Նայիրի Յունանեան ԱԱԾի Գործակա՞լ Էր. Վանեցեան Ո՛չ Կը Հերքէ, Ո՛չ Ալ Կը Հաստատէ

0326hounanian

 

0326hounanian

Ազգային անվտանգութեան ծառայութեան (ԱԱԾ) տնօրէն Արթուր Վանեցեան ո՛չ կը հերքէ, ո՛չ ալ կը հաստատէ Նայիրի Յունանեանի՝ ԱԱԾի գործակալ ըլլալը: Այս մասին Արթուր Վանեցեան յայտնեց Ազգային ժողովին մէջ, 22 Մարտին, լրագրողներու հետ հանդիպման մը ընթացքին:

ԱԱԾի տնօրէնը յայտարարեց, որ յատուկ ընթացակարգէն ետք կը հրապարակուի այն ինչ պատահած է, սակայն առանց նշելու ճշգրիտ թուական:

«Հոկտեմբեր 27»ի գործին եւ անոր իրագործման գլխաւոր դերակատար Նայիրի Յունանեանի՝ ԱԱԾի գործակալ ըլլալու մասին քննարկումները դարձեալ աշխուժացան վերջերս, երկրորդ նախագահ Ռոպերթ Քոչարեանին յղուած Վահան Շիրխանեանի բաց նամակին հրապարակումէն ետք:

«Հոկտեմբերի 27ից յետոյ ինձ, Գագիկ Ջհանգիրեանին եւ Ռոբերտ Քոչարեանին Գորիկ Յակոբեանը ներկայացրել է մի թղթապանակ՝ ԱԱԾ գործակալ Նայիրի Յունանեանի մասին, սակայն յետագայում այդ թղթապանակն անհետացել է», կ՛ըսուի Շիրխանեանի նամակին մէջ:

«Այո՛, ես տեղեկութիւններ ունեմ, բայց ես ո՛չ կը հաստատեմ պարոն Շիրխանեանի խօսքերը, ո՛չ կը հերքեմ, գործը վարող մարմին կայ՝ Յատուկ քննչական ծառայութիւնն է, բոլոր հարցերով դիմէք ՀՔԾին», յայտարարեց ԱԱԾի տնօրէնը:

«Դուք նոյնպէս տեղեկութիւններ ունեցե՞լ էք, որ նա գործակալ է եղել» հարցումին Վանեցեան կրկնեց իր պատասխանը. «Էլի եմ ասում՝ ո՛չ հերքում եմ, ո՛չ հաստատում եմ այդ ասուածը: Գործը քննող Յատուկ քննչական ծառայութիւնը, երբ անհրաժեշտութիւն լինի, այդ հարցին կը պատասխանի: Մէկ անգամ եւս շեշտում եմ՝ ո՛չ հերքում եմ, ո՛չ հաստատում եմ: Վստահեցնում եմ՝ յատուկ ընթացակարգից յետոյ կը հրապարակուի այն, ինչ եղել է»:

Ռոպերթ Քոչարեան վերջերս ռուսերէնով հրապարակուած իր «Կեանք Եւ Ազատութիւն» խորագրեալ գիրքին մէջ մանրամասն կերպով նկարագրած է «Հոկտեմբեր 27»ի դէպքերը:

Ան ոչ մէկ անգամ կը խօսի Նայիրի Յունանեանի՝ ԱԱԾի գործակալ ըլլալու հանգամանքին մասին, ինչ որ իր նամակին մէջ կը յիշեցնէ Վահան Շիրխանեան: Աւելին՝ Քոչարեան Նայիրի Յունանեանը եւ անոր յանցակիցները կը համարէ «քանի մը ծայրայեղականներ»՝ նշելով, որ Հայաստանի բնակչութեան մէկ մասը դեռ կը մերժէ ընդունիլ ակնյայտը. «Հինգ ծայրայեղական ներխուժեցին խորհրդարան ու տասնեակներով ականատեսներու աչքին առջեւ սպաննեցին ութ հոգի՝ յայտարարելով, որ այդպիսով կ՛ուզէին փողոց իջեցնել ժողովուրդը եւ փոխել իշխանութիւնը, չէին քօղարկած ո՛չ իրենց անունները, ո՛չ ալ նպատակները: Ճշմարտութիւնը այնքան պարզ էր, որ շատեր չէին ուզեր հաւատալ: Հաւանաբար, սպաննուածներու ընտանիքներուն համար հոգեբանօրէն շատ աւելի դիւրին պիտի ըլլար, որ իրենց հարազատները ծաւալուն դաւադրութեան մը զոհ դարձած ըլլային, քան հաշտուիլ այն գաղափարին հետ, որ անոնց կեանքը խլեցին հինգ տականքներ, որոնք համարձակեցան կատարել ահաբեկչական այդ գործողութիւնը… Ողբերգութենէն քիչ ժամանակ ետք հանդիպում ունեցայ սպաննուածներէն մէկուն՝ Եուրի Բախշեանի կնոջ հետ: Ան հարցուց. «Ինչպէ՞ս, ոմն Նայիրի Յունանեան,– անյայտ-անանուն մէկը,– եկաւ ու առանց որեւէ պատճառի պարզապէս ելաւ ու սպաննե՞ց զանոնք»: Ի՞նչ ըսել: Դաւադրութիւններու տեսութիւնը կենսունակ է: Իսկ ինծի համար իրականութիւնը ընդունելու մարդոց անկարողութիւնը պատճառ դարձաւ նաեւ, որ կատարուածէն ետք այլեւս չկրցայ յարաբերիլ Վազգէն Սարգսեանի ընտանիքին հետ: Ու շատ կ՛ափսոսամ, որ այդպէս եղաւ, որովհետեւ ես ու Վազգէնը իսկապէս մտերիմ ընկերներ էինք»:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top