1.8 Միլիոն Տոլար Պիտի Տրամադրուի Տիգրանակերտի Ս. Կիրակոս Եկեղեցւոյ Նորոգութեան

0222St. Giragos

0222St. Giragos

ՊՈԼԻՍ, «Մարմարա».- Թրքական «Սապահ» թերթը կը յայտնէ, որ Տիգրանակերտի Ս. Կիրակոս եկեղեցին, որ կը գտնուի քաղաքին պատմական Սուր շրջանին մէջ եւ որ մեծապէս վնասուեցաւ Քիւրտիստանի բանուորական կուսակցութեան դէմ մղուած ռազմական գործողութիւններուն հետեւանքով, պիտի վերանորոգուի պետական միջոցներով։

Կը նշուի, որ կենսոլորտի եւ քաղաքաշինութեան նախարարութիւնը խոստացած է վերանորոգել պատմական այս եկեղեցին։ Ըստ Սուր շրջանի քաղաքապետ Ապտուլլահ Չիֆթճիի՝ ծախսերը պիտի կազմեն մօտաւորապէս 10 միլիոն թրքական լիրա ¤1.8 միլիոն տոլար), իսկ նորոգութիւնները պիտի սկսին մօտիկ ապագային։

Յիշեցնենք որ Ս. Կիրակոսը հայկական ամենամեծ եկեղեցին է Միջին Արեւելքի մէջ։ Մեծ դժուարութիւններով վերանորոգութեան աշխատանքներ տեղի ունեցած էին մօտաւորապէս տասը տարի առաջ եւ եկեղեցին պաշտամունքի վերաբացուած էր 2011ին։

Նոյեմբեր 2012ին, 32 տարուան ընդմիջումէ ետք այս եկեղեցւոյ մէջ մատուցուած էր առաջին Ս. պատարագը, եւ նոյն օրը տեղի ունեցած էր նաեւ առաջին պսակադրութիւնը։ Եկեղեցւոյ վերանորոգութեան աշխատանքները իրականացած էին Պոլսոյ Հայոց պատրիարքարանի աջակցութեամբ։ Աշխատանքներուն զօրակցած էր նաեւ Տիգրանակերտի քաղաքապետարանը։ Վերակառուցուած էր եկեղեցւոյ զանգակատունը, որ վնասուած էր 1915ին, ռմբակոծութենէ ետք։ Թէեւ Ս. Կիրակոս եկեղեցին մինչեւ 1980 գործած էր, սակայն անոր զանգակները միայն 4 Նոյեմբեր 2012ին կրկին ղօղանջելու սկսած էին։ 2015ին այն թաղին մէջ, ուր կը գտնուէր եկեղեցին, բախումներ սկսած էին եւ կռիւները յատկապէս սաստկացած էին 2016ի զինուորական հարուածի փորձէն ետք։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top