Ֆրանսական Կառավարութիւնը Լիբանանի Մեսրոպեան Վարժարանին Շնորհեց «Label CELF»

0000MESROBIAN

 

18 Մարտին, եօթը տարուան համատեղ աշխատանքին իբրեւ արդիւնք՝ ֆրանսական պետութիւնը ներկայացնող Institut Francais-ը Հայ կաթողիկէ Մեսրոպեան բարձրագոյն վարժարանին շնորհեց «Label CELF»ը (Certification des Etablissements en Langue Francaise), որ հեղինակաւոր վկայագիրն է վարժարանին մէջ ֆրանսերէնի ուսուցման գերազանց որակին ու մակարդակին:

«Յովհաննէս Պօղոսեան» սրահին մէջ պատմական նշանակութեան հանդիսութեան մը ընթացքին «Label CELF»ը Մեսրոպեան վարժարանին յանձնեց Լիբանանի մօտ Ֆրանսայի Հանրապետութեան դեսպան Պրիւնօ Ֆուշէ:

Հանդիսութեան, որուն նախագահութիւնը ստանձնած էր Հայ կաթողիկէ Գրիգոր Պետրոս Ի. կաթողիկոս պատրիարքը, ներկայ էին Լիբանանի մօտ Հայաստանի Հանրապետութեան դեսպանը ներկայ եւ նախկին նախարարներ, ներկայ եւ նախկին երեսփոխաններ, հայկական երեք յարանուանութեանց եկեղեցական եւ աշխարհական դասի պատասխանատու ներկայացուցիչներ, Պուրճ Համուտի եւ Այնճարի քաղաքապետները, Լիբանանի կրթութեան նախարարութեան ներկայացուցիչը, լիբանանահայ վարժարաններու տնօրէններ, մշակութային, մարզական, բարեսիրական եւ հայրենակցական միութիւններու ներկայացուցիչներ, ինչպէս նաեւ վարժարանի բարձր կարգի աշակերտներ ու ծնողներ:

Մեսրոպեանի «Ծիծեռնակ» երգչախումբին կատարողութեամբ Լիբանանի, Հայաստանի եւ Ֆրանսայի քայլերգներու յոտնկայս ունկնդրութենէն ետք, բացման խօսքը արտասանեց վարժարանի ֆրանսերէնի համակարգող եւ երկրորդական բաժինի կրթական պատասխանատու Հասնա Ապու Էլիաս:

Ապա խօսք առաւ վարժարանի տնօրէն Կրեկուար Գալուստ, որ նախ ըսաւ, թէ «Label CELF»ի ստանձնումը գոհունակութեան մեծ եւ խոր ապրում մը կը պարգեւէ Մեսրոպեանի ընտանիքին, «քանզի յաջողեցանք ստանալ վաւերացումը ֆրանսերէնի ուսուցման այն որակին, որ անհրաժեշտ կը նկատենք մեր աշակերտներու ապագային համար՝ կրթութեան, զարգացումի եւ կեանքի յաջողութիւններու ճամբաներուն վրայ»: Ան շնորհակալութիւն յայտնեց Institut Francais-ի ներկայացուցիչ Քամիլա Քաաքուրին, Հասնա Ապու Էլիասին եւ Մեսրոպեան վարժարանի ուսուցիչներուն, որոնք անմիջական կերտիչները հանդիսացան այս նուաճումին:

Կ. Գալուստ յայտնեց, որ զարգացման յաջորդ քայլին համար Մեսրոպեանը արդէն իսկ Institut Francais-ին հետ գործակցաբար սկսած է աշխատանքի՝ ֆրանսական կրթութեան ծրագիրը որդեգրելուն եւ «Label Franc-Education»ը ստանալու ուղղութեամբ: «Ապագային մենք նպատակ ունինք դառնալու Homologue հաստատութիւն: Յառաջիկայ տարիներուն համար սա մեր հաստատութեան գլխաւոր մարտահրաւէրն է: Կը հաւատանք, որ Մեսրոպեանը կրնանք հասցնել տեղ մը, որ ցուցանիշ դառնայ անոր կարեւորութեան եւ իւրայատկութեան՝ Լիբանանի կրթական համակարգին մէջ», ըսաւ Մեսրոպեանի տնօրէնը՝ աւելցնելով. «Կը վստահեցնեմ, որ այս օրը պիտի արձանագրուի իբրեւ մեր վարժարանի 80ամեայ տարեգրութեան ամէնէն փայլուն էջերէն մէկը, ինչպէս իբրեւ եզրափակում՝ մեծ նուաճումի մը, նոյնպէս եւ իբրեւ սկիզբ՝ հետագայ յաջողութիւններուն, որոնց ընդառաջ պիտի երթանք՝ միշտ մեր աշակերտներուն փայլուն ապագային ի խնդիր»:

Ֆրանսայի դեսպան Պրիւնօ Ֆուշէ նախ շնորհակալութիւն յայտնեց Մեսրոպեանի մէջ ջերմ ընդունելութեան համար եւ շնորհաւորեց վարժարանը՝ այս կարեւոր նուաճումին համար: Ան դիտել տուաւ, թէ հազուադէպ է, որ Ֆրանսայի դեսպան մը անձամբ մասնակցի նման հանդիսութեան, ինչպիսին այսօրուանն էր: «Մեսրոպեանի համար բացառութիւն մը կատարեցի՝ նկատի ունենալով այս հաստատութեան կշիռը Լիբանանի մէջ, առաւել այն փաստը, որ Մեսրոպեանը առաջին հայկական պատկանելիութեան վարժարանն է, որ կը ստանայ «Label CELF»ը եւ վերջապէս, որպէսզի ձեր բոլորին հետ կիսեմ վարժարանի հիմնադրութեան 80ամեակի տօնական ապրումները», ըսաւ դեսպանը:

Պրիւնօ Ֆուշէ դիտել տուաւ, որ «Label CELF»ի իմաստը կը կայանայ երեք սկզբունքներու մէջ. «Առաջին՝ անիկա վկայագիրն է կրթական հաստատութեան մը մէջ ֆրանսերէնի գերազանց ուսուցման, երկրորդ՝ կը նշէ ֆրանսական կրթական մարմիններու կողմէ հետեւողական ընկերակցութիւն մը՝ աշակերտներու յաւելեալ զարգացումին եւ երրորդ՝ անդամակցութիւնն է կրթական ցանցի մը, որուն մաս կազմող հաստատութիւնները կը ձգտին ֆրանսերէնի հետ միասին՝ հասնիլ մանկավարժական գործի գերազանցութեան: Մեսրոպեանին այս վկայագիրը շնորհեցինք, որովհետեւ անոր ուսուցիչները գերազանց արդիւնքներ հաստատեցին DELF-ի նախապատրաստութեան քննութիւններուն, ինչպէս անոր աշակերտները՝ 98 առ հարիւր յաջողութեամբ. առաւել, մեծապէս տպաւորիչ են լիբանանեան պետական քննութիւններուն այս վարժարանին արձանագրած յաջողութիւնները», ըսաւ Ֆրանսայի դեսպանը։

Գաբրիէլ Ծ. վրդ. Մուրատեան իր խօսքին մէջ ըսաւ, որ բազմալեզուութիւնը եւ տարբեր մշակոյթներու հետ համարկումը հայկական նկարագիր մըն է, որ կազմաւորուած է պատմական իրադարձութիւններու հոլովոյթին մէջ: Այդուհանդերձ, շեշտեց ան, 1915ի Ցեղասպանութիւնը վերապրած հայ ժողովուրդը լաւապէս կը գիտակցի մայրենի լեզուի կարեւորութեան՝ իբրեւ գլխաւոր հիմքը իր ինքնութեան:

Հանդիսութեան ընթացքին տեղի ունեցաւ «Label CELF»ի պաշտօնական յանձնումը՝ Մեսրոպեանին՝ ձեռամբ Ֆրանսայի դեսպան Պրիւնօ Ֆուշէի, որ այս առիթով նաեւ վարժարանի տնօրէնին յանձնեց դեսպանատան յատուկ յուշամետալը՝ 88/100 թիւով, ինչպէս նաեւ հրատարակութիւն մը՝ իբրեւ նուէր: Կրեկուար Գալուստ փոխադարձաբար դեսպանին յանձնեց 80ամեակը խորհրդանշող վարժարանի յատուկ յուշանուէրը:

Հանդիսութիւնը փակուեցաւ Ազնաւուրի «Քեզի համար, Հայաստա՛ն» երգով՝ «Ծիծեռնակ» երգչախումբի կատարողութեամբ, իսկ պատմական օրը եզրափակուեցաւ Ֆրանսայի դեսպանին եւ հիւրերու վարժարան կատարած շրջագայութեամբ, որուն ընթացքին անոնք ծանօթացան տարբեր բաժանմունքներուն եւ տարուած գործունէութեան։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top