Եզնիկ Բալիկի «Առակներ» Նոր Հրատարակուած Հատորին Գինեձօնը

0000Yeznig1

0000Yeznig3ՊԸՐՊԵՆՔ, «Նոր Օր».- Հայաստանեայց առաքելական եկեղեցւոյ Հիւսիսային Ամերիկայի Արեւմտեան թեմի առաջնորդարանին կազմակերպութեամբ, Չորեքշաբթի, 20 Փետրուարին, «Համբար» դահլիճին մէջ, տեղի ունեցաւ իր տեսակին մէջ եզակի հանդիսութիւն մը՝ նուիրուած Եզնիկ Բալիկի (Բալայեան) «Առակներ» հատորին: Ինչո՞ւ եզակի, որովհետեւ այսօր արեւմտահայերէնով նոր առակներ չունինք, որովհետեւ նոր առակագիրներ չունինք… Այս իմաստով, Եզնիկ Բալիկի նորատիպը, որ մասամբ կը բաղկանայ նախորդ հատորէն կատարուած արտատպումներէ եւ մասամբ մըն ալ թերթերու մէջ նոր ցրուած եւ անտիպ առակներէ, մնայուն արժէք ունեցող ստեղծագործութիւններ են, որոնց մէջ կենդանիներու պատեանին տակ մենք ենք՝ մարդը, իր լաւով եւ ցաւով, բարութեամբ թէ չարութեամբ:

Գիրքին մեկենասն է «Նոր Կեանք» շաբաթաթերթի արտօնատէր եւ խմբագիր Գրիգոր Շէնեան, որ այս հատորը նուիրած է իր հանգուցեալ կնոջ՝ Արշոյին, որ երկար տարիներ վարչական պատասխանատուն եղած էր այդ թերթին: Այսօր Արշօն չկայ, «Նոր Կեանք»ը՝ նոյնպէս, սակայն Շէնեան, որ անցեալին քաջալերած եւ միշտ տեղ տուած էր Եզնիկ Բալիկի առակներուն, այս հատորով 41ի բարձրացուց «Նոր Կեանք» մատենաշարին թիւը: Դժբախտաբար, առողջական պատճառներով Շէնեան չկրցաւ ներկայ գտնուիլ գինեձօնին:

Հանդիսավարութիւնը ստանձնած էր ՀԲԸՄի Մանուկեան-Տեմիրճեան վարժարանի հայերէնի ուսուցչուհի Սեւան Տէր Պետրոսեան, որ խնամքով վարեց երեկոն, ուր Սան Ֆրանսիսքոյէն հրաւիրուած էր գիրքին հեղինակը՝ Եզնիկ Բալայեան եւ կինը՝ Քնարը, իսկ իրենց ներկայութեամբ հանդիսութիւնը կը պատուէին առաջնորդ Յովնան արք. Տէրտէրեան, Մանուկ Ա. քհնյ. Մարգարեան եւ Խաժակ քհնյ. Շահբազեան, մտաւորականներու հոյլ մը, ինչպէս նաեւ ընթերցասէր ու մշակութասէր հայրենակիցներ, Եզնիկ Բալիկի բարեկամներ ու հարազատներ:

 

