Մեծարանքի Երեկոյ՝ Ի Պատիւ Տոքթ. Յովհաննէս Գուլակ Աւետիքեանի

0321avedikian

 

0321avedikian

ԽԱՉԻԿ ՃԱՆՈՅԵԱՆ

 

Կիրակի, 24 Մարտ 2019ին, երեկոյեան ժամը 6էն սկսեալ, Պոլսահայերու միութեան կեդրոնին մէջ տեղի պիտի ունենայ մեծարանքի եւ գնահատանքի արդար ձեռնարկ մը, ի պատիւ՝ Լոս Անճելըսի հայութեան երկարամեայ ծառայողներէն, մանաւանդ՝ պոլսահայերու ամբողջանուէր անդամներէն տոքթ. Յովհաննէս Գուլակ Աւետիքեանին:

Ձեռնարկը կազմակերպուած է մեր գաղութին մէջ իր բազմաբեղուն ծառայութիւններով հանրածանօթ Պոլսահայերու միութեան կողմէ:

Այդ օր իրենց ներկայութեամբ ձեռնարկը եւ մեծարեալը պիտի պատուեն հայ ժողովուրդի բարեկամ դոկտ. Թաներ Աքչամ եւ վերջերս Հայաստան հաստատուած, ֆրանսահայ ծանօթ մտաւորական՝ Ռաֆֆի Հերմոն Արաքս, ինչպէս նաեւ գաղութիս մտաւորականներու եւ ազգային գործիչներու հոյլ մը:

Գրել տոքթ. Յովհաննէս Աւետիքեանի ծառայութիւններուն մասին՝ կը նշանակէ գրել յետ եղեռնեան սերունդին մասին. այն գործիչներուն եւ ազգայիններու մասին, որոնք վերջին 70-100 տարիներուն Պոլսոյ եւ Թուրքիոյ մէջ գործող կամ գոյութիւն ունեցող հայ եկեղեցիներու, դպրոցներու ու մշակութային կեանքին տէր ու պահապան եղան: Այդ սերունդը իր կեանքը վտանգելով՝ կուրծք տուաւ թուրք ազգայնամոլ իշխանութիւններուն եւ պաշտպան եղաւ մեր ժառանգութեանց ու հաստատութեանց: Անոնցմէ մին է տոքթ. Աւետիքեան, որ իր եռանդուն գործունէութեամբ Պոլսոյ մէջ դպրոցներու, եկեղեցիներու, երգչախումբերու եւ մշակութային հաստատութիւններու կեանք ու աւիշ տուած է իր ամբողջ կեանքին ընթացքին:

1977ին տոքթ. Աւետիքեան իր նորահարս տիկնոջ՝ Սեդային հետ Միացեալ Նահանգներ տեղափոխուեցաւ: Հոս եւս մէկ տարի իր վկայականները վաւերացնելու շրջանէն ետք, ան լծուեցաւ մեր գաղութի բազմաթիւ եւ բազմատեսակ ծառայութիւններուն:

Տոքթ. Յովհաննէս Գուլակի անունը անխզելիօրէն կապուած է իր այնքան սիրած եւ ծառայած Պոլսահայերու միութեան հետ, որ երկուքը իրարու հոմանիշ դարձած են կարծես:

Քառասուն տարիէ ի վեր ծանօթ ենք տոքթ. Յովհաննէս Գուլակի ազգային անաղմուկ, բեղուն ծառայութիւններուն: Ծանօթ ենք անոր հեզ, խոնարհ եւ բարեկիրթ բնաւորութեան: Անոր հետ աշխատած ենք քանի մը մարմիններու մէջ եւ միշտ արժանացած է մեր սիրոյն ու յարգանքին, շնորհիւ իր դրական մտածողութեան եւ իր անսակարկ նուիրումին:

Պոլսահայերու համով-հոտով արեւմտահայերէնով, քաղցրախօսութեամբ եւ մարդկային ազնուագոյն նկարագիրը կրող այս «աղբարիկ» մարդուն մէջ, մենք միշտ ալ տեսած ենք Պոլսոյ պատուական հայութեան տիպարը:

Տոքթ. Յովհաննէս Գուլակ Աւետիքեան Լոս Անճելըսի մէջ պոլսահայերու միութեան բաբախուն սիրտն է. հոն շուրջ քառասուն տարի անընդմէջ ծառայած է մշակութային յանձնախումբի ատենապետի հանգամանքով, բազմաթիւ, բազմատեսակ եւ բազմաբնոյթ մշակութային ձեռնարկներ կազմակերպելով: Եղած է գաղութի պարծանքը հանդիսացող Արեւմտեան թեմի Մայր տաճարի «Խաչատուրեան» քառաձայն երգչախումբի հիմնադիրներէն մին: «Արարատ» Charter School-ի, գաղութիս Միացեալ Մարմինի հիմնադիրներէն մին եւ առաջնորդարանի «Զուարթնոց» յանձնախումբի վարչականներէն:

Սկաուտի պէս պատրաստ, ազգային բոլոր նուիրահաւաքներուն մասնակցող, ձեռնարկներուն օժանդակող մեր սիրելի եւ պատուարժան ղեկավարներէն է տոքթ. Յովհաննէս Գուլակ Աւետիքեան, զոր սրտանց կը շնորհաւորենք այս արժանի եւ արդար գնահատանքին համար, մաղթելով իրեն եւ իր թանկագին կողակիցին արեւշատ օրեր ու մշտատեւ ծառայութիւններ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top