Ազգային Առաջնահերթ Օրակարգը

0316viken

 

0316viken

ԴՈԿՏ. ՎԻԳԷՆ ՅՈՎՍԷՓԵԱՆ

 

Ստորեւ կը ներկայացնենք հատուած մը դոկտ. Վիգէն Յովսէփեանի՝ Ֆրեզնոյի մէջ ՀՅԴ 128ամեակի առթիւ ունեցած ելոյթէն.

 

Այսօր եթէ հայրենիքի անվտանգութիւնն ու հզօրացումը մեր ազգային օրակարգի առաջնահերթութիւնն է, երկրորդ կարեւորագոյն հրամայականը հայրենիք-սփիւռքահայութիւն գործընկերութիւնն է: Երկար խօսեցանք Հայաստան-Սփիւռք յարաբերութիւններուն մասին ու այդպէս ալ չհասկցանք, թէ խնդիրը գործընկերութեա՞ն մէջ է, թէ ոչ լոկ յարաբերութիւններու ստեղծման, եւ որուն միտք բանին ազգային ներուժի հաւաքագրումն է, համադրումն է, եւ այդ ներուժի հունաւորումը դէպի ազգային իտէալներու իրականացում:

Հայաստանի (կը ներառեմ Արցախը) եւ սփիւռքահայութեան գործընկերութիւնը խարսխուած պէտք է ըլլայ ազգային գաղափարախօսութեան այն հիմնարար սկզբունքին վրայ, թէ Հայաստանի զարգացումն ու վերելքը իր ամէնէն բնական, ապահով եւ գործնական գործընկերները պիտի փնտռէ ոչ թէ օտար պետութիւններու հովանաւորութեան ներքոյ, ու հոն բան մըն ալ կորսնցնէ իր պետական անկախութենէն, այլ իր եօթը միլիոն հաշուող սփիւռքահայութեան մօտ, որուն իսկական ուժն ու կարողականութիւնը – համոզուած եմ – ո՛չ հասկցած ենք, ոչ ալ մասամբ իսկ շղթայազերծած: Միւս կողմէ, սփիւռքահայութիւնը իր ինքնութիւնը պահպանելու եւ որպէս Հայկակա՛ն Սփիւռք իր գոյութիւնը արդարացնելու համար, իր հոգեմտաւոր սնունդը բնականաբար պիտի ստանայ Հայաստանէն, որ սիրտն ու հոգին է հայ ազգային գաղափարախօսութեան:

Ուստի, այս գործընկերութեան կարեւորագոյն երեսը ոչ թէ կը կայանայ անոր անհրաժեշտութիւնը հասկնալուն մէջ՝ բան մը, որուն կրնայ յանգիլ ամէնէն պարզ ու մակերեսային վերլուծումն անգամ, այլ զայն ճիշդ ու համարձակօրէն պատկերացնելուն, ծրագրելուն, եւ անոր ներուժը շղթայազերծելուն մէջ: Այստեղ է որ պէտք է հասկնալ, թէ սփիւռքահայութիւնը պէտք է անմասն ու անմիջական գործընկերը ըլլայ հայրենիքի քաղաքական, տնտեսական եւ ընկերային խմորին ու ամէնօրեայ կառուցման աշխատանքին, այլ ոչ թէ Հայաստան բերուի խորհրդաժողովներու, շքանշաններու կամ թէկուզ շերտ մը հողատարածք գնելու համար: Այս իմաստով, կը հաւատամ որ կան շատ մը անմիջական եւ նախնական քայլեր, որոնք պէտք է առնուին, սահմանադրական պատշաճեցումներէն մինչեւ առօրեայ վարչական բնոյթի վերատեսութիւններ:

Այս գործընկերութեան ակնարկելով է եւ անոր ներուժի հզօրութեան հաւատալով է, որ կը հաստատեմ, թէ ընթացիկ գործընկերութիւններու պարագային մէկ գործընկերը միւսին վրայ գումարելով երկուքի համազօր ուժ կարելի է ստանալ, սակայն հայրենիք-սփիւռքահայութիւն կարողականութիւններու գումարումը՝ ազգային գաղափարախօսական իր լիցքով, զգալաբար աւելի հզօր գործընկերութիւն մը յառաջ կը բերէ, ուր մէկը գումարած մէկին երեք կարելի է ստանալ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top