Աւստրալիոյ Եւ Նիւ Զելանտայի Քննադատութիւններէն Ետք Էրտողանի Խօսքերը Վերցուեցան Անոր Կայքէն  

0322NZ
0322NZ

Ուինսթըն Փիթըրզ

ՊՈԼԻՍ, ԹԵՀՐԱՆ, «Մարմարա», «Ալիք».- Աւստրալիոյ վարչապետ Սքաթ Մորիսըն 20 Մարտին խստօրէն քննադատեց Թուրքիոյ նախագահ Էրտողանի այն յայտարարութիւնները, որոնք կատարուած էին Նիւ Զելանտայի երկու մզկիթներուն մէջ պատահած ահաբեկչական գործողութիւններուն վերաբերեալ։ Ան «մեծապէս վիրաւորական» եւ «շատ անխոհեմ» որակեց Էրտողանի խօսքերը:

Էրտողան Կալիփոլիի ճակատամարտի 104րդ ամեակին նուիրուած հաւաքի մը ընթացքին ¤այդ ճակատամարտին ընթացքին անգլիական զօրքերու կազմին մէջ թուրքերու դէմ կռուած էին նաեւ աւստրալիացիներ ու նիւզելանտացիներ), անդադառնալով այն իրողութեան, որ ահաբեկիչը իր յայտարարութեան մէջ Պոլիսը Կոստանդնուպոլիս կոչած էր՝ ըսած էր. «Կալիփոլիի ճակատամարտէն 104 տարի ետք մենք անգամ մը եւս կ՛ըսենք, որ ստացանք ձեր ուղերձը։ Ձեր զգացումներն ու մտադրութիւններն հասկցած ենք։ Պոլիսը չէք կրնար Կոստանդնուպոլսոյ վերածել։ Ձեր մեծ հայրերը եկան, տեսան, որ այստեղ ենք. անոնցմէ ոմանք ողջ վերադարձան, ոմանք ալ դագաղներով։ Եթէ նոյն նպատակով գաք, ձեզի ալ կը սպասենք։ Որեւէ կասկած չունենաք, որ ձեզի ալ ձեր մեծ հայրերուն պէս դագաղներով պիտի ճամբենք»։

Մորիսըն Թուրքիոյ դեսպանին յայտնեց իր դժգոհութիւնը, պարզաբանումներ պահանջելով անկէ։

Իր կարգին, Նիւ Զելանտիայի արտաքին գործոց նախարար Ուինսթըն Փիթըրզ քննադատեց ահաբեկչական արարքին տեսանիւթը ընտրապայքարի հաւաքի մը ընթացքին ցուցադրելու Էրտողանի արարքը եւ Էրտողանի այն ազդարարութիւնը, որ եթէ Նիւ Զելանտա այդ ոճիրին հեղինակը խստօրէն չպատժէ, «մենք գիտենք զայն ձեւով մը հաշուետուութեան ենթարկելու միջոցը»:

20 Մարտի երեկոյեան, Էրտողանի գրասենեակէն յայտարարուեցաւ, որ նախագահին խնդրայարոյց խօսքերը հանուած են Էրտողանի նշեալ ելոյթի պատճէնէն։

Վերջապէս, Նիւ Զելանտայի իշխանութիւնները 21 Մարտին յայտարարեցին, թէ ապօրինի պիտի դարձնեն քաղաքացիներու կողմէ բանակին համար նախատեսուած արագահարուած զէնքերու սեփականութիւնը։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top