Հայաստան Համաձայնագիր Կնքեց St. Jude  Մանկական Հիւանդանոցին Հետ

0416saintjude

0416saintjude

Հայաստան առաջին պետութիւնն է, որ համաձայնագիր կնքեց աշխարհի լաւագոյն հիւանդանոցներէն մէկուն՝ Միացեալ Նահանգներու Մեմֆիս Ս. Յուդայի մանկական հետազօտական հիւանդանոցին (St. Jude Children’s Research Hospital) հետ: Այս մասին կը հաղորդէ վարչապետի տիկնոջ՝ Աննա Յակոբեանի պաշտօնական կայքը:

Համագործակցութեան յուշագիրը կնքուեցաւ 12 Ապրիլին Ս. Յուդայի մանկական հետազօտական հիւանդանոցին, Հայաստանի մանկական քաղցկեղի եւ արեան հիւանդութիւններու կեդրոնին եւ «City of smile – ժպիտների քաղաք» բարեգործական հիմնարկին միջեւ: Համաձայնագիրները ստորագրեցին Աննա Յակոբեան, Հայաստանի մանկական քաղցկեղի եւ արեան հիւանդութիւններու կեդրոնի մանկական ուռուցքաբան Գէորգ Թամամեան, Ս. Յուդայի մանկական հետազօտական հիւանդանոցի փոխտնօրէն Քարլոս Ռոտրիկեզ-Կալինտօ եւ հիւանդանոցի Եւրասիական տարածաշրջանի տնօրէն Սիմա Ճեհան: Սոյն համաձայնագիրով Հայաստան կը միանայ St. Jude Global Alliance-ին, որուն միջոցով առաւել արդիւնաւէտ կերպով պիտի կարենայ պայքարիլ մանկական քաղցկեղին դէմ:

Միանալով St. Jude Global Alliance-ին՝ Հայաստան պիտի միանայ այլ երկիրներու, որոնք միասին պիտի լուծեն մանկական ուռուցքաբանութեան ոլորտի մարտահրաւէրները եւ պիտի ապահովեն ախտորոշում եւ բուժում քաղցկեղով հիւանդ բոլոր երեխաներուն համար:

Ստորագրման արարողութենէն ետք Աննա Յակոբեան շեշտեց, որ համաձայնագիրը շատ կարեւոր քայլ է քաղցկեղի դէմ պայքարին մէջ:

«Հայաստանի մէջ կ՛արձանագրուի մանկական քաղցկեղի տարեկան հարիւր դէպք եւ մեր նպատակն է օգնել այդ երեխաներուն՝ յաղթահարելու հիւանդութիւնը: Ս. Յուդայի մանկական հետազօտական հիւանդանոց մեր այցելութիւնը, նաեւ այս համաձայնագիրը շատ կարեւոր են, եւ մենք պէտք է ընդօրինակենք հիւանդանոցին փորձառութիւնը», ըսաւ Յակոբեան՝ անգամ մը եւս շեշտելով, որ իր ամենամեծ երազն է, որ Հայաստանի մէջ ալ նման կեդրոն մը հիմնուի եւ հայ մանուկները ստիպուած չըլլան քաղցկեղի բուժման համար մեկնելու արտերկիր:

Ս. Յուդայի մանկական հետազօտական համալսարանի փոխտնօրէն Քարլոս Ռոտրիկեզ-Կալինտօ շեշտեց, որ Հայաստանի անդամակցութիւնը շատ կարեւոր է եւ մօտիկ ապագային շարք մը երկիրներ նոյնպէս պիտի անդամակցին նախագիծին:

Ս. Յուդայի մանկական հետազօտական հիւանդանոցը քաղցկեղի դէմ պայքարին մէջ աշխարհի լաւագոյն կեդրոնն է: Այս հիւանդանոցին մէջ, շնորհիւ բժշկական անձնակազմին եւ անընդհատ զարգացող բժշկական ծառայութիւններուն, կարելի կ՛ըլլայ փրկել քաղցկեղով հիւանդ երեխաներուն ութսուն տոկոսը: Հիւանդանոցին մէջ ուտելիքը, կեցութիւնը եւ երթեւեկութեան ծախսերը անվճար են: Հիւանդանոցի ղեկավարութիւնը, բարերարները եւ բժշկական անձնակազմը վստահ են, որ ոեւէ երեխայ պէտք չէ մահանայ քաղցկեղէն նիւթական դժուարութիւններու պատճառով: Այժմ հիւանդանոցը ունի 11 միլիոն նուիրատուներ, որոնք հիւանդանոցի հաշուեհամարին կը փոխանցեն 25 ամսական տոլար: Հիւանդանոցին տարեկան պիւտճէն մէկ միլիառ տոլար է:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top