Խնամակալ Մարմինի Կազմակերպած Ասմունքի Տարեկան Մրցանք

6 - դատական կազմի անդամներ

 

Ազգային վարժարաններու Խնամակալ մարմինի կազմակերպած աւանդական տարեկան արտասանական մրցումը տեղի ունեցաւ 16 Մարտին, առաւօտեան ժամը 9էն սկսկեալ, Վահան եւ Անուշ Շամլեան Ազգային վարժարանին մէջ, երեք տարբեր հատուածներով՝ նախակրթարանի, միջնակարգի եւ երկրորդականի աշակերտներուն համար:

Բացումը կատարեց Խնամակալ մարմինի ժրաջան ատենապետուհի Լիզա Կապուտեան: Ան ողջունեց ներկայութիւնը Ղեւոնդ Ա. քհնյ. Քիրազեանի, որ կը ներկայացնէր առաջնորդ Մուշեղ արք. Մարտիրոսեանը: Ան նաեւ ողջունեց ներկայութիւնը դատական կազմի բոլոր անդամներուն, Շամլեան Ազգային վարժարանի փոխտնօրէնուհի Ռիթա Գաբրիէլեանի, ինչպէս նաեւ սրահին մէջ գտնուող բոլոր վարժարաններու տնօրէններուն ու ուսուցիչներուն:

Լիզա Կապուտեան շնորհաւորեց հայ բանաստեղծութեան ծաղկման նպաստող այս նախաձեռնութեան 6րդ տարեդարձը: Ան յիշեց, թէ 40 աշակերտներով սկսած առաջին մրցումը, այսօր համախմբած է 98 աշակերտներ, որոնք պատանեկան ապրումներով ու հնչիւններով պիտի կենդանացնեն հայ բանաստեղծութեան ազնիւ կտորները, յաւերժանալու խոստումներ աւետելով օտար ափերուն կայք հաստատած ամերիկահայ գաղութին:

Կապուտեան ներկայացուց 35 տարուան դաստիարակի իր փորձառութենէն եւ մասնագիտական  ուսումնասիրութենէն քաղուած քանի մը առաւելութիւններ, զորս աշակերտը ձեռք կը ձգէ բանաստեղծութիւն ասմունքելով, ինչպէս՝ բերանացի արտայայտուելու, հասկնալու ու վերլուծելու ունակութեան զարգացում, հնչելու եւ ճիշդ առոգանութեամբ արտայայտուելու կարելիութիւն: Ասմունքելը մեծապէս կը նպաստէ նաեւ երեւակայութեան եւ ստեղծագործական միտքերու զարգացման:

Այս տարուան դատական կազմի անդամներն էին՝ Գրիգոր Օկարեան, Թագուհի Արզումանեան, Մարալ Վարժապետեան, Գէորգ Պետիկեան, Կայլակ (Մկօ Փանոսեան) եւ Սայաթ Բաբումեան, որոնք սիրայօժար կերպով իրենց ժամանակը եւ մասնագիտական փորձառութիւնը ի գործ դրին՝ մեր պատանիներու կարողութիւնները արժեւորելու եւ լաւագոյն ձեւով գնահատելու համար: Իսկ բանաստեղծութեան համար ընդհանուր նիւթ որոշուած էր մարդկային ու բարոյական արժանիքներ արտայայտող բանաստեղծական կտորներ, նաեւ հայրենասիրական ու ազգային ոգի ներշնչող կտորներ:

Այս տարի կը մասնակցէին Ազգային Ռոզ եւ Ալէք Փիլիպոս, Սրբոց Նահատակաց Ֆերահեան երկրորդական եւ Մարի Գապայեան նախակրթարան, Մեսրոպեան, Վահան եւ Անուշ Շամլեան, Արի Կիրակոս Մինասեան, ՀԲԸՄ Մանուկեան-Տեմիրճեան, Սահակ Մեսրոպ, ՀԲԸՄ Վաչէ եւ Թամար Մանուկեան ու Հայ Քոյրերու վարժարանները, եւ առաջին անգամն ըլլալով՝ ՀՕՄի շաբաթօրեայ վարժարաններու աշակերտները:

Միհրան Թումաճեան եւ Լենա Գորթոշեան ներկայացուցին աշակերտները եւ անոնց բանաստեղծական կտորները: Անոնք բեմ բարձրացան հերթաբար, խոր զգացումներով եւ հարազատ ապրումներով իրենց բանաստեղծական կտորները ասմունքեցին եւ համապատասխան ձեւով գնահատուեցան դատական կազմի անդամներուն կողմէ:

Իւրաքանչիւր բաժինի աւարտին, բոլոր աշակերտները բեմ հրաւիրուեցան, անոնց յանձնուեցան մասնակցութիւնը արժեւորող գնահատագիրներ եւ մերօրեայ բանաստեղծ Կայլակի երկու գիրքերը ու Ժագ Ս. Յակոբեանի հայրենաշունչ բանաստեղծութիւններու հատորներէն մէկը, որ նուիրուած էր Ազգային առաջնորդարանին կողմէ: Ապա աշակերտները իրենց դասատուներուն եւ Խնամակալ մարմինի անդամներուն հետ լուսանկարուելու առիթը ունեցան:

Շատ գնահատելի էր նաեւ այն գեղեցիկ ժէսթը, որ կատարուեցաւ ուսուցիչներուն համար, Խնամակալ մարմինին կողմէ. բոլոր ուսուցիչները հրաւիրուեցան բեմ եւ գնահատուեցան՝ իբրեւ հայ ոգին ներարկող ու հայրենասիրութիւնը խթանող կրթական մշակներ եւ անոնց նուիրուեցան մէկական ծաղիկ եւ նոյն՝ աշակերտներուն նուիրուած նշեալ գիրքերէն։

Շամլեան Ազգային վարժարանի սրահը նեղ էր ներկաներուն համար, որոնք եկած էին քաջալերելու թէ՛ իրենց զաւակները ու աշակերտները եւ թէ հայ բանաստեղծութիւնը՝ հաւատալով, որ առանց մշակոյթի կարելի չէ գոյատեւել իբրեւ ազգ եւ երկիր:

Տարբեր ժամանակաշրջաններու մէջ իրենց դրոշմը զետեղած հայ  գրականութեան տիտանները նոր աւիւնով ներկայացուեցան մեր պատանիներու խոստմնալից ելոյթներուն ընդմէջէն: Անգամ մը եւս, շնորհիւ հայկական ամէնօրեայ վարժարաններուն եւ անոնց ջամբած հայեցի ոգիին, մեր աշակերտութիւնը աննախընթաց տօնի վերածեց այս գեղեցիկ օրը: Հայ բանաստեղծի օր, հայ բանաստեղծութեան մեծարանքի օր. այսպէս կարելի էր կոչել եւ գնահատել հայ գրականութիւնը:

Մրցումը աւարտին հասաւ կէսօրէն ետք ժամը 3ի շուրջ, եւ Խնամակալ մարմինին կողմէ յատուկ շնորհակալութեան խօսք արտասանեց Լիզա Կապուտեան: Ան հաստատեց, թէ յառաջիկայ տարիներուն ձեռնարկը աւելիով ընթարձակելու տեսլականներ բացաւ այսօրուան խուռներամ բազմութիւնը: Խնամակալ մարմինը այս մէկը կը համարէ նուաճում, հետեւաբար ապագայի նկատմամբ նոր ակնկալիքներով ցտեսութիւն մաղթեց բոլորին:

Ներկաները՝ աշակերտներ, ուսուցիչներ, ծնողներ, դատական կազմի եւ Խնամակալ մարմինի բոլոր անդամները, յագեցած ու լիցքաւորուած՝ հեռացան հայաբոյր ու արուեստազեղ այս մթնոլորտէն: Հայրենիքի ու ազգի բոլոր հպարտութիւնները մարնմաւորուեցան իրենց երեւակայութեան ընդարձակ հորիզոնին վրայ:

Ապրի՛ն նման առիթներու հեղինակները եւ գործադրողները, որոնց շնորհիւ հայ աշակերտին ոգիին մէջ բոյն դրած հպարտ առծիւին լայն թեւածելու ու սաւառնելու անսահման հնարաւորութիւններ կը պարգեւեն:

Բարի երթ բոլոր մասնակիցներուն։ Կը սպասենք յաջորդ տարուան արտասանական մրցումին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top