Զուրաբիշվիլին Մեղադրել Է Հայաստանի Ղեկավարութեանը. «Կոմմերսանտ»

0316salome

0316salome

Վրաստանի նորընտիր նախագահ Սալոմէ Զուրաբիշվիլին պաշտօնական այցով Հայաստանում է: Հայկական ղեկավարութեան հետ նրա բանակցութիւնների թեմաներից մէկը տարածաշրջանային հակամարտութիւնն էր: Երեւանում փորձել են պարզել, թէ Վրաստանի նախագահն ինչ նկատի ունէր, երբ վերջերս Բաքւում յայտարարել էր «Վրաստանի եւ Ադրբեջանի տարածքների օկուպացման (գրաւման-Խմբ.)» մասին: Արդիւնքում Վրաստանի նախագահը ոչ միայն հաստատել է իր դիրքորոշումը Լեռնային Ղարաբաղի վերաբերեալ, այլ նաեւ մեղադրանքներ է ներկայացրել հայկական ղեկավարութեան հասցէին: Սալոմէ Զուրաբիշվիլիի կոշտ դիրքորոշումը կարող է վերջ տալ հայ-ադրբեջանական հակամարտութեան կողմերի նկատմամբ միանման քաղաքականութեանը, որով Վրաստանն առաջնորդւում էր ամբողջ յետ-խորհրդային շրջանում:

Հայաստանի կառավարութեանը, որը Երեւանում ընդունել էր Վրաստանի նախագահին, մասնաւորապէս հետաքրքրում էր Սալոմէ Զուրաբիշվիլիի պարզաբանումները Բաքւում նրա երկիմաստ յայտարարութեան վերաբերեալ: 27 Փետրուարիին, Ադրբեջանում պաշտօնական այցի ժամանակ տիկին Զուրաբիշվիլին անդրադարձել էր Ադրբեջանի եւ Վրաստանի «տարածքների օկուպացման» թեմային: Նրա արտայայտութիւնները նախկին վրացական ինքնավար մարզերի՝ Աբխազիայի եւ Հարաւային Օսէթիայի՝ «Ռուսաստանի կողմից օկուպացման» մասին ոչ մէկի չեն զարմացրել, քանի որ Վրաստանի ներկայացուցիչները յաճախ են ելոյթ ունենում Մոսկուայի հասցէին մեղադրանքներով: Սակայն այս անգամ Վրաստանի նախագահն, ըստ երեւոյթին, առաջին անգամ բացէիբաց մեղադրել էր Հայաստանին Լեռնային Ղարաբաղն օկուպացնելու մէջ:

«Մենք գրեթէ միաժամանակ ենք վերականգնել մեր երկրների անկախութիւնը եւ ապրել ենք միանման ողբերգութիւնը», նշել է Սալոմէ Զուրաբիշվիլին‘ դիմելով Ադրբեջանի նախագահ Իլհամ Ալիեւին: Ընդ որում՝ Վրաստանի նախագահը պարզաբանել է, որ «միանման ողբերգութիւն» ասելով՝ նա նկատի ունէր «տարածքների օկուպացիան»:

«Օկուպացուած տարածքները մեզ համար եւս չսպիացած վէրք են», շարունակել է նախագահն ու յայտնել բաւարարուածութիւն, որ Վրաստանն ու Ադրբեջանը, չնայած օկուպացիայի, «կարողացել են ուժեղացնել իրենց պետականութիւնն ու զարգացնել տնտեսութիւնը»:

Ըստ «Կոմմերսանտ»ի տուեալների՝ Երեւանում հանդիպումների ընթացքում, այդ թւում՝ Հայաստանի նախագահ Արմէն Սարգսեանի եւ վարչապետ Նիկոլ Փաշինեանի հետ, Սալոմէ Զուրաբիշվիլիի՝ Բաքւում արուած յայտարարութիւնների թեման շօշափւում էր տարբեր սրութեամբ: Սակայն Վրաստանի նախագահն անգամ չէր արդարացնում կամ հերքում իր յայտարարութիւնը: Հակառակը, նա ներկայացնում էր հայկական կողմին մի շարք պահանջներ:

