Մխիթարեան Հրատարակչատունը Լոյս Ընծայած է Հայոց Ցեղասպանութեան Վերաբերող Յօդուածներու ժողովածուներ

0322genocidepublication

0322genocidepublication

ԵՐԵՒԱՆ.- Ամերիկեան մամուլին, մասնաւորապէս, The New York Times-ի էջերուն մէջ հրապարակուած Հայոց Ցեղասպանութեան մասին յօդուածներէ կազմուած ժողովածուներուն մէջ զետեղուած են նիւթեր, որոնք կ՛անդրադառնան Համիտեան, Ատանայի ջարդերուն, եւ անոնց հետեւանքներուն: Ընդգրկուած են նաեւ՝ թուրք դեսպաններու, հիւպատոսներու յօդուածները եւ անոնց տրուած պատասխանները:

Հատորները լոյս տեսած են վերջերս՝ Մխիթարեան հրատարակչատան կողմէ եւ կը կոչուին The Armenian Genocide: Prelude and Aftermath. As reported in the U.S. Press – The New York Times (Հայոց Ցեղասպանութիւն. նախերգանք եւ յետգրութիւն: Հաղորդումներ ամերիկեան մամուլին մէջ՝ «Նիւ Եորք Թայմզ»): Գիրքերը կազմած եւ խմբագրած են Մխիթարեան միաբանութեան միաբան հայր Վահան ծայրագոյն վարդապետ Օհանեան եւ աւստրալահայ հետազօտող Արա Քեթիբեան:

Լրագրողները հեղինակներուն հանդիպելու եւ անոնց հետ զրուցելու կարելիութիւն ունեցած են Մարտ 20ին՝ Հայոց Ցեղասպանութեան թանգարան-հիմնարկին մէջ:

«Գիրքին մէջ տեղեկութիւններ կան նաեւ՝ այն  օտար եւ հայ մարդոց մասին, որոնք դրամական կամ այլ աջակցութիւն ցոյց տուած են հայ որբերուն, դպրոցներուն՝ հոգալով անոնց կարիքները, իսկ թուրք դեսպաններու,  հիւպատոսներու գրառումները, որոնք տեղ գտած են տարբեր յօդուածներու մէջ, շատ կը հակասեն նախճիրը վերապրածներու  գրառումներուն: Նոյն քաղաքականութիւնն է. ոչինչ փոխուած է: Անոնք այդ ժամանակ եւս փորձած են արդարացնել իրենք-զիրենք՝ պնդելով, որ մեղաւորը հայերն են: Հոլոքոստէն ետք, Հայոց Ցեղասպանութեան հարցը ամենաշատը ուսումնասիրուած է աշխարհի մէջ: Հազարաւոր մենագրութիւններ կան այդ մասին: Ես յաւակնութիւն չունիմ ըսելու, թէ այս կամ այն յօդուածը, տեղեկութիւնը որքանով նոր է. ատիկա պէտք է որոշեն պատմաբանները եւ մասնագէտները: Կարեւորը այն է, որ ներկայացուած են հարիւրաւոր յօդուածներ, որոնց վերնագիրները, խորագիրները միայն կը բացատրեն, որ իսկապէս մտադրուած ցեղասպանութիւն տեղի ունեցած է», ընդգծած է Արա Քեթիբեան:

Մխիթարեան միաբանութեան միաբան Հայր Վահան ծայրագոյն վարդապետ Օհանեան ըսած է, որ իր գործընկերոջ հետ շատոնց ծանօթ է: Ան մօտաւորապէս 9 տարի միաբանութեան մէջ աշակերտ եղած է:

«Արան քաջալերեց զիս այս աշխատանքը սկսելու համար: Իմանալով անոր կարողութիւնները եւ լրջութիւնը, անցեալի ուսումնասիրութեան վերաբերեալ ունեցած  պատրաստակամութիւնը՝ վստահութիւն ունեցայ: Ընթացքին, հանդիպեցայ Վիգէն Բաբկէնեանին, որ ինծի տրամադրեց յօդուածներու ամբողջ հաւաքածոյ մը: Իր ունեցածը  սիրայօժար նուիրեց մեզի, ես ալ որոշ բաներ ունէի ու սկսայ կուտակուած նիւթին հիման վրայ աշխատելու: Յօդուածները հաւաքելը շատ դժուար աշխատանք էր: Մենք սկսանք մէկ-մէկ պրպտել: Ունեցանք շատ դժուարութիւններ. որոշ յօդուածներ ստիպուած եղանք նաեւ գնելու: Բանալի բառերով գտանք հայերու մասին գրուած բոլոր հրապարակումները», պատմած է ան:

Հաւաքածոյի հրատարակութեան աջակցած է «Վիւասել-ՄԹՍ» ընկերութիւնը, որու հիմնադիր, գլխաւոր տնօրէն Ռալֆ Երիկեան ըսած է՝ գիրքը աշխարհին ցոյց կու տայ, որ մենք ունինք համապատասխան փաստաթուղթեր, որոնք մեր վկաներն են, դեսպանները եւ կը ներկայացնեն, թէ մենք ինչ ճամբայ անցած ենք, ինչ դաժանութիւններու, վայրագութիւններու ենթարկուած:

«Այս գիրքը ընթերցելով կարելի կը դառնայ, որ գիտակից մարդը, քաղաքակիրթ աշխարհը հասկնայ, որ պէտք է սթափիլ եւ թոյլ չտալ, որ նման վայրագութիւններ տեղի ունենան այլ ազգերու հետ», շեշտած է Երիկեան:

Երկհատորեայ ժողովածուները կազմելու գործին համար, Վահան ծայրագոյն վարդապետ Օհանեան եւ գրականագէտ, աւստրալահայ հետազօտող Արա Քեթիբեան պարգեւատրուած են Հայոց Ցեղասպանութեան թանգարան-հիմնարկ հիմնադրամի «Աւրորա Մարտիկանեան» յուշամետալով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top