Հակասական Լուրեր՝ Թուրքիոյ Յանձնուելիք Ամերիկեան «էֆ.35»ներուն Մասին

0322Lockheed Martin Turkey F-35

0322Lockheed Martin Turkey F-35

ՈՒԱՇԻՆԿԹԸՆ, «Ռոյթըրզ».- Միացեալ Նահանգներու պաշտպանութեան նախարարութենէն բարձրաստիճան պաշտօնատար մը 21 Մարտին տեղեկացուց, թէ Ռուսիայէն «Էս. 400» հակահրթիռային համալիրներ գնելու Անգարայի որոշումին հետեւանքով, շատ հաւանական է, որ ամերիկեան արդիական «էֆ. 35» ռազմական օդանաւերը Թուրքիոյ յանձնելու գործընթացը սառեցուի, որպէսզի Անգարա գիտակցի, թէ Ուաշինկթըն լրջութեամբ կը մօտենայ այս հարցին։

Իր կարգին, պաշտպանութեան նախարարի օգնականի պաշտօնակատար Քեթի Ուիլպարկըր յայտնեց, թէ հիմնականին մէջ «Էս. 400»ներն եւ «էֆ.35»ը արդիական համակարգիչներ են եւ «տրամաբանական չէ համակարգիչդ կապել թշնամիին համակարգիչին հետ»։

Մէկ օր առաջ, թրքական մամուլը հաղորդեց, թէ Միացեալ Նահանգներու պաշտպանութեան նախարարութեան բանբեր Ճօ Տելլա Վետովա «Անատոլու» լրատու գործակալութեան հարցումներուն պատասխանելով՝ յայտնած էր, թէ առաջին երկու «էֆ. 35» ռազմական օդանաւերը Թուրքիոյ Նոյեմբերին յանձնելու աշխատանքերը կը շարունակուին:

Իր կարգին, ՆԱԹՕի Ռազմական յանձնախումբի նախագահ եւ օդուժի հրամանատար սըր Սթիուըրթ Փիչ նշեց, թէ դաշինքին պարտականութեան մէջ չի մտներ Թուրքիոյ խորհուրդ տալ, թէ ո՛ր զէնքը գնէ կամ չգնէ: «Եուրոնիուզ»ի թրքական ծառայութեան համաձայն՝ Փիչ «Տիֆենս Նիուզ» թերթին հետ զրոյցի մը ընթացքին յայտնած էր, որ ՆԱԹՕի հրամանատարութիւնը պիտի չմիջամտէ Թուրքիոյ կողմէ Ռուսիայէն «Էս. 400»ներ գնելու աշխատանքին:

«Թուրքիոյ եւ ՆԱԹՕի համերաշխութիւնը շատ կարեւոր է: Թուրքիա մեծ ներդրում կ՛ունենայ ՆԱԹՕի ռազմափորձերուն եւ գործողութիւններուն մէջ: Ան-շուշտ ատոր դիմաց, ՆԱԹՕ կարեւոր աջակցութիւն կը ցուցաբերէ Թուրքիոյ», նշեց Փիչ՝ աւելցնելով. «Հակահրթիռային համալիրներու  այս գնումը ազգային հարց է, զէնքի նախընտրութիւնը ՆԱԹՕի գործը չէ»:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top