Ցեղասպանութեան Փաստերուն Եւ Ուրացման Ջանքերուն Մասին Փրոֆ. Աքչամի Դասախօսութիւնը

0404Akcham

0404AkchamԿԼԵՆՏԷՅԼ, «Նոր Օր».- Կազմակերպութեամբ Պոլսահայ, Իրանահայ, Իրաքահայ ընտանեկան միութիւններուն եւ «Վարդանանց Ասպետներ»ուն, Շաբաթ, 23 Մարտի երեկոյեան, Իրանահայ միութեան մշակութային կեդրոնին մէջ, Կլենտէյլ, տեղի ունեցաւ թուրք-գերմանացի փրոֆ. Թաներ Աքչամի շահեկան ելոյթը: Ան ներկայացուց իր նոր հատորը՝ նուիրուած Արամ Անտոնեանին եւ Գրիգոր վրդ. Կէրկէրեանին: Առաջինը հանրայայտ է իր «Մեծ Ոճիրը» հատորով, իսկ երկրորդը Ցեղասպանութեան վերապրող մըն է, մահը ողջ-ողջ ապրած հայորդի մը, որ կատարած է հսկայական կարեւոր աշխատանք ցեղասպանագիտութեան համար: Ան, փոքր երեխայ, վերապրող՝ տեղահանութեան տարիներուն հասնելով մինչեւ Պէյրութ, Զմմառի մէջ կ՛ուսանի, կ՛անցնի Եւրոպա, կը դառնայ կաթողիկէ վարդապետ եւ կը նուիրուի հոգեւոր ծառայութեան:

Թուրքիոյ ժխտողականութիւնը եւ Աքչամի կողմէ ուսումնասիրուած իրական փաստերը կու գան երեւան հանելու Թալէաթի, Պեհաէտտին Շաքիրի եւ այլոց գաղտնի նամակները, որոնց բացայայտումը լրջագոյն փաստեր են Ցեղասպանութեան գծով կատարուած աշխատանքներուն մէջ: Թուրքիա կ՛ոչնչացնէ փաստերը եւ յետոյ կը բարձրաձայնէ, թէ փաստեր չկան, բնագիր նամակներ չկան, շինծու են բոլորը՝ հայերուն կողմէ: Աքչամ հակառակը կ՛ապացուցէ շնորհիւ Կէրկէրեան վարդապետի արխիւներուն, որոնց հրատարակութիւնը նոր «ապտակ» մըն է արդարութենէն փախչող թուրք պետութեան:

Կէրկէրեան վարդապետ հսկայական աշխատանք կատարած է՝ հաւաքելով արխիւներ, որոնց մէկ մասը պատճէնահանած է, պահպանած է, իսկ անոնցմէ ոմանց բնագիրները դժբախտաբար այսօր կորսուած են «Նուպարեան» գրադարանէն: Շատ հետաքրքրական էր փրոֆ. Աքչամի դասախօսութիւնը, որուն ներկայ եղող հարիւրեակ մը ներկաները մեծ բաւարարութիւն ստացան:

Հանդիսավարն էր՝ Պոլսահայ միութեան ատենապետ, իրաւաբան Էտվին Մինասեան, որ նախ հանդէս եկաւ պատշաճ բացման խօսքով եւ ներկայացուց հիւր դասախօսը: Դասախօսութիւնը ընթացաւ անգլերէնով եւ դասախօսը մեծ պաստառի վրայ կը ցուցադրէր թիւեր, փաստեր, լուսանկարներ, արխիւային նիւթեր՝ գաղտնագիր նամակներ ու անոնց բացատրութիւնները:

«Քլարք» համալսարանի կայքին վրայ մանրամասնօրէն մատչելի է Աքչամի կատարած շնորհակալ աշխատանքը:

Աւարտին տեղի ունեցաւ հարցում-պատասխան, ապա՝ գիրքի մակագրում եւ հիւրասիրութիւն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top