Ֆերահեան Ազգային Վարժարանի Հիմնադիր Տնօրէն, Վաստակաւոր Կրթական Մշակ Ու Ազգային Գործիչ Գաբրիէլ Ինճէճիկեան Ոչ Եւս Է  

Prelacy-Logo

 

Գաբրիէլ Ինճէճիկեան

Գաբրիէլ Ինճէճիկեան

Արեւմտեան թեմի առաջնորդ բարձր. Տ. Մուշեղ արք. Մարտիրոսեան, Կրօնական ժողովն ու Ազգային վարչութիւնը խոր ցաւով կը գուժեն Միացեալ Նահանգներու առաջին ամէնօրեայ՝ Ֆերահեան Ազգային վարժարանի հիմնադիր տնօրէն, վաստակաշատ կրթական մշակ եւ ազգային գործիչ Գաբրիէլ Ինճէճիկեանի մահը, որ պատահեցաւ Կիրակի, 14 Ապրիլ 2019ի առաւօտուն։ Պիտի կատարուի Ազգային Թաղում։

Գաբրիէլ Ինճէճիկեան մեր թեմին մէջ ծառայական հարուստ վաստակ կերտած է մասնաւորաբար կրթական ծիրին մէջ. ան եղաւ այն «Սրբազան Խենթ»ը, որ անկարելին կարելի դարձնելով՝ առաջին ամէնօրեայ վարժարանը հաստատեց  Միացեալ Նահանգներու մէջ, ամբողջ կեանքը նուիրելով հայ սերունդներու դաստիարակութեան եւ հայապահպանման առաքելութեան։

Կրթական համակարգի կազմակերպման եւ տասնամեակներու իր նուիրեալ ծառայութեանց համար ան արժանացած է Մեծի Տանն Կիլիկիոյ կաթողիկոսութեան «Ս. Մեսրոպ Մաշտոց» շքանշանի պատիւին։

Այս տխուր առիթով, ցաւակցութիւն կը յայտնենք հանգուցեալի տիկնոջ՝ Ռոզին, զաւակներուն՝ Աւետիսին, Արփիին եւ Արային ու ընտանիքներուն, թոռներուն, հարազատներուն, ընկերներուն  ու բարեկամներուն։

Յուղարկաւորութեան մանրամասնութեանց համար հետեւիլ մամուլին։

Յիշատակն արդարոյն օրհնութեամբ եղիցի։

 

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top