Գիրքը ներկայացուց «Նոր Օր»ի խմբագիր, ՀԲԸՄի Մանուկեան-Տեմիրճեան վարժարանի հայերէնի բաժանմունքի վարիչ Հրաչ Սեփեթճեան: Ան, ի միջի այլոց, ըսաւ. «Շնորհքը ի վերուստ կու գայ, սակայն առանց աշխատանքի, այդ շնորհքը ոչինչ կրնայ ընել: Այսօրուան մեծարեալը օժտուած է ստեղծագործելու, բան ստեղծելու շնորհքով, երեւակայութեան մեծ մտահորիզոնով, լեզուին՝ հայոց լեզուին հանդէպ անմնացորդ սէրով, վանկերու եւ յանգերու հետ իր խաղով, ես՝ պարով պիտի ըսէի նաեւ: Կարճ՝ գետը գտած էր իր ճամբան: Արտայայտուելու ամէնէն գեղեցիկ, հաճելի, օգտաշատ եւ դաստիարակիչ ճամբան է առակագրութիւնը, որ քիչերու տրուած է: Սփիւռքի մէջ այդ քիչերէն է Եզնիկ Բալիկ, որ կը շարունակէ նոյն խանդավառութեամբ մտածել, խօսիլ, արտայայտուիլ, գրել, այնպէս որ, կը սպասենք, որ այս հատորը ունենայ իր յաջորդը, մանաւանդ, որ առակն ու անոր պատգամը մնայուն հաստատումներ են եւ դժբախտաբար, մարդը մարդ կը մնայ՝ մեծատառ թէ փոքրատառ, տարիներու եւ դարերու թաւալքին տակ. ան սմսեղուկ է եւ պնակալէզ, նոյն ատեն յարգալից եւ ազնիւ, չար է ու բարի, վախկոտ է եւ քաջ, անտարբեր է եւ հակառակը, եւ այսպէս շարունակ»։

0000Yeznig1

Հանդիսութեան ընթացքին, Տէր Պետրոսեան եւ Սեփեթճեան ընթերցեցին առակներէն ըտնրանի մը:

Գեղարուեստական մասը նոյնքան յաջող էր: «Պետրոսեան Եռեակը»՝ մայր, դուստր եւ որդի՝ Լորա Օսպըրն, Լիլի եւ Տարօն Պետրոսեաններ հմայեցին ներկաները տարբեր նուագարաններու վրայ՝ սրինգ, դաշնամուր, փող, կիթար եւ թմբուկ՝ հրամցնելով հայ թէ օտար հեղինակներու ստեղծագործութիւններ: Անիկա եզակի երեկոյ մըն էր նաեւ այդ  առումով: Կը շնորհաւորենք փայլուն ապագայ խոստացող քոյր-եղբայր Պետրոսեանները:

Պահն էր շնորհակալական խօսքի: Եզնիկ Բալիկ, աւազանի անունով Տիգրան, ծնած է Պէյրութ, կրթութիւնը ստացած է Անթիլիասի Դպրեվանքին մէջ, ձեռնադրուած է վարդապետ, վարած է բազմաթիւ պաշտօններ Լիբանանի մէջ, ութ տարիներ եղած է Վենեզուելլայի հոգեւոր հովիւը: Ապա, դուրս գալով հոգեւորականութենէ, պսակուած է Քնար Գարակէօզեանի հետ: Գաղթելով Միացեալ Նահանգներ, մինչեւ այսօր կ՛ապրի եւ կը ստեղծագործէ Սան Ֆրանսիսքոյի մէջ:

Ան շնորհակալական իր խօսքը փոխանցելէ ետք հանդիսութեան կազմակերպիչներուն եւ մասնակիցներուն, սրտաշարժ ելոյթ մը ունեցաւ, կարեւորելով մայրենի լեզուին գործածութիւնը Սփիւռքի տարածքին՝ որպէս հայ մնալու ամենակարեւոր նախապայման: Անոր խօսքը հատու էր, մերթ՝ խիստ, մերթ՝ ժուժկալ, սակայն եւ այնպէս կու գար սիրտին խորերէն: Եզնիկ Բալիկին պոռթկումը տեղին էր, ի տես ամերիկահայ նոր սերունդներուն նուազող հայախօսութեան:

Աւարտին, առաջնորդ Յովնան արք. Տէրտէրեան բարձրօրէն գնահատեց Եզնիկ Բալիկի գրական աշխատանքը, արժեւորեց առակագրութեան դերը հայ գրականութենէն ներս եւ նորանոր յաջողութիւններ մաղթեց հեղինակին:

Հանդիսութիւնը փակուեցաւ գինեձօնի արարողութեամբ, որմէ ետք Եզնիկ Բալիկ մակագրեց հատորէն օրինակներ:

Օրինակելի քայլով մը, Եզնիկ Բալիկ սիրայօժար «Նոր Օր» շաբաթաթերթին բարգաւաճման հիմնադրամին նուիրեց այդ երեկոյ «Առակներ» հատորէն հաւաքուած հասոյթը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top