միջավայրի բարելաւման մասին, բայց երբ համայնք մտնես, ուշադրութիւն կը գրաւեն տարածքներ, որոնք համայնքի ղեկավարինը կամ վերջինիս բարեկամինն են: Ասիկա զարմանալի իրականութիւն է: Զարմանալի է, որ ատիկա կը հանդուրժուի նաեւ հանրութեան կողմէ», ընդգծեց ան:

Վարչապետը յայտնեց, որ իրեն, կառավարութեան եւ ժողովուրդին համար այս մօտեցումը ընդունելի չի կրնար ըլլալ: «Ես կ՛ուզեմ արձանագրել, որ պետական ծառայութիւնը համայնքի ղեկավարին, աւագանիի անդամին կողմէ չի կրնար եւ պիտի չընկալուի իբրեւ գործարար գործունէութիւն: Պետական պաշտօնեայի գործունէութեան հիմքը հանրային հարստութեան բազմապատկումն է», ընդգծեց վարչապետը՝ աւելցնելով, որ Հայաստանի մէջ կաշառակերութիւնը պէտք է արմատախիլ ըլլայ:

Համայնքներուն առջեւ ծառացած յաջորդ հարցը՝ ըստ Նիկոլ Փաշինեանի, աղբահանութիւնն է: «Ես կը կարծեմ, որ լրջագոյն փոփոխութիւններ պիտի ըլլան, երբ մենք յաջողինք Հայաստանը ազատել աղբէն, ժանգոտած կրպակներէն եւ ինքնաշարժներու թափքերէն, եւ ասիկա իսկապէս այն ոլորտն է, որուն մէջ կառավարութիւնը եւ տեղական ինքնակառավարման մարմինները պէտք է համագործակցին», ըսաւ Փաշինեան՝ աւելցնելով, որ 23 Մարտին Հայաստանի մէջ տեղի պիտի ունենայ համահայկական շաբաթօրեակ, որ պէտք է կազմակերպուի պատշաճ մակարդակով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top