ՀՕՄի «Նայիրի» Մասնաճիւղի Կրթանպաստները Յանձնուեցան

0000ARS-Nairy-Schol-Event2

ՄՈՆԹԵՊԵԼԼՕ.- Հինգշաբթի, 23 Մայիսին տեղի ունեցաւ ՀՕՄի «Նայիրի» մասնաճիւղի կրթանպաստներու յանձնումի տարեկան ձեռնարկը, որուն ընթացքին տեղի ունեցաւ նաեւ մասնաճիւղի նորագոյն անդամին երդման արարողութիւնը։

Այս տարի, Ալիս Մատէնլեանի անուան կրթանպաստները ստացան երկրորդական վարժարաններէ նոր շրջանաւարտ հետեւեալ ուսանողները՝ Էմըլի Էտիլեան («Ըփլայտ Թեքնալըճի»), Սիւզանա Թովմասեան (Մոնթեպելլոյի հանրային երկրորդական վարժարան), Աննա Մինասեան («Շուր») եւ Անի Խաչիկեան («Մեսրոպեան»)։

Կրթանպաստ ստացող ուսանողները ներկաներուն հետ բաժնեցին իրենց ապագայ ծրագիրները, որմէ ետք ելոյթներ ունեցան նաեւ ՀՕՄի «Նայիրի» մասնաճիւղէն կրթանպաստներ ստացած՝ Քարին Քուիլանոֆ եւ դոկտ. Քեթրին Ֆունտուքեան, պատմելով իրենց փորձառութիւնները եւ դարձեալ շնորհակալութիւն յայտնելով մասնաճիւղին, իրենց ցուցաբերած աջակցութեան համար։

Ապա, մասնաճիւղի ատենապետ Սոնա Ֆունտուքեան շնորհաւորեց կրթանպաստ ստացողները՝ յաջողութիւն մաղթելով անոնց եւ յիշեցնելով միշտ մեր սննդատու արմատներուն կառչած մնալու կարեւորութիւնը։

Ապա, ՀՕՄի «Նայիրի» մասնաճիւղի մանկամսուրի վարիչ Լիլիթ Բարսեղեան խօսեցաւ կրթական մշակ եւ ՀՕՄի նուիրեալ անդամ Ալիս Մատէնլեանի ազգայնանուէր գործունէութեան մասին։ Նշենք, որ Ալիս Մատէնլեանի մահէն ետք, մասնաճիւղը որոշած էր կրթանպաստներու ծրագիրը կոչել անոր անունով։

Այնուհետեւ, իր երդումը տալով՝ մասնաճիւղին շարքերուն միացաւ Վիոլեթ Ֆրետերիքսըն, հանդիսանալով մասնաճիւղի պատմութեան մէջ անոր ամենաերիտասարդ անդամներէն մէկը։ Երդման արարողութիւնը առաջնորդեցին Սոնա Ֆունտուքեան եւ ՀՕՄի Արեւմտեան Ամերիկայի Շրջանային վարչութեան անդամ Անիթա Ալթունեան, որ իր կարգին ՀՕՄին միացած էր «Նայիրի» մասնաճիւղին ճամբով։

Ապա, Համբարձման տօնին մասին ներկաներուն տեղեկութիւններ փոխանցեցին Աշոտ քհնյ. Գամպուրեան եւ Հեղինէ Հարպոյեան։ Հարպոյեան նաեւ Համբարձումին նուիրուած երգեր կատարեց, որմէ ետք տեղի ունեցաւ տօնին աւանդական վիճակաձգութեան արորողութիւնը։ Ձեռնարկը փակուեցաւ «Ամպի տակից» եւ «Համբարձում եայլա» երգերուն խմբային կատարումով։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top