Լիբանանցի Ղեկավարները Ժողովրդավարութեան Դասեր Կու Տան Փոմփէոյի

0326lebanon

 

0326lebanon

ՊԷՅՐՈՒԹ, «Ճազիրա».- Միացեալ Նահանգներու արտաքին գործոց նախարար Մայք Փոմփէօ 22 Մարտին պաշտօնական այցելութիւն մը տուաւ Լիբանան, ուր հանդիպումներ ունեցաւ իշխանութեան երեք պետերուն, լիբանանցի իր պաշտօնակիցին, ներքին գործոց նախարարին, ինչպէս նաեւ այլ ղեկավարներու հետ:

Նախագահ զօր. Միշել Աուն նախագահական պալատին մէջ ընդունեց Փոմփէօն, որուն առաջարկեց օժանդակել Լիբանանին, որպէսզի կարենայ իր հողերուն վրայ գտնուող սուրիացի տեղահանուածներուն տունդարձը ապահովել: Ան շեշտեց, որ Լիբանան այլեւս ի վիճակի չէ հանդուրժելու տեղահանուածներուն ստեղծած կացութիւնը եւ աւելցուց, որ անոնց վերադարձը պիտի շարունակուի ապահովութեան ընդհանուր տնօրէնութեան մշակած ծրագիրով:

Իր կարգին, Փոմփէօ շեշտեց, որ Ուաշինկթըն յանձնառու կը մնայ լիբանանեան-ամերիկեան երկկողմանի յարաբերութիւններու ամրապնդման՝ ընդգծելով, որ Միացեալ Նահանգները պիտի շարունակէ Լիբանանին զէնք ու զինամթերք տրամադրել: Ան անդրադարձաւ նաեւ «Հըզպալլա»ի եւ Իրանի մասին ամերիկեան տեսակէտին ու կեցուածքներուն՝ պնդելով, որ «Հըզպալլա»ի քայլերը վնաս կը հասցնեն Լիբանանին:

Աուն ընդգծեց, որ «Հըզպալլա»ն լիբանանեան կուսակցութիւն մըն է, որ երկրին խորհրդարանին եւ կառավարութեան մէջ ներկայութիւն է ժողովուրդէն ապահոված քուէներով, ինչպէս նաեւ երկրին ընկերութիւնը կազմող հիմնական շերտ մըն է, որ կը ներկայացնէ երկրին գլխաւոր համայնքներէն մէկը:

Խորհրդարանի նախագահ Նեպիհ Պըրրի եւս ընդունեց Փոմփէօն, որուն հետ մէկ ժամ տեւած հանդիպումին ընթացքին շեշտուեցաւ Լիբանանի կայունութիւնը պահպանելու կարեւորութիւնը: Փոմփէօ յայտնեց, որ Միացեալ Նահանգները կը փափաքի ՄԱԿի ջանքերուն օժանդակել՝ լուծելու համար Լիբանան-Իսրայէլ ծովային սահմանագծումի հարցը:

Քննարկուեցան նաեւ «Հըզպալլա»ի դէմ ամերիկեան պատժամիջոցները եւ անոնց ունեցած բացասական հետեւանքները՝ Լիբանանի եւ լիբանանցիներուն վրայ: Պըրրի ընդգծեց, որ «Հըզպալլա»ն լիբանանեան կուսակցութիւն է, որ ներկայացուած է խորհրդարանին եւ նախարարաց խորհուրդին մէջ, «իսկ անոր եւ լիբանանցիներուն դիմադրութեան դրդապատճառը Իսրայէլի կողմէ լիբանանեան հողերուն բռնագրաւումն է»:

Վարչապետ Սաատ Հարիրիի հետ Փոմփէոյի հանդիպման ընթացքին քննարկուեցան լիբանանեան եւ շրջանային իրադարձութիւնները, ինչպէս նաեւ երկկողմանի յարաբերութիւնները:

Փոմփէօ շեշտեց Ուաշինկթընի զօրակցութիւնը Լիբանանի կայունութեան։

Հանդիպումէն ետք Փոմփէօ դարձաւ վարչապետին ճաշի հիւրը:

Արտաքին գործոց նախարար Ժըպրան Պասիլ եւս խորհրդակցութիւններ ունեցաւ ամերիկացի իր պաշտօնակիցին հետ: Հանդիպումէն ետք տրուած միացեալ մամլոյ ասուլիսին ընթացքին Փոմփէօ շեշտեց, որ Ուաշինկթըն կը զօրակցի տեղահանուածներու անյապաղ տունդարձին: Ան նաեւ նշեց, որ «Հըզպալլա» կը ձեւացնէ, թէ ինք կը զօրակցի լիբանանեան պետութեան, սակայն ««Հըզպալլա»ն կը խոչընդոտէ լիբանանցիներուն ձգտումները եւ խորհրդարանին մէջ ներկայացուած է, որովհետեւ ան ուղղակի վախ կը պատճառէ ի նպաստ իրեն քուէարկողներուն»՝ պնդելով. ««Հըզպալլա»ի աշխատանքը լիբանանցիներու շահերուն կը հակադրուի»:

Փոմփէօ շեշտեց, որ Միացեալ Նահանգները պիտի շարունակէ դէմ դնել Իրանին եւ անոր «ահաբեկչական» ընթացքին, իսկ «Հըզպալլա»ին ցուցադրուող Իրանի զօրակցութիւնը «լիբանանեան պետութեան վտանգ կը սպառնայ»:

Իր կարգին, Պասիլ շեշտեց, որ «Հըզպալլա»ն լիբանանեան կուսակցութիւն մըն է, «որ ահաբեկչական խմբակ մը չէ եւ մեծ ժողովրդականութին կը վայելէ»։

«Մենք կառչած կը մնանք լիբանանեան ազգային միասնականութեան եւ Միացեալ Նահանգներու հետ մեր ունեցած լաւ յարաբերութիւններուն», հաստատեց Պասիլ:

Նշենք, որ Փոմփէօ Լիբանան ժամանելէ անմիջապէս ետք հանդիպում մը ունեցաւ ներքին գործոց նախարար Ռայա Հասանի հետ, իսկ երեկոյեան հանդիպում մը ունեցաւ Ընկերվար յառաջդիմական կուսակցութեան ղեկավար Ուալիտ Ճոմպլաթի հետ: Փոմփէօ հանդիպում մը ունեցաւ նաեւ «Լիբանանեան ուժեր» կուսակցութեան ղեկավար Սամիր Ժաաժաայի հետ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top