Մասնաւորապէս, Հայաստանի ԱԺ նախագահ Արարատ Միրզոյեանի հետ հանդիպման ժամանակ Սալոմէ Զուրաբիշվիլինին նախազգուշացրել է. իր երկրի համար «շատ կարեւոր է», որ Հայաստանը ճանաչի Վրաստանի տարածքային ամբողջականութիւնը ոչ միայն խօսքերով, այլ նաեւ գործնականում: Երկրի ղեկավարն անմիջապէս պարզաբանել է, որ նկատի ունի Լեռնային Ղարաբաղի պատուիրակութեան այցն Աբխազիա եւ Հարաւային Օսէթիա: «Այդկերպ այցերի կազմակերպիչներն իրենք են ցոյց տալիս, որ այդ հակամարտութիւնները համաչափ են», Վրաստանի նախագահը չէր թաքցնում իր դժգոհութիւնը: «Դա շատ ցաւալի է, շարունակել է Զուրաբիշվիլին: Մենք գտնում ենք, որ այստեղ չկայ այն բարեացակամութիւնը, որը պէտք է լինի մեր երկրի հանդէպ»

Թբիլիսիում համարում են, որ նախագահ Զուրաբիշվիլիի վերջին յայտարարութիւնն աննախադէպ է ամբողջ յետ-խորհրդային ժամանակաշրջանում, որի ընթացքում Վրաստանը պահպանում էր չէզոքութիւնը հայ-ադրբեջանական հակամարտութեան շրջանակներում:

«Կոմմերսանտ»ի հետ զրոյցում այդ տեսակէտը յայտնել է ընդդիմադիր «Եւրոպական Վրաստան» կուսակցութեան առաջնորդներից մէկը՝ արտաքին գործերի նախկին փոխնախարար Սերգի Կապանաձէն: Նրա կարծիքով՝ նախագահը պէտք է «շատ աւելի զգուշութիւն ցուցաբերի»՝ ելոյթ ունենալով այդպիսի «զգայուն թեմայի» շուրջ: Դրա հետ մէկտեղ պարոն Կապանաձէն խոստովանել է, որ Սալոմէ Զուրաբիշվիլիի յայտարարութիւնները չեն զարմացրել նրան: «Դա միայն սկիզբն է, կը լինեն նմանատիպ այլ յայտարարութիւններ եւս», վստահութիւն է յայտնել դիւանագէտը:

Վրաստանի կառավարութիւնում չեն մեկնաբանել Բաքւում եւ Երեւանում նախագահի յայտարարութիւնները: Այդ օրինակին են հետեւել նաեւ «Վրացական Երազանք» իշխող կուսակցութեան բոլոր պատգամաւորները, որոնք սատարում էին Սալոմէ Զուրաբիշվիլիին ընտրութիւնների ժամանակ:

Անկախ քաղաքագէտ Դաւիթ Աւալաշվիլին յիշեցրել է, որ համաձայն Վրաստանի սահմանադրութեան՝ պետութեան ղեկավարի լիազօրութիւնները կրում են խորհրդանշական բնոյթ: Այդ պատճառով, փորձագէտը յաւելել է, չնայած տիկին Զուրաբիշվիլիի յայտարարութիւնները շատ կարեւոր եւ աննախադէպ են, «Երեւանում եւ Բաքւում լուրջ եւ պատասխանատու գործիչները չեն դիտարկի դրանք որպէս հայ-ադրբեջանական հակամարտութեան նկատմամբ Վրաստանի կառավարութեան դիրքորոշման արմատական փոփոխութեան ցուցանիշ»:

 

«ՆԻՈՒԶ»

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top