Համանախագահները Երեւանին Եւ Պաքուին Պիտի Փոխանցեն Գերիներու Մասին Առաջարկներ. Մոսկուա

 

ՍՏԵՓԱՆԱԿԵՐՏ, «Արցախփրէս».- Իր տեղեկութիւնները ատրպէյճանական «Թրենտ» լրատու գործակալութենէն քաղելով, «Թերթ» լրատուական կայքը կը գրէ, որ պատասխանելով գերիները «բոլորը բոլորին դիմաց» սկզբունքով փոխանակելու Ռուսիոյ արտաքին գործոց նախարար Սերկէյ Լաւրովի կատարած յայտարարութեան մասին հարցումի մը՝ Ռուսիոյ արտաքին գործոց նախարարութիւնը յայտնեց հետեւեալը. «ԵԱՀԿ Մինսկի խմբակի համանախագահները այս հարցով նախապատրաստած են համապատասխան առաջարկներ, որոնք Մայիսի վերջաւորութեան տարածաշրջան կատարելիք իրենց այցելութեան ընթացքին պիտի փոխանցեն կողմերուն»։

Նշենք, որ Լաւրով այդ առաջարկը ներկայացուցած էր՝ իբրեւ հակամարտութեան գօտիներուն մէջ վստահութեան մթնոլորտ ստեղծելուն նպաստող քայլ, որ իր կարգին օգտակար կրնայ ըլլալ Արցախի հակամարտութեան կարգաւորման:

Նախարարութիւնը կ՛աւելցնէ, որ գերիներու փոխանակման հարցին շուրջ խորհրդակցութիւնները կը շարունակուին՝ մանրամասնելով, որ Հայաստանի եւ Ատրպէյճանի արտաքին գործոց նախարարները վերջերս տեղի ունեցած հանդիպման ընթացքին  պատրաստակամութիւն յայտնած էին փոխադարձ հիմքով քայլերու ձեռնարկելու՝ գերիներու հարազատներուն այցելութիւնները արտօնելու ուղղութեամբ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top