Միւլըրի Ամբողջական Տեղեկագիրին Յանձնումը Պարտադրելու Որոշում

Ճերի Նետըր

 

Ճերի Նետըր

Ճերի Նետըր

ՈՒԱՇԻՆԿԹԸՆ, «Էյ.Փի.».- Ներկայացուցիչներու տան Արդարադատութեան յանձնախումբը 3 Ապրիլին վաւերացուց բանաձեւ մը, որ երկրին ընդհանուր դատախազէն կը պահանջէ Քոնկրեսին յանձնել նախագահ Տանըլտ Թրամփի ընտրուելու ջանքերուն մէջ Ռուսիոյ հետ հաւանական գործակցութեան մասին յատուկ դատախազ Ռապըրթ Միւլըրի՝ շուրջ 400 էջնոց տեղեկագիրը, առանց ծածկելու անոր որոշ մասերը։ Թրամփի կողմէ ընդհանուր դատախազ նշանակուած Ուիլեըմ Պար նախապէս խոստացած էր հրապարակել տեղեկագիրը, անոր որոշ մասերը ծածկելէ ետք։ Թրամփ, որ նախապէս յայտարարած էր, թէ դէմ չէ տեղեկագիրին հրապարակման, սկսած է վերապահութեամբ արտայայտուելու հրապարակման մասին։

Յիշեցնենք, որ Ներկայացուցիչներու տունը տեղեկագիրին յանձնումէն առաջին իսկ, Մարտին միաձայնութեամբ վաւերացուցած էր բանաձեւ մը՝ պահանջելով Միւլըրի ամբողջական տեղեկագիրին հրապարակումը։ Արդարադատութեան յանձնախումբի ատենապետ Ճերի Նետլըր յայտնեց, թէ անմիջապէս արդարադատութեան նախարարութեան պիտի չներկայացնէ յանձնումի պահանջը՝ յուսալով, որ առանց անոր համաձայնութիւն կը գոյանայ կողմերուն միջեւ։ Եթէ արդարադատութեան նախարարութիւնը մերժէ յանձնել ամբողջական տեղեկագիրը, օրէնսդիր եւ գործադիր մարմիններուն միջեւ տարակարծութիւնը լուծելու հարցը դաշնակցային ատեաններուն պիտի հասնի։

Միւս կողմէ, Ներկայացուցիչներու տան Վերահսկողութեան յանձնախումբի ատենապետ Ըլայժա Քամինկզ այս շաբաթ բացայայտեց, թէ Սպիտակ տան ապահովական պաշտօնատար Թրիսիա Նիւպոլտ տեղեկութիւններ փոխանցած է ներկայ վարչակազմին կողմէ «օրէնքներու լուրջ խախտումներ»ու մասին, անձնակազմի անդամներուն ապահովական լիազօրութիւններ տրամադրելու հարցին մէջ։

Արդարեւ, Նիւպոլտ յայտնեց, թէ Սպիտակ տան անձնակազմի անդամներէն մօտաւորապէս 25ին, ներառեալ՝ նախագահին բարձրաստիճան խորհրդականներու պարագային առաջարկուած է ապահովական լիազօրութիւններ չտրամադրել, սակայն այդ յանձնարարականները անտեսուած են, առանց որոշումները արդարացնող պատճառաբանութեանց։ Հակառակ անոր, որ անունները չեն հաղորդուած, կասկածելիներէն մէկը կը նկատուի Թրամփի փեսան՝ Ճերըտ Քուշնըր, որուն գերգաղտնի տեղեկութեանց հասանելիութեան դէմ շարք մը բարձրաստիճան պաշտօնատարներ արտայայտուած են։ Այլ կասկածելիներու շարքին են՝ ազգային ապահովութեան պաշտօնազրկուած խորհրդական Մայքըլ Ֆլին, Թրամփի դուստրը՝ Իվանքան եւ ազգային ապահովութեան խորհրդական Ճան Պոլթըն։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top