Հայ-Ամերիկեան Թանգարանի Ծրագիրին Գործնականապէս Զօրակցելու Առիթ

0000Paul Ignatius Presented with First AAMuseum Square Foot Certificate
0000Paul Ignatius Presented with First AAMuseum Square Foot Certificate

Փօլ Ինկէյշըսի թանգարանի առաջին վկայագիրին հետ

ԿԼԵՆՏԷՅԼ.- Հայ-ամերիկեան թանգարանը նախաձեռնած է իր ծրագիրի իրականացման ջանքերուն համայնքին գործնական մասնակցութիւնը ապահովել միտող արշաւի մը, որուն ընթացքին նուիրատուները առիթ պիտի ունենան 500 տոլար տրամադրելով՝ ստանալ թանգարանին մէկ քառակուսի ոտքը կառուցելու վկայագիր մը։

Այս արշաւին մղիչ ուժը եղած է թանգարանի ծրագրին զօրակցողներէն եւ Միացեալ Նահանգներու ծովուժի նախկին քարտուղար՝ ամերիկահայ Փօլ Ինկնէյշըս, որ ստացած է առաջին վկայագիրը, ձեռամբ թանգարանի գործադիր մարմինի ատենապետ Պերճ Կարապետեանի։

Կլենտէյլ ծնած Փօլ Իկնէյշըս զաւակն է Յովսէփ Իկնէյշըսի (Իքնատոսեան) եւ Էլիզա Ժամկոչեանի: Ան Միացեալ Նահանգներու ծովուժի քարտուղարի պաշտօնը վարած է 1967էն 1969 տարիներուն եւ եղած է նաեւ պաշտպանութեան նախարարի օգնականներէն մէկը՝ նախագահ Լինտըն Ճանսընի իշխանութեան օրերուն։ 2016ին, ծովուժի ամենաարդիական խորտանաւերէն մէկը որոշուած էր կոչել Իկնէյշըսի անունով՝ «USS Paul Ignatius (DDG-117)»:

«Պատիւ մըն է ստանալ Հայ-ամերիկեան թանգարանի մէկ քառակուսի ոտքը կառուցելու վկայագիր մը։ Ուրախ եմ, որ Հայ-ամերիկեան թանգարանի երկար տարիներու երազս իրականացման ճամբուն վրայ է արդէն», կը յայտնէ Իկնէյշըս:

Վկայագիրը ձեւաւորած է Կլենտէյլ հաստատուած արուեստագէտ Արփինէ Շախպանտեանի կողմէ եւ ազդուած է հայկական մանրանկարչութենէն։

Հայ-ամերիկեան թանգարանի եւ մշակոյթի կեդրոնի այս արշաւին աջակցելու համար՝ այցելել www.ArmenianAmericanMuseum.org/SqFt կայքէջը կամ դիմել՝ (818) 351-3554 թիւին։

Նշենք, որ Հայ-ամերիկեան թանգարանի վարչութեան մաս կը կազմեն շրջանի հետեւեալ կազմակերպութիւնները եւ հաստատութիւնները. Հիւսիսային Ամերիկայի Հայ կաթողիկէ առաջնորդարան, Հայ Մշակութային հիմնարկութիւն, Հիւսիսային Ամերիկայի Հայ աւետարանական միութիւն, Հայկական Բարեգործական Ընդհանուր Միութեան Միացեալ Նահանգներու Արեւմտեան շրջան, Ամերիկայի Հայ աւետարանչական ընկերակցութիւն, Հայ Օգնութեան Միութեան Միացեալ Նահանգներու Արեւմտեան շրջան, «Նոր Օր» Բարեգործական հիմնարկութիւն, «Նոր Սերունդ» Մշակութային միութիւն, Հիւսիսային Ամերիկայի Հայց. առաքելական եկեղեցւոյ Արեւմտեան թեմի առաջնորդարան եւ Ամերիկայի Միացեալ Նահանգներու Հայց. առաքելական եկեղեցւոյ Արեւմտեան թեմի առաջնորդարան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top