«Պէտք Է Յստակացնենք Մեր Գործողութիւնները Թէ՛ Զինուորական, Թէ՛ Դիւանագիտական Ճակատներուն Վրայ». Արսէն Համբարձումեան

0315arsen

0315arsen

Թէեւ իշխանութեան որոշ ներկայացուցիչներ կը փորձէին տպաւորութիւն ստեղծել, որ Մատրիտեան սկզբունքներու հարցը օրակարգի վրայ չէ, սակայն իրականութիւնը այլ է. անոնք տակաւին կան, հետեւաբար այս առումով ԵԱՀԿի Մինսկի խմբակի համանախագահներուն  յայտարարութիւնը անսպասելի պէտք չէ նկատել: Այս մասին «Նիուզ»ի  հետ զրոյցի մը ընթացքին նշեց ՀՅԴ Բիւրոյի անդամ Արսէն Համբարձումեան:

Ըստ անոր՝ ԵԱՀԿի Մինսկի խմբակի համանախագահներուն  յայտարարութեան կշռոյթը եւ անոր մէջ տեղ գտած որոշ ձեւակերպումներ ու մօտեցումներ որոշ մտահոգութիւններու տեղիք կու տան:

«Յայտարարութեան ուղերձները բազմաթիւ են, եւ այնպէս չէ, որ անոնք ուղղուած են միայն հայկական կողմին: Այսուհանդերձ, կը կարծեմ, որ մեր դիւանագիտութիւնը համապատասխան հետեւութիւններ պէտք է կատարէ», ըսաւ Համբարձումեան:

Ան ընդգծեց, որ Հայաստանի մէջ տեղի ունեցած իշխանափոխութենէն ետք բնական էր, որ արցախեան տագնապի լուծման հոլովոյթին մէջ որոշ դադարի վիճակ յառաջանար. «Նախ կողմերը իրարու տրամադրութիւնները շօշափելու, ստուգողական ազդակներ փոխանցելու հարց ունէին: Այս հոլովոյթին իբրեւ հետեւանք՝ Մինսկի խմբակի համանախագահողները, իրենց կարգին, տեղի ունեցող հանդիպում-քննարկումներուն ազդակները արժեւորելու, բանակցութիւններուն մէջ նոր էջ բանալու կարելիութիւնները գնահատելու հարց ունէին: Ըստ էութեան, այդ պայմանական դադարի փուլը արդէն կարելի է նկատել աւարտած», ըսաւ Համբարձումեան:

ՀՅԴ Բիւրոյի անդամը նկատել տուաւ, որ արցախեան հարցը աշխարհաքաղաքական լուրջ շահեր կը շօշափէ, եւ հակառակ վստահեցնող յայտարարութիւններուն, որ Մինսկի խմբակի համանախագահները անկողմնակալ միջնորդութիւն կը կատարեն, եւ որ տագնապին կողմերուն դիրքորոշումները վճռորոշ նշանակութիւն ունին, ակնյայտ է, որ իրականութիւնը հեռու է այդպիսին ըլլալէ:

«Այս առումով վերջին յայտարարութիւնը եւ Փաշինեան-Ալիեւ նախապատրաստուող հանդիպումը թերեւս կարելի է գնահատել իբրեւ բանակցային հոլովոյթը դարձեալ խիստ վերահսկողութեան տակ դնելու քայլ», ընդգծեց Համբարձումեան:

«Հայաստանի նոր իշխանութիւնները Մատրիտեան սկզբունքները ժառանգութիւն ստացած են, բայց այնպէս չէ, որ տեղեակ չէին այդ ժառանգութեան մասին», նշեց Արսէն Համբարձումեան:

Ըստ անոր՝ հարցը ոչ թէ ինքնին սկզբունքներն են, այլ՝ այդ սկզբունքներուն հիման վրայ տագնապի լուծման մօտեցումները եւ առաջարկուող ճամբու քարտէսը:

«Այս առումով վերապահումներ միշտ ալ եղած են, տարիներ շարունակ ապարդիւն բանակցութիւնները եւ սթաթիւս քոյի (հաստատուած իրավիճակի-Խմբ.) պահպանումը անոր վկայութիւնն են: Նոր իշխանութիւնները այդ կարելիութիւնը ունէին եւ ունին վերատեսութեան ենթարկելու նախապէս զանազան հանգամանքներու բերումով որդեգրուած եւ չարդարացուած որոշ մօտեցումներ: Այս առումով, պաշտօնական Երեւանի քայլերը պէտք է բխին յստակ եւ լաւ մշակուած հայեցակարգէ, հակառակ պարագային  ամէնէն լաւ մղումներով նոյնիսկ կարելի է ձախողիլ կամ ծուղակը  իյնալ», յայտարարեց Արսէն Համբարձումեան:

Ան ընդգծեց, որ հայեցակարգային առումով, հայկական կողմի (կողմերու) մօտեցումներու որոշ վերատեսութիւնները պէտք է վերաբերին ո՛չ միայն Արցախի ինքնորոշման հարցին, այլ նաեւ անվտանգութեան եւ սահմաններու հարցերուն:

«Ներկայիս յարափոփոխ մարտահրաւէրներու պարագային, ժամանակը չի սպասեր, անհրաժեշտ է յստակ հայեցակարգ որդեգրել եւ հետեւողական քայլերու ձեռնարկել: Ատրպէյճանի կողմէ հնչող ռազմատենչ յայտարարութիւնները եւ սպառնալիքները, ինչպէս նաեւ զինուորական գործողութիւններու սանձազերծման վտանգները նկատի ունենալով՝ մենք պէտք է յստակացնենք մեր գործողութիւնները թէ՛ զինուորական, թէ՛ դիւանագիտական ճակատներու վրայ: Արցախը մեր ժողովուրդին եւ մեր պետականութեան լինելիութեան գրաւականն է, եւ այս առումով մենք նահանջի տեղ չունինք: Համազգային զօրաշարժը այլընտրանք չունի», ըսաւ ան:

Պատասխանելով այն հարցումին, թէ եթէ բանակցային հոլովոյթին մէջ հայկական կողմը կը կարծրացնէ իր դիրքորոշումը Մատրիտեան սկզբունքներուն վերաբերեալ, կրնա՞յ ատիկա յանգեցնել զինուորական գործողութիւններու վերսկսման՝ ՀՅԴ Բիւրոյի անդամը ըսաւ. «Զինուորական գործողութիւններու վերսկսման վտանգը կարծր կամ մեղմ դիրքորոշումներով չէ, որ պայմանաւորուած է: Անշուշտ, բանակցութիւններու դուռը փակելու հարց պէտք չէ ըլլայ, եւ դիւանագիտութիւնը անոր համար է: Որեւէ պարագայի պէտք չէ առիթ տալ Ատրպէյճանին Հայաստանը ոչ բանակցելի կողմ ներկայացնելու համար», ըսաւ Արսէն Համբարձումեան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top