«Վերջին Զանգը»

0605hagopladoyan

Յ. ԼԱՏՈՅԵԱՆ

 

0605hagopladoyan2018-2019 կրթական տարեշրջանի վերջին զանգը կը մօտենայ: Անցնող տարուան ընթացքին (Լիբանանի) հայկական բոլոր վարժարանները դիմագրաւեցին տնտեսական դժուարութիւններ,  աշակերտական թիւի նուազումներ, հայերէնաւանդ ուսուցիչներու, կազմակերպչական եւ վարչական տագնապներ:

Ճիշդ է՝ միշտ ալ հայ դպրոցը ունեցած է եւ պիտի ունենայ տագնապներ, սակայն հայ դպրոցի տագնապներու լուծումներու ճամբան անկեղծ արժեւորումներն են միայն:

Այսօր մեր հայ աշակերտներուն կարեւոր մէկ մասը օտար վարժարան կը յաճախէ, եւ այդ մասին կարծես այլեւս ո՛չ վերամուտին, ո՛չ Թարգմանչաց տօնին, ո՛չ կրօնական եւ ազգային ձեռնարկներու ընթացքին ակնարկ կայ: Կարծէք՝ յանձնուած ենք իրականութեան, կարծէք՝ հոսանքին դէմ պայքարելու թափը պակսած է մեր մէջ: Հայ դպրոցին հանդէպ գուրգուրանքը, տագնապը եւ հեռանկարը շատ մտահոգիչ իրավիճակ մը կը պարզէ:

Մինչ այդ վարժարաններ կը փակուին, ուրիշներ կը միացուին, նորերը կը կառուցուին, նոր նշանակումներ կ՛ըլլան, սակայն հիմնականը եւ ամէնէն կարեւորը՝ յանձնառութիւնը կը բացակայի: Ոգին կը կորսուի: Քարը, շէնքը եւ նորարարութիւնը կը շլացնէ բոլորը, սակայն որակը, ոգին եւ յանձնառութիւնը կը պակսին:

Չենք գիտեր, թէ ամէն տարի ո՞ր դպրոցին «Վերջին զանգը» պիտի հնչէ:

Անցեալին, երբ հայկական վարժարան կը փակուէր, գաղութը տակնուվրայ կ՛ըլլար, ահազանգ կը հնչէր, յօդուածներ, նոյնիսկ խմբագրականներ լոյս կը տեսնէին, այսօր առանց ձայնի՝ լուռ ականատես ենք դպրոցներու «Վերջին զանգերուն»:

Այս բոլորէն անդին՝ տնտեսական տագնապը, արտագաղթը, հայրենադարձութեան ալիքը, օտարանալու քաղքենի մագլցող ճիգը եւ մանաւանդ մեր արժեւորումներուն մէջ առարկայական ազդակներու պակասը մեծ հարցական մը ստեղծած են մեր կրթական համակարգի ապագային շուրջ:

Անկեղծանալու, առարկայական մօտենալու եւ լուծումներ բերելու պահն է: Վերջին զանգն է:

«ԱՍՊԱՐԷԶ».- Լատոյեան լիբանանահայ հասարակական գործիչ է, որու հնչեցուցած ահազանգին հանդէպ անտարբեր չենք կրնար մնալ: Յօդուածին մէջ միակ մխիթարական կէտը, անշուշտ, Լիբանանէն հայրենադարձութեան ալիքի ակնարկն է:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

One Comment;

  1. Վռամ said:

    Եթէ Լիբանանի՛ մէջ այսքան անմխիթար է մեր վիճակը՝ դեռ ի՞նչ սպասել միւս գաղթօճախներէն:

*

Top