Մերտինեան Վարժարանի Վարչական Գրասենեակը Կ՛անուանուի Տոքթ. Միսաք Ապտուլեանի Անունով

Ընտանիքի անդամներ եւ բարեկամներ Մերտինեան վարժարանի վարչական գրասենեակին՝ տոքթ. Միսաք Ապտուլեանի անունով անուանակոչութեան արարողութեան ընթացքին
Ընտանիքի անդամներ եւ բարեկամներ Մերտինեան վարժարանի վարչական գրասենեակին՝ տոքթ. Միսաք Ապտուլեանի անունով անուանակոչութեան արարողութեան ընթացքին

Ընտանիքի անդամներ եւ բարեկամներ Մերտինեան վարժարանի վարչական գրասենեակին՝ տոքթ. Միսաք Ապտուլեանի անունով անուանակոչութեան արարողութեան ընթացքին

ՇԸՐՄԸՆ ՕՔՍ.- Շաբաթ, 9 Մարտի առաւօտեան, երջանկայիշատակ տոքթ. Միսաք Ապտուլեանի կինը՝ Հուրիկը եւ ընտանիքի անդամները մէկտեղ հաւաքուեցան Շարլոթ եւ Էլիզ Մերտինեան հայ աւետարանական վարժարանին մէջ, վարչական գրասենեակի պատին զետեղուած՝ տոքթ. Ապտուլեանի ի յիշատակ զետեղուած նշանատախտակի բացման արարողութեան: Ներկայ էին նաեւ Ապտուլեան ընտանիքի այլ անդամներ, բարեկամներ, վարժարանի Հոգաբարձական կազմի անդամներ, ինչպէս նաեւ դպրոցի տնօրէնուհին՝ Լինա Արսլանեան:

Տոքթ. Միսաքը իր եղբայրներուն՝ տոքթ. Ճեքի, տոքթ. Դանիէլի եւ տոքթ. Հրայրի հետ մէկտեղ եղած են Մերտինեան վարժարանի հիմնադիրները: Տոքթ. Միսաք գտած էր դպրոցի ներկայ տարածքը եւ երկար տարիներ ծառայած էր վարժարանին՝ անոր նեցուկ կանգնելով նիւթապէս, ֆիզիքապէս եւ որպէս անդամ անոր Հոգաբարձական կազմին:

Untitled

Հուրիկ Ապտուլեան իր ամուսնոյն՝ տոքթ. Միսաք Ապտուլեանի յիշատակին զետեղուած նշանատախտակին դիմաց

Լոս Անճելըսի Հայ միացեալ աւետարանական եկեղեցւոյ հովիւ վեր. Հենրիկ Շահնազարեան առաջնորդեց ներկաները աղօթքով: Հոգաբարձական կազմի ատենապետ դոկտ. Վահէ Նալպանտեան պատմեց տոքթ. Միսաքի կեանքէն հաճելի դրուագներ: Խօսք առաւ նաեւ Հոգաբարձական կազմի անդամ եւ դպրոցի երկար տարիներու նուիրեալ Հերըլտ Տէմիրճեան՝ յիշելով տոքթ. Ապտուլեանի անսակարկ նուիրումը վարժարանին: Հոգաբարձական կազմի, ինչպէս նաեւ վարժարանի Տիկնանց օժանդակ մարմինի անդամ տիկին Ժուլիէթ Ապտուլեան անդրադարձաւ տոքթ. Միսաքի թողած աւանդին:

Տոքթ. Միսաքի որդին՝ տոքթ. Մայքըլ Ապտուլեան յիշեց, թէ ինչպէ՛ս իր հայրը, հասակ առնելով եւ դաստիարակուելով Քեսապ հայաբնակ գիւղին մէջ, Հայ աւետարանական ընտանիքի յարկին տակ կերտած էր իր տարիներու սէրը եւ նուիրումը կրթութեան եւ ծառայութեան հանդէպ: Տոքթ. Մայքըլի դուստրերը՝ Ալինը եւ Ալեքսիան, սիրով խօսեցան իրենց «պեպօ»ին մասին, եւ թէ ինչպէ՛ս հպարտութեամբ կը կրեն իրենց մեծ հօր անունը:

Յետ բացման արարողութեան, հիւրասիրութիւն տեղի ունեցաւ ուսուցչական կազմի սրահին մէջ, ուր ներկաները շարունակեցին իրար հետ կիսուիլ բարի յուշեր տոքթ. Միսաքի կեանքէն՝ անդրադառնալով դպրոցին հանդէպ ունեցած անոր սիրոյն եւ նուիրումին մասին:

Նշենք, որ Մերտինեանը հիմնադրուած է 1982ին եւ միակ Հայ աւետարանական վարժարանն է Միացեալ Նահանգներու մէջ: Դպրոցը կ՛ընդգրկէ լայնածաւալ ծրագիր, որուն նպատակն է ջամբել գերազանց կրթական ծրագիր, բարձր բարոյական արժէքներ եւ հայ քրիստոնէական դաստիարակութիւն: Դպրոցը կը ձգտի ստեղծել անվտանգ եւ սնուցող միջավայր մը, ուր իւրաքանչիւր աշակերտ կը ստանայ անհատական ուշադրութիւն՝ դառնալու յաջող ու պատասխանատու անհատ:

0314abdoulian1

Տոքթ. Միսաք Ապտուլեանի յիշատակի նշանատախտակին դիմաց կանգնած ընտանիքի անդամներ՝ Լեֆ Եւ Մարի Օլսըն, Հուրիկ Ապտուլեան, Ալին եւ Ալեքսիա Ապտուլեան, տոքթորներ Սիլվիա եւ Մայքըլ Ապտուլեան

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

One Comment;

  1. Mardig Madenjian said:

    Տիկին Հուրի Ապտուլեան, դուք սիրեցեալ եւ սիրուած ամուսին մը կորսնցուցիք, եւ հայ ազգը եւ Լոս Անճելըսի գաղութը ազգասէր եւ նուիրեալ անձնաւորութիւն մը կորսնցուց յանձին ձեր ամուսնուն ՝ Տոքթոր Միսաք Ապտուլեանին, որուն հետ առաջին հանդիպումս եղած էր 1988-ին Սումկայթի ժարդերուն ժամանակ:
    Աստուած հոգին լուսաւորէ եւ ձեզի ալ Տէրունական մխիթարութիւն պարգեւէ: Յիշատակը անմար մնայ:

*

Top