«ԵՐԿԻՐ»Ի ՀԱՐՑԱԶՐՈՅՑԸ ՀՅԴ ԳՄ-Ի ՄԱՍՆԱԳԻՏԱԿԱՆ ՅԱՆՁՆԱԺՈՂՈՎՆԵՐԻ ՀԱՄԱԿԱՐԳՈՂ ԱՐԾՈՒԻԿ ՄԻՆԱՍԵԱՆԻ ՀԵՏ

0418ardzvikminasian

0418ardzvikminasian

«Կառավարութիւնն Իրականացնում Է Քաղաքականութիւն, Որում ՀՀ Քաղաքացին Չի Կարող Տեսնել Իր Ապագան»

 

Իշխող ուժի կողմից միայն բարձրագոչ յայտարարութիւններ ենք լսում եւ ընդամէնը ցանկութիւններ, բայց իրական գործողութիւններ չկան: Այս մասին «Երկիր»ի հետ զրոյցում ասաց ՀՅԴ Հայաստանի ԳՄ մասնագիտական յանձնաժողովների համակարգող Արծուիկ Մինասեանը, անդրադառնալով՝ «Երկիր»ի հարցմանը ՀՀ կառավարութեան աշխատակազմի պատասխանին:

Յիշեցնենք, որ խմբագրութիւնը Մարտի 20ին հարցում էր ուղարկել ՀՀ կառավարութիւն՝ պարզելու համար, թէ արդեօք հաշուի՞ են առնւում ՀՅԴի՝ կառավարութեան ծրագրի հետ կապուած դիտողութիւնները: Ի պատասխան՝ Ապրիլի 11ին կառավարութիւնից արձագանգել էին՝ նշելով, որ վարչապետը ծանօթ է ՀՅԴի դիտարկումներին:

 

ՄԱՅԱ ԱՒԵՏԻՍԵԱՆ.- Ի պատասխան «Երկիր» (Yerkir.am) կայքի հարցման՝ վարչապետի աշխատակազմից յայտնել են, որ նա ծանօթ է ՀՅԴի կողմից հրապարակուած երկու փաստաթղթերին, այն է՝ կառավարութեան ծրագրի վերաբերեալ եւ կառավարութեան կառուցուածքի փոփոխութեան վերաբերեալ մօտեցումներին: Ինչպէ՞ս կը մեկնաբանէք սա:

ԱՐԾՈՒԻԿ ՄԻՆԱՍԵԱՆ.- Առաջին հայեացքից թւում է, որ սա դրական լուր է, սակայն, դատելով վարչապետի եւ կառավարութեան վարքագծից, այն է՝ կառավարութեան ծրագրի քննարկումների ժամանակ արտայայտած մօտեցումներից, նաեւ կառավարութեան կառուցուածքի նախագծից, որն ուղարկուեց Ազգային ժողով, եւ քաղաքական մեծամասնութեան մօտեցումներից, խիստ կասկածում ենք, որ վարչապետը ծանօթ է այդ փաստաթղթերին, որովհետեւ նախ՝ եթէ ծանօթ լինէր, կը տեսնէր՝ կառավարութեան ծրագրի վերաբերեալ մենք խորը վերլուծութիւն ենք իրականացրել, եւ քննադատութիւններն ու առաջարկութիւնները մի շարք դէպքերում ուղղուած էին հենց այն բանին, որ ծրագրում չպէտք է պարունակուեն այդպիսի դրոյթներ:

Երկրորդ՝ ծանօթ լինել՝ նշանակում է խորութեամբ ընկալել մեր առաջարկութիւնների տրամաբանութիւնը, բայց, ցաւօք, այդ տրամաբանութիւնը չի երեւում թէ՛ կառավարութեան ընդունուած ծրագրում, թէ՛ կառավարութեան կառուցուածքի վերաբերեալ նրանց մօտեցումներում:

Երրորդ՝ կառավարութեան ծրագրի վերաբերեալ մեր առաջարկութիւնները ներկայացնելիս չափազանց կարեւորել ենք, որ իւրաքանչիւր գործողութիւն պէտք է լինի չափելի: Դրա սոցիալ-տնտեսական ազդեցութիւնը պարզ քաղաքացու վրայ պէտք է լինի տեսանելի եւ շօշափելի: Դատելով այս ժամանակահատուածում ձեւաւորուող ու դրսեւորուող քաղաքականութիւնից՝ այս մօտեցումը չկայ: Այսինքն՝ կառավարութիւնն իրականացնում է մի քաղաքականութիւն, որտեղ քաղաքացին չկայ, Հայաստանի քաղաքացին այդպէս էլ իր ապագան չի կարող տեսնել ձեռնարկուող այդ գործողութիւններում: Ընդհակառակը՝ անընդհատ տեսնում ենք դժգոհութիւններ, բողոքներ՝ այս կամ այն ոչ իրաւաչափ ու ոչ տրամաբանական գործողութիւններով պայմանաւորուած:

Կառավարութեան կառուցուածքն առանձին թեմա է, որին պէտք է մանրամասն անդրադառնալ, որովհետեւ այն ոչ միայն այսօր ՀՀ Սահմանադրութեանը չհամապատասխանող գործողութիւնների ամբողջութիւն է, այլեւ կառուցուածքի նախագիծը, որ ներկայացուած է կառավարութեան կողմից, չի դիմանում որեւէ քննադատութեան՝ սկսած նրանից, որ մշակոյթի, սփիւռքի նախարարութիւններն առաջարկւում է վերացնել, իսկ գիւղատնտեսութեան նախարարութիւնը՝ միացնել էկոնոմիկային, աւարտած նրանով, որ այս օրէնքում յստակ կանոնակարգումներ չկան նաեւ լիազօրութիւնների տարանջատման մասով: Այս հարցերը մնացել են բաց, եւ դրանց մատների արանքով նայելը յանգեցնելու է ամբողջ կառավարութեան եւ, ի վերջոյ, պետութեան ձախողումների, որի պատասխանատուն, անշուշտ, իշխող քաղաքական ուժն է՝ իր ձեւաւորած կառավարութիւնով:

 

ՄԱՅԱ ԱՒԵՏԻՍԵԱՆ.- Պարո՛ն Մինասեան, հարցման պատասխանի երկրորդ հատուածում իշխող ուժը պատրաստակամութիւն է յայտնել քննարկումներ կազմակերպել: Պատրա՞ստ էք մասնակցել այդ քննարկումներին:

ԱՐԾՈՒԻԿ ՄԻՆԱՍԵԱՆ.- Անշուշտ, կարեւոր է այս ցանկութիւնը, բայց առայժմ մենք չենք տեսնում դրա առարկայական դրսեւորումը: Միայն բարձրագոչ յայտարարութիւններ ենք լսում, եւ ընդամէնը արտայայտւում են ցանկութիւններ, բայց իրական գործողութիւններ չկան: Աւելին՝ երբ մենք ենք նման քննարկումներ նախաձեռնում, դրանց անհաղորդ են մնում, կարծես տարբեր լեզուներով ենք խօսում: Կարծում եմ, որ այս յայտարարութիւնները ոչ թէ ձեւական պէտք է լինեն, այլ, ըստ էութեան, բովանդակութիւն պէտք է ունենան: Մենք, անկասկած, պատրաստ ենք բոլոր մակարդակներում քննարկումներ կազմակերպել՝ վարչապետից մինչեւ այն անձինք, որոնք պատրաստել են այս նախաձեռնութիւնները, ներգրաւելով նաեւ հանրութեան լայն շրջանակներին, այդ թւում՝ մասնագիտական: Սակայն առայժմ միայն լսում ենք կառավարութեան կողմից հնչեցուած՝ ընդամէնը ձեւական բնոյթ ունեցող յայտարարութիւններ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top