Պուրկ Լէ Վալանսի Եւ Արնուվիլի Քաղաքապետները Կը Բողոքեն Դատարանի Որոշման Դէմ

0618frenchmayors

0618frenchmayors

ԵՐԵՒԱՆ, «Արմէնփրէս».- Ֆրանսայի Պուրկ լէ Վալանս եւ Արնուվիլ քաղաքներուն քաղաքապետները յայտարարեցին, որ մտադիր են բողոքել իրենց եւ Արցախի Հանրապետութեան տեղական եւ տարածքային մարմիններուն միջեւ ստորագրուած Բարեկամութեան հռչակագիրներու չեղարկման Կրընոպլի վարչական դատարանին որոշման դէմ։

Պուրկ լէ Վալանսի քաղաքապետ Մարլէն Մուրիէ յայտարարեց, որ մտադիր է բողոքել Հոկտեմբեր 2014ին Շուշիի քաղաքապետ Արծուիկ Սարգսեանի հետ ստորագրած բարեկամութեան հռչակագիրը չեղարկելու որոշման դէմ՝ դիտել տալով, որ ինք համոզուած է, թէ այս համաձայնագիրը կը համապատասխանէ օրէնսդրական կարգին։

Ան ըսաւ, որ իր հաստատումը հիմնուած է 5 Փետրուար 2019ին, Ֆրանսահայ կազմակերպութիւններու համակարգող խորհուրդի ընթրիքին ընթացքին Հանրապետութեան նախագահ Էմանուէլ Մաքրոնի յանձնառութեան վրայ, ըստ որուն, պետական հետապնդումներու չեն ենթարկուիր այն ծրագիրները, որոնք կը վերաբերին կրթական եւ մարդասիրական ոլորտներուն, որոնք հռչակագիրներուն ամէնէն էական մէկ մասը կը կազմեն:

Ան նաեւ նշեց, որ իրաւական գործօններէն բացի, անսասան կը մնայ իր բարոյական յանձնարարութիւնը շուշեցիներուն նկատմամբ։ «Ես բազմաթիւ անգամներ այցելած եմ Շուշի եւ հասկցած, թէ մարդասիրութեան ու բարեկամութեան արտայայտութիւնները ինչպիսի յոյս կը ներշնչեն սիրտին մէջ այն բնակչութեան, զոր թշնամական Ատրպէյճան կը փորձէ շնչահեղձ ընել», «Ֆէյսպուք»ի իր էջին վրայ գրած է Մարլէն Մուրիէ։

Նոյն արտայայտութեամբ եւ մտադրութեամբ հանդէս եկաւ Ֆրանսայի Արնուվիլ քաղաքի քաղաքապետ Փասքալ Տոլ, որ բարեկամութեան հռչակագիր կնքած էր Արցախի Շեխեր քաղաքին հետ։

«Ֆրանսական սահմանդրութիւնը տեղական մարմիններուն կը շնորհէ ազատ կառավարում եւ անոնց կու տայ բազմաթիւ ապակեդրոնացեալ իրաւասութիւններ, որոնց կարգին՝ միջազգային գործունէութիւն վարելու իրաւունք, պայմանով, որ այդ գործունէութիւնը յարգէ Ֆրանսայի միջազգային յանձնառութիւնները: Հռչակագիրը յայտարարութիւն է երկու ