Մասնակցութեամբ «Կարկաչ» Պատանեկան Երգչախումբին՝ Համազգայինի «Այգ» Երիտասարդական Երգչախումբի Հոգեւոր Համերգ

0000GARGACH

0000GARGACH

ՊԷՅՐՈՒԹ.- Հովանաւորութեամբ Լիբանանի Հայոց թեմի առաջնորդ Նարեկ արք. Ալեէմէզեանի, նախագահութեամբ նախկին նախարար Արթիւր Նազարեանի, կազմակերպութեամբ Ազգային առաջնորդարանին, Շաբաթ, 13 Ապրիլի երեկոյեան, Նորաշէնի Սրբոց Վարդանանց եկեղեցւոյ մէջ տեղի ունեցաւ հոգեւոր համերգ՝ կատարողութեամբ Համազգայինի «Այգ» երիտասարդական երգչախումբին՝ մասնակցութեամբ «Կարկաչ» պատանեկան երգչախումբին, գեղարուեստական ղեկավարութեամբ եւ խմբավարութեամբ Զաքար Քէշիշեանի, դաշնակի ընկերակցութեամբ Լիանա Յարութիւնեանի:

Համերգը սկսաւ «Տէրունական աղօթք»ով: Այնուհետեւ «Այգ» եւ «Կարկաչ» երգչախումբերը մեկնաբանեցին Եկմալեան պատարագը, զոր խմբավար Զաքար Քէշիշեան վերամշակած է մանկական եւ իգական կազմով երգչախումբի համար: Այնուհետեւ «Այգ» երգչախումբի աղջիկներու կազմը մեկնաբանեց Մեսրոպ Մաշտոցի ապաշխարութեան ութ շարականները՝ Գէորգ Արմէնեանի մշակումով, որմէ ետք անգլերէնով երեք «սփիրիչուըլ»ներ՝ «Սամթայմզ այ ֆիլ լայք ը մատըրլես չայլտ», «Ըմէյզինկ կրէյս», եւ «Քումպայա»: Յայտագիրի վերջին բաժինով «Այգ» եւ «Կարկաչ» երգչախումբերը երգեցին «Աւէ Մարիա», «Փուր թուա Արմէնի» եւ «Երեւան-Էրեբունի» երգերը:

Համերգի աւարտին իր պատգամը ուղղեց առաջնորդ Նարեկ արք. Ալեէմէզեան, որ շնորհակալութիւն յայտնեց սոյն համերգը յիշատակելի երեկոյի մը վերածած բոլոր անձերուն:

Իր խօսքի աւարտին առաջնորդ սրբազանը եղբայրական ջերմ սիրով ողջունեց ներկայութիւնը Եփրեմ արք. Թապաքեանի, որ կանուխ ժամերուն հասած էր Լոս Անճելըսէն եւ ընդառաջելով իր հրաւէրին ներկայ գտնուած էր այս հոգեւոր համերգին: Առաջնորդ սրբազանը ըսաւ, թէ ինք փափաքած է, որ Եփրեմ արք. Թապաքեան ներկայ գտնուի սոյն համերգին, որովհետեւ ան երկար տարիներու վաստակ ունի մեր «Շարակնոց»ի գրաբարէն աշխարհաբար թարգմանութեան մէջ՝ աւելցնելով, որ այդ «Շարակնոց»ը 3-4 անգամ վերահրատարակուած է, Հայաստանի մէջ եւ աշխարհի ամբողջ տարածքին փնտռուած հատոր մըն է:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top