Եկեղեցին Վերջին Վայրկեանին Նիւթական Կարգադրութեամբ Մը Փրկեց ՀԲԸՄի Թորոնթոյի Կեդրոնը

1227haroutsassounian

ՅԱՐՈՒԹ ՍԱՍՈՒՆԵԱՆ

 

1227haroutsassounianԱյս շաբթուան յօդուածս կը վերաբերի Գանատայի Թորոնթօ քաղաքի հայկական համայնքին մէջ յայտնուած լուրջ վէճի մը, որ, բարեբախտաբար, ներկայիս լուծուած է:

30 Հոկտեմբեր 2018ին, ՀԲԸՄի վարչութիւնը հանդէս եկաւ յայտարարութեամբ մը՝ ազդարարելով, որ այլեւս չի կրնար վճարել իր կեդրոնի գործառնական ծախսերը, որոնք «ահաւոր դարձած են»:

ՀԲԸՄի վարչութիւնը աւելի ուշ յայտարարեց, որ Centennial College-էն կեդրոնը գնելու առաջարկ ստացած է: Այնուհետեւ յայտնի դարձաւ, որ կեդրոնին գինը 8.5 միլիոն գանատական տոլար է: Կեդրոնական վարչութիւնը հաւանութիւն տուած էր ՀԲԸՄի Նիւ Եորքի կեդրոնը ծախելու որոշումին: Նշենք, որ կեդրոնը կառուցուած է 1981ին։

ՀԲԸՄի կեդրոնը վաճառելու հարցը անմիջական ազդեցութիւն գործած է շէնքի դրացնութեամբ գտնուող Սուրբ Երրորդութիւն եկեղեցւոյ գործունէութեան վրայ. եկեղեցւոյ անդամները միշտ օգտուած են, ինչպէս՝ ինքնաշարժի կանգառէն, նոյնպէս ալ ՀԲԸՄի կեդրոնի կառոյցներէն: Աւելին, եկեղեցին ՀԲԸՄի շէնքը ձեռք բերելու հարցով ունէր «առաջին մերժման իրաւունք», ինչ որ կը նշանակէ, թէ երբ եկեղեցին որոշէ եւ կարենայ գնել կեդրոնը, ապա զայն գնելու նախապատուութեան իրաւունքի ուժով կրնար այդ մէկը կատարել՝ մինչեւ Centennial College-ին վաճառուիլը եւ նոյն պայմաններով:

Նոյեմբեր 10, 2018ին, ՀԲԸՄի վարչութիւնը հրապարակեց երկրորդ յայտարարութիւն մը՝ իր ափսոսանքը յայտնելով այն մասին, թէ «որոշ մարդիկ կը գերադասեն սխալ որակել վերջին յայտարարութիւնը»՝ ՀԲԸՄի կեդրոնը Centennial College-ին ծախելու կարելիութեան վերաբերեալ:

ՀԲԸՄի վարչութիւնը յայտարարեց, որ «թէեւ հասկնալի է, թէ ոմանց համար հաճելի չի թուիր այս որոշումը, սակայն ոչ արդար է եւ ոչ ալ շինիչ՝ այս հարցին հակազդել այնպիսի տեղեկատուութեամբ մը, որ կը միտի շփոթի մատնել Թորոնթոյի համայնքը, յատկապէս անոնք, որոնք կապուած են եկեղեցւոյ»:

Ի պատասխան՝ Գանատայի թեմը եւ Սուրբ Երրորդութիւն հայկական եկեղեցին 19 Նոյեմբեր 2018ին հանդէս եկան միասնական յայտարարութեամբ՝ ՀԲԸՄի երկու յայտարարութիւնները որակելով «ինքնարդարացման ապարդիւն փորձեր»:

«Աւելին, այդ յայտարարութիւնները կը բովանդակէին մեկնաբանութիւններ, որոնք նպատակ ունէին մոլորութեան մէջ ձգել եւ բաժնել մեր համայնքը: Ամէն պարագայի, անոնք ձախողեցան: Ակնյայտ է, որ այս յայտարարութիւնները զուրկ են առողջ համայնքին նկատմամբ անկեղծ զգացումներէ եւ ոչ ժողովրդավարական, թելադրուած որոշումներու արտացոլումն են՝ առանց թափանցիկութեան», կ՛ըսուի յայտարարութեան մէջ:

Մամուլի վիճելի հաղորդագրութիւններէն շփոթած, Թորոնթոյի հայ համայնքը փորձեց պարզել, թէ ի՛նչ կը կատարուի փակ դռներու ետին: Յստակ տեղեկատուութեան բացակայութիւնը բազմաթիւ ըսի-ըսաւներու տեղիք տուաւ: Մտահոգութիւն կար, որ Թորոնթոյի հայերը պիտի կորսնցնեն իրենց հիմնական կեդրոններէն մէկը: Ըսի-ըսաւներու կրակին իւղ կը լեցուէր ՀԲԸՄի նախորդ որոշումներով՝ Կիպրոսի Մելգոնեան կրթական հաստատութիւնը փակելու մասին, թէեւ ՀԲԸՄի Թորոնթոյի վարչութիւնը յայտարարած էր, որ իր կեդրոնի վաճառքէն ետք ինք կը տեղափոխուի համայնքին համար նոր, աւելի կեդրոնացուած վայր մը Թորոնթոյի մէջ:

Միւս արտասովոր իրավիճակը հանրային վէճն էր ՀԲԸՄի եւ թեմին միջեւ, որոնք ամբողջ աշխարհի մէջ սովորաբար կը վայելեն լաւագոյն յարաբերութիւնները: Աւելին. Ամենայն Հայոց կաթողիկոսը, Հայ առաքելական եկեղեցւոյ հոգեւոր առաջնորդ Գարեգին Բ., նաեւ ՀԲԸՄի Կեդրոնական խորհուրդի պատուաւոր անդամ է: Կաթողիկոսը կրնար դիւրութեամբ միջամտել երկու հաստատութիւններուն միջեւ բախումին, եթէ անհրաժեշտ նկատուէր:

11 Նոյեմբերի 2018ին, Սուրբ Երրորդութիւն հայկական եկեղեցին գումարեց անդամներու յատուկ խորհրդակցութիւն՝ առաջնորդ Աբգար եպս. Յովակիմեանի նախագահութեամբ: Ժողովը որոշում տուաւ՝ պարտաւորուելով հաւաքել անհրաժեշտ 8.5 միլիոն գանատական տոլարը երեք ամիսէն նուազ ժամանակի մը մէջ, եւ մինչեւ 29 Յունուար 2019 ՀԲԸՄի կեդրոնը ձեռք բերելու համար: Այդ նպատակով՝ կազմուեցաւ լիազօրուած յանձնախումբ մը: Եկեղեցին յայտարարեց, որ «Աբգար եպիսկոպոս Յովակիմեան՝ իբրեւ նեցուկ դրամահաւաքի արշաւին, հանդէս եկաւ տպաւորիչ եւ օրինակելի արարքով՝ նուիրելով իր եպիսկոպոսական ոսկեզօծ ասան (գաւազանը) եւ փանաքէն (կուրծքի զարդը)՝ որպէս դրամահաւաքի առաջին ներդրում», յայտարարեց եկեղեցին:

Ի զարմանս բոլորին՝ 29 Յունուար 2019ին, Սուրբ Երրորդութիւն հայկական եկեղեցին յայտարարութիւն մը տարածեց՝ հաստատելով, որ թեմը «օգտագործած է առաջին մերժման իր իրաւունքը՝ ձեռք բերելու ՀԲԸՄի գոյքը»: Այս անսպասելի եւ հրաշալի զարգացումը հարցերու նոր շրջանակ մը յառաջ բերաւ, թէ ինչպէ՛ս եկեղեցին յաջողեցաւ նման կարճ ժամկէտի մը մէջ հաւաքել 8.5 միլիոն գանատական տոլարի մեծ գումարը, գոյքը գնելու համար…: Որոշ մանրամասնութիւններու վերաբերեալ եկեղեցւոյ ուղղուած հարցումները մնացին անպատասխան՝ բան մը, որ յառաջացուց նոր ըսի-ըսաւներ՝ ՀԲԸՄի կեդրոնի ձեռք բերման նիւթական իրական աղբիւրին մասին։

Եկեղեցւոյ եւ անոր լիազօրուած յանձնախումբին ուղղուած քանի մը ելեկտրոնային նամակներէ եւ հեռաձայնային զանգերէ ետք, յանձնախումբի անդամ Արա Պոյաճեան բաւական բարի գտնուեցաւ պատասխանելու այդ հարցումներուն: Սկիզբը Պոյաճեան գրեց ինծի՝ ըսելով. «Թորոնթոյի մէջ Սուրբ Երրորդութիւն եկեղեցւոյ դրացնութեամբ գտնուող ՀԲԸՄի գոյքը ձեռք բերուած եւ արձանագրուած է թեմին կողմէ: 90 օրուան ընթացքին թեմը ապահոված է անհրաժեշտ նիւթականը, օգտագործած առաջին մերժման իր իրաւունքը եւ 28 Փետրուար 2019ին աւարտած՝ 8.5 միլիոն (գանատական) տոլարի գործարքը»:

0322agbu

Լրացուցիչ մանրամասնութիւններ խնդրելէ ետք, Պոյաճեան ինծի տրամադրեց հետեւեալ տեղեկութիւնը.

«1. Թեմը կրցաւ ապահովել ծրագիրի հովանաւորութիւնը, ինչ որ, անշուշտ, կը նշանակէ, որ անիկա ստացած է վարկ, ձեռք բերած է ՀԲԸՄի գոյքը եւ զայն արձանագրած թեմին անունով:

  1. Վարկը երաշխաւորուած է 5 տարուան գրաւաթուղթով (mortgage)՝ օգտագործելով միայն գրաւի դրուող գոյքը: Հովանաւորողները ներկայիս կը փափաքին անանուն մնալ, եւ թեմը պարտաւոր է յարգել անոնց փափաքը:
  2. Թեմի սեփական իրագործելիութեան ուսումնասիրութիւնը եւ դրամական հոսքերու կանխատեսումները կը վկայեն, որ յառաջիկայ հինգ տարիներուն ընթացքին թեմը հիմնականօրէն վարձու պիտի տայ տարածքները եւ պիտի կարենայ պահել այդ գոյքը, ներառեալ տոկոսներու վճարումը: Այս մէկը կ՛ընդգրկէ եկամուտի որեւէ կորուստ՝ ՀԲԸՄին իրաւունք տալու պատճառով, որ տասնմէկ ամսուան համար ձրիաբար շարունակէ իր գործառնութիւնը եւ գործունէութիւնը շէնքին մէջ, ՀԲԸՄի համար բացարձակապէս անվճար:
  3. Վարկի հիմնական գումարը վճարելի է հինգ տարիէն: Ասիկա բաւարար ժամանակ է թեմին համար՝ ռազմավարութեան եւ ծրագրաւորման առումով՝ իրականացնելու խիստ անհրաժեշտ ծրագիր, որմէ մեծապէս պիտի օգտուի Թորոնթոյի համայնքը»:

Յաջորդ նամակին մէջ Պոյաճեան բացատրեց, որ վերոնշեալ երրորդ կէտին մէջ «հիմնական վարձու տալ» եզրը կը նշանակէ. «Վարձակալը կը վարձէ վարձակալական ամբողջ տարածքը վարձատուէն եւ վարձավճար կը վճարէ անոր կամ, տուեալ պարագային՝ թեմին, իբրեւ կառոյցի սեփականատէր: Հովանաւոր(ներ)ու ապահովման զուգահեռ, թեմը յաջողած է գտնել, համաձայնութեան գալ եւ ստորագրել «հիմնական վարձակալութիւն» պատուարժան վարձակալի հետ մինչեւ գնումը (առաջին մերժման իրաւունքի 90օրեայ ժամկէտով), հնարաւորութիւն տալով թեմին՝ յաջորդ 5 տարիներուն փակել կառոյցին ծախսերը, ներառեալ վարկի ջնջման տոկոսները: Ասիկա հաստատուած է իրագործելիութեան ուսումնասիրութեամբ եւ դրամական հոսքերու կանխատեսումներով»:

Պոյաճեանի պատասխանները կը յստակացնեն, որ Սուրբ Երրորդութիւն հայկական եկեղեցին 5 տարի ժամկէտով միայն տոկոսներ պիտի վճարէ 8.5 միլիոն վարկին համար, այնուհետեւ ամբողջ վարկին գումարը ենթակայ պիտի ըլլայ ջնջումի եւ պէտք է կա՛մ վճարուի, կա՛մ նիւթապէս վերահովանաւորուի:

Ամէնէն կարեւորը այն է, որ եկեղեցւոյ առաջնորդները յաջողեցան կարճ ժամկէտի մէջ դրամական հրաշք գործել եւ փրկել ՀԲԸՄի կեդրոնը, ինչ որ մեծ նուաճում է Թորոնթոյի հայ համայնքին համար…

Վերջապէս, խելամտութիւն է՝ աշխարհի բոլոր հայկական կազմակերպութիւններուն համար կարելի եղածին չափ թափանցիկ ըլլալը համայնքային ունեցուածքի եւ խնդիրներու վերաբերող գործարքներու մէջ՝ անտեղի ըսի-ըսաւներէ եւ վստահութեան կորուստէ խուսափելու համար։

 

ՅԱՐՈՒԹ ՍԱՍՈԻՆԵԱՆ

«Քալիֆորնիա Քուրիըր» թերթի հրատարակիչ եւ խմբագիր

 

Արեւելահայերէնի թարգմանեց՝

ՌՈՒԶԱՆՆԱ ԱՒԱԳԵԱՆ

Արեւմտահայերէնի վերածեց՝

ՍԵԴԱ ԳՐԻԳՈՐԵԱՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top