Նուազագոյն Կենսաթոշակը Հայաստանի Մէջ Պիտի Ըլլայ 25 Հազար 500 Դրամ

ԵՐԵՒԱՆ.- Հայաստանի Ազգային ժողովի առողջապահութեան եւ ընկերային հարցերու մշտական յանձնաժողովը միաձայնութեամբ դրական եզրակացութիւն տուաւ «Պետական կենսաթոշակներու մասին» Հայաստանի օրէնքին մէջ փոփոխութիւններ եւ լրացումներ կատարելու մասին օրէնքի նախագիծին: Օրէնքին համաձայն՝ Հայաստանի մէջ կենսաթոշակի նուազագոյն չափ սահմանել 25 հազար 500 դրամը:

Ըստ «Արմէնփրէս»ի՝ նախագիծի դրական եզրակացութիւնը պիտի քննարկուի Ազգային ժողովի լիագումար նիստին:

«Նախագիծին ներկայացումը ունի մէկ հիմնական նպատակ՝ իսպառ բացառել ծայրայեղ աղքատութեան վտանգը կենսաթոշակառուներու մէջ: Նախագիծով կ՛առաջարկուի կառավարութեան օրէնքով վերապահել լիազօրութիւն՝ սահմանելու նուազագոյն կենսաթոշակի չափը: Քաղաքացիին վճարուող կենսաթոշակի չափը չի կրնար պակաս ըլլալ այդ չափէն: Թոշակներու հաշուարկման կարգին մէջ հիմնական ցուցանիշները սահմանելու լիազօրութիւնը վերապահուած է կառավարութեան: Իսկ այդ ցուցանիշներն են՝ հիմանական կենսաթոշակի չափը եւ աշխատանքային փորձառութեան կամ զինուորական ծառայութեան մէկ տարուան արժէքները: Այսօր կենսաթոշակային չափին վրայ ազդող հիմնական գործօնները ասոնք են: Կառավարութիւնը կ՛առաջարկէ գործիք կիրառել կենսաթոշակային ապահովութեան համակարգին մէջ: Եւ այդ գործիքը նուազագոյն կենսաթոշակի չափն է, որմէ ցած կենսաթոշակ չի կրնար վճարուիլ», ներկայացուց աշխատանքի եւ ընկերային հարցերու փոխնախարար Սմբատ Սաիեան:

Փոխնախարարը տեղեկացուց, որ օրէնքի նախագիծի ընդունման վերաբերեալ պետական ամավարկին մէջ կը նախատեսուի ծախսերու յաւելում: Համապատասխան միջոցները նախատեսուած են այս տարուան պետական ամավարկով: Նախագիծին ընդունումէն ետք անոր պիտի տրուի յետադարձ ուժ, այսինքն՝ պիտի վերահաշուարկուին կենսաթոշակները, եւ 1 Յունուարէն սկսեալ փաստացի կենսաթոշակի եւ նուազագոյն կենսաթոշակի չափի տարբերութիւնը պիտի վճարուի քաղաքացիին:

Սաիեան տեղեկացուց նաեւ, որ այդ 25,500 դրամին պիտի գումարուի  նաեւ 6400 դրամ, եթէ անձը առաջին խումբի հաշմանդամութիւն ունի եւ 3200 դրամ, եթէ երկրորդ խումբի հաշմանդամութիւն ունի:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top