Վեհանոյշ Թեքեանի Աւելի Քան Յիսնամեայ Գրական Վաստակին Նուիրուած Ձեռնարկ

0000Tekyan2

ՍԱՆ ՖՐԱՆՍԻՍՔՕ.- Ուրբաթ, 8 Մարտին յիշատակելի ձեռնարկ մը տեղի ունեցաւ Սան Ֆրանսիսքոյի «Խաչատուրեան» Հայ կեդրոնի «Սարոյեան» սրահին մէջ: Այդ օրը Կիներու միջազգային օրն էր եւ Համազգայինի «Նիկոլ Աղբալեան» մասնաճիւղի գրական յանձնախումբի կազմակերպած երեկոն նուիրուած էր սփիւռքահայ գրագիտուհի՝ Վեհանոյշ Թեքեանի գործերուն:

Օրուան յայտագիր-գրքոյկին մէջ տեղ գտած գրական յանձնախումբի խօսքին մէջ կը կարդանք. «Վեհանոյշ Թեքեան այն հազուագիւտ  սփիւռքահայ գրագիտուհիներէն է, որ յաջող կերպով անդրադարձած է կիներու հանդէպ ընդհանրապէս եւ հա՛յ կիներու հանդէպ մասնաւորապէս դրսեւորուած անարդար, յաճախ՝ բիրտ վերաբերմունքին»։

Ձեռնարկին ամէնէն խանդավառիչ երեւոյթը մեծ թիւով երիտասարդներու ներկայութիւնն էր.  արդարեւ՝ Պըրքլի համալսարանի հայ ուսանող-ուսանողուհիներ ընդունած էին մաս կազմել յայտագիրին եւ ձեռնարկին եկած էին իրենց ընկեր-ընկերուհիներուն հետ: Անոնք, այլ հանդիսատեսներու նման, առիթ ունեցան իրենց հետ տանելու ձեռնարկին առթիւ յատուկ պատրաստուած գեղեցիկ էջացոյց մը, որուն առջեւի կողմը կարելի էր տեսնել գիրքերու դէզ մը, մէջտեղը՝ հեղինակի անունով, իսկ միւս կողմը կարդալ հետեւեալ տողը Թեքեանէն. «Ամէն գիշեր մոխիրները կը հաւաքեմ. ամէն առտու հայերէն գիրք շինած կ՛ըլլամ»:

Պէտք է նշել նաեւ իւրաքանչիւր աթոռի վրայ զետեղուած էջերը՝ Թեքեանի գրական կտորներէն տարբեր նմոյշներ ընդգրկող:

Ձեռնարկին բացումը կատարեց գրական յանձնախումբի անդամ Նանի Թնճուկեան։ Գրական յանձնախումբին անունով ան ուրախութիւն յայտնեց, որ երիտասարդները կարելիութիւնը պիտի ունենային ապրո՛ղ հեղինակ մը տեսնելու եւ անոր ունկնդրելու: Ան բեմ հրաւիրեց Պըրքլի համալսարանի հայերէնի եւ հայ գրականութեան դասախօս դոկտ. Միրնա Տուզճեան, որ շատ նուրբ եւ խորունկ ուսումնասիրութիւն մը ներկայացուց Թեքեանի գրելաձեւին մասին: Դոկտ. Տուզճեան բացատրեց իր ուսանողներուն ներկայացնելիք «Հայոց Պատմութիւն» բանաստեղծութիւնը, նշելով որ անիկա պատմական դէպքերու չի վերաբերիր եւ կը խօսի աշխարհով մէկ ցրուած հայերու պատմութեան մասին:

Դոկտ. Տուզճեանի ուսանողները մեծ խանդավառութեամբ ներկայացուցին Պէյրութ, Պոլիս, Փարիզ, Պուէնոս Այրես, Ուիսքանսըն կամ Նիւ Ճըրզի հաստատուած հայերու խօսակցութիւնը, մինչ՝ հանդիսատեսները յուզումնախառն ուրախութեամբ կը դիտէին եւ կ՛ունկնդրէին զիրենք:

Ապա, բեմ հրաւիրուեցան Պըրքլի համալսարանի երեք ուսանողուհիներ, որոնք իրենց ինքնատիպ մեկնաբանութեամբ հրամցուցին երեք անուշ երգեր՝ «Ծիրանի Ծառ», «Չինար ես» եւ «Աղունիկ»: Անոնց ցուցմունքներ տուած էր արհեստավարժ երաժշտական ղեկավար Արթին Տէր Մինասեանց:

Գրական յանձնախումբի անդամ Անի Աստուրեան տպաւորիչ ընթերցում մը կատարեց Թեքեանի իր նախասիրած կտորներէն: Կիներու օրուան առթիւ ան ընտրած էր այնպիսի կտորներ, որոնք կ՛արտացոլէին Վեհանոյշ Թեքեանի հաւատամքը՝ կիներու վերաբերող հարցերու մասին:

Սան Ֆրանսիսքոյի օփերայի երգչուհի Նատիմա Աւագեան, դաշնակի ընկերակցութեամբ Նայիրի Սարգիսի՝ հոյակապ ձեւով մեկնաբանեց Կանաչեանի «Օրօր» եւ Կոմիտասի «Քելէ Քելէ» ու «Երկինքն ամպել է» երգերը:

Այնուհետեւ բեմ հրաւիրուեցաւ Վեհանոյշ Թեքեանը, որպէսզի հակիրճ ձեւով անդրադառնայ «Հայ կնոջ ձայնը գրականութեան մէջ» նիւթին: Ան նախ շնորհակալութիւն յայտնեց ձեռնարկի կազմակերպիչ յանձնախումբին եւ «Նիկոլ Աղբալեան» մասնաճիւղի վարչութեան՝ այդպիսի որակաւոր եւ բծախնդրութեամբ պատրաստուած յայտագիր մը հրամցուցած ըլլալնուն համար: Պըրքլի համալսարանի հայ ուսանողներուն կատարած ընթերցումին եւ երգերուն անդրադառնալով՝ ան ըսաւ. «Տեսէ՛ք՝ Սփիւռքը մեռած չէ. վերջացած չէ. փաստը՝ այս երիտասարդները»:

Վեհանոյշ Թեքեանի խօսքէն ետք, հարցումներ ուղղուեցան իրեն՝ Պոլսոյ հայ մտաւորականներու կեցուածքին մասին, հանդէպ՝ հայ կին գրողներու, ինչպէս նաեւ իր ունեցած անձնական փորձառութիւններուն մասին։ Ան հաճոյքով, հիւմըրով եւ սիրո՛վ պատասխանեց բոլոր հարցումներուն, կլոր սեղանի մը շուրջ նստած:

Ձեռնարկին աւարտին, հանդիսավար Նանի Թնճուկեանի ձեռամբ պատրաստուած արուեստի գեղեցիկ գործ մը յանձնուեցաւ հեղինակին:

Ապա, հիւրասիրութեան սեղանին շուրջ հաւաքուելով, ներկաները  երկար մնացին սրահին մէջ՝ ուտելով ու շաղակրատելով: Իսկ ինք՝ Վեհանոյշ Թեքեան, երկա՜ր մնաց սեղանի մը ետեւ, գիրքեր մակագրելով:

Ուրախալին ա՛յն էր, որ իրիտասարներն էին հայերէն գիրք գնողները եւ մակագրութիւն խնդրողները:

Համազգայինի Գրական յանձնախումբի անդամները ուրախ էին, որ Կիներու միջազգային օրուան առթիւ կարելի դարձուցած էին սփիւռքահայ գրագիտուհի Վեհանոյշ Թեքեանի ձայնը հասցնել հարիւրէն աւելի ներկաներուն, մանաւանդ՝ հայ երիտասարդներու:

 

ՀԱՄԱԶԳԱՅՆԱԿԱՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

One Comment;

  1. Dr. Herand M. Markarian said:

    Սրտանց կը շնորհաւորեմ Սան Ֆրանսիսքօի Համազգայինի Նիկոլ Աղբալեան մասնաճիւղը, արժանաւոր բանաստեղծուհի Վեհանոյշ Թեքեանին նուիրած իր հոգեպարար ձեռնարկին առթիւ։ Արժան եւ իրաւ։
    Վարձերնիդ կատար սիրելի Համազգայնականներ։
    Տոքթ․ Հրանդ Մ․ Մարգարեան
    Նիւ Եոռք

*

Top