Հետաքննութիւնը Խանգարելու՝ Թրամփի Փորձերը Ձախողած Են Միայն Անոր Անձնակազմին Ընդդիմութեան Շնորհիւ

0419muller report

0419muller report

ԹՐԱՄՓ ՀԵՏԱՔՆՆՈՒԹԻՒՆԸ ԻՐ ՆԱԽԱԳԱՀՈՒԹԵԱՆ ԱՒԱՐՏԸ ՆԿԱՏԱԾ Է

 

ՈՒԱՇԻՆԿԹԸՆ, «Պի.Պի.Սի.».- 18 Ապրիլին հրապարակուեցաւ Ռուսիոյ եւ Թրամփի ընտրապայքարին միջեւ գործակցութեան շուրջ հետաքննութիւն կատարած յատուկ դատախազ Ռապըրթ Միւլըրի մօտաւորապէս 450 էջնոց զեկոյցին եւ անոր յաւելուածներուն գրա-քննուած տարբերակը։

Հակառակ այն իրողութեան, որ տեղեկագիրին մէջ բազմաթիւ տեղեր եւ երբեմն պարբերութիւններ ծածկուած էին, մնացեալէն կարելի է հաստատել, թէ Ռուսիա իսկապէս միջամտած է 2016ի նախագահական ընտրութիւններուն, Թրամփին ընտրութիւնը ապահովելու նպատակով։

0416barrՄիւլըր նաեւ յստակ կապեր գտած է ընտրապայքարին եւ Ռուսիոյ պետութեան հետ կապեր ունեցող ընկերութեան մը միջեւ եւ հակառակ անոր, որ նշած է առնուազն 10 պարագաներ, որոնց ընթացքին Թրամփ փորձած է իրականութիւնները բացայայտելու ջանքերը կասեցնել, ան չէ գտած քրէական հետաքննութիւն բանալու մակարդակի փաստեր, որոնք կ՛ապացուցեն Թրամփի ուղղակի մեղսակից ըլլալը՝ արդարութիւնը խոչընդոտելու ջանքերուն։

Միաժամանակ, ան բաւարար փաստեր չէ գտած հաստատելու համար Թրամփի անմեղ ըլլալը եւ այդ պատճառով դիմած է Քոնկրեսին, որ հետաքննութիւնը իր միջոցներով շարունակէ՝ գրելով. «Քոնկրեսը իրաւասութիւն ունի արգիլելու իր լիազօրութիւնները շահագործելու նախագահին փորձերը»։

Միւլըր նաեւ հասած է այն եզրակացութեան, որ իր հետաքննութիւնը խանգարելու եւ Միւլըրը պաշտօնազրկելու Թրամփի բազմաթիւ բացայայտ եւ ծածուկ փորձերը ձախողած են միայն անոր անձնակազմին ընդդիմութեան շնորհիւ։

Յատկանշական բացայայտում մըն էր նաեւ Թրամփի այն խոստովանութիւնը, երբ ան նոր իմացած է յատուկ դատախազ նշանակելու որոշումին մասին, թէ «այս պիտի ըլլայ նախագահութեանս աւարտը։ Ք…ուած եմ»։

Նշենք, որ Ներկայացուցիչներու տան Արդարադատութեան եւ Հետաքննութեանց յանձնախումբերը նոյն օրն իսկ հրաւէր յղեցին Միւլըրին, հետաքննութեան մասին վկայութիւն տալու համար, որովհետեւ ընդհանուր դատախազը մերժեց տեղեկագիրը ամբողջութեամբ հրապարակելու կոչերը։

Յատկանշական է, որ ընդհանուր դատախազ Ուիլեըմ Պար տեղեկագիրին հրապարակումէն քանի մը ժամ առաջ արտասովոր քայլի մը դիմեց՝ մամլոյ ասուլիս մը հրաւիրելով, որպէսզի փորձէ իր ուզած ձեւով ներկայացնել զեկոյցը, ինչպէս կատարած էր ամիս մը առաջ, երբ անիկա իրենց յանձնուած էր, անոր մասին 4 էջնոց կողմնակալ եզրակացութիւն մը հրապարակելով։

Դեմոկրատ ղեկավարներ խստօրէն դատապարտեցին այս քայլը՝ յիշեցնելով, որ Պար ընդհանուր դատախազ նշանակուելէն առաջ իսկ արդէն դէմ արտայայտուած էր Միւլըրի հետաքննութեան եւ հաւանաբար այդ պատճառով իսկ նշանակուած էր իր պաշտօնին։

«Պար իր վարկը եւ արդարադատութեան նախարարութեան անկախութիւնը ոտնակոխեց Թրամփին շահերը պաշտպանելու իր ինքնագլուխ քայլով», յայտարարեց Ներկայացուցիչներու տան խօսնակ Նենսի Փելոսի։

Իր կարգին, Ծերակոյտի դեմոկրատ փոքրամասնութեան ղեկավար Չաք Շումըր Պարի մամլոյ ասուլիսը նմանցուց Թրամփի ընտրապայքարին զօրակցելու հաւաքի մը։

Յիշեցնենք, որ Միւլըրի հետաքննքութեան շնորհիւ բացայայտուեցաւ, որ Թրամփի ամենամօտիկ գործակիցները սուտեր խօսած էին «Էֆ.Պի.Այ.»ին եւ Քոնկրեսին եւ պատժուեցան շարք մը պաշտօնատարներ։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top