Յովհաննէս Թումանեանի Ծննդեան 150 Եւ Վահան Թէքէեանի Ծննդեան 140 Ամեակները

0321toumanian

ԽԱՉԻԿ ՃԱՆՈՅԵԱՆ

 

0321toumanianՀինգշաբթի, 21 Մարտին, երեկոյեան ժամը 7էն սկսեալ, Արեւմտեան թեմի «Գալայճեան» սրահին մէջ (3325 No. Glenoaks Blvd., Burbank) տեղի պիտի ունենայ գրական բացառիկ երեկոյ մը, չըսելու համար հայ գրականութեան անմոռանալի հրավառութիւն մը, նուիրուած՝ հայ գրականութեան անթառամ փառքերէն, անմահներ՝ Ամենայն հայոց բանաստեղծ Յովհաննէս Թումանեանի ծննդեան 150ամեակին եւ Հայ բանաստեղծութեան իշխան Վահան Թէքէեանի ծննդեան 140ամեակին:

Հայ գրականութեան երկնակամարին վրայ ճառագայթող այս երկու տիտանները ոչ միայն հայ ժողովուրդի, այլ՝ ամենայն համեստութեամբ կարելի է ըսել, միջազգային գրականութեան անդաստանին մէջ իրենց ուրոյն տեղը գրաւած են:

Ձեռնարկը իր օրհնաբեր ներկայութեամբ պիտի հովանաւորէ թեմիս գրասէր առաջնորդ Յովնան արք. Տէրտէրեան, իսկ իր ներկայութեամբ ձեռնարկը պիտի պատուէ Լոս Անճելըսի մօտ Հայստանի գլխաւոր հիւպատոս դոկտ. Արմէն Բայբուրդեան:

Նոյն օրը, կէսօրէն ետք ժամը 3-8, նոյն վայրին մէջ պիտի ցուցադրուին մեծատաղանդ նկարիչ Շմաւոն Շմաւոնեանի բարձրորակ նկարները:

Այս աննախընթաց գրական ձեռնարկին համար, Հայաստանէն հրաւիրուած են հայրենի գրականագիտութեան վաստակաշատ բանասէրներ՝ դոկտ. փրոֆ. Սամուէլ Պարգեւի Մուրատեան, որ պիտի զեկուցէ Յովհաննէս Թումանեանի մասին եւ դոկտ. փրոֆ. Արծրուն Աբգարի Աւագեան, որ պիտի ներկայացնէ Վահան Թէքէեանը:

0321tekeyanԱյս երկու գրագէտ-մանկավարժները, Երեւանի պետական համալսարանի գրականագիտական ամպիոններու ղեկավարներ են: Անոնք իրենց գրական, բանասիրական եւ գիտական յօդուածներուն, իրենց բանասիրական ծառայութիւններուն համար արժանացած են բազմաթիւ եւ բազմաբնոյթ շքանշաններու ու գնահատականներու: Այս պատուական բանախօսները մեր ժողովուրդին ու հայրենիքին պարծանքն են:

Լոս Անճելըսի հայութիւնը անցեալին առիթը ունեցած է լսելու այս պատուական դասախօսներուն ելոյթները մեր քաղաքին մէջ:

Հինգշաբթի, 21 Մարտին, անգամ մը եւս առիթը պիտի ունենանք մեծագոյն հաճոյքով վայելելու Թումանեանի եւ Թէքէեանի գոհար բանաստեղծութիւնները:

Այդ երեկոյ պիտի գործադրուի գեղարուեստական պատշաճ յայտագիր մը:

Մուտքը ազատ է:

Սիրով հրաւիրուած է հայ ժողովուրդը այս խիստ շահեկան եւ անմոռանալի դասախօսութեան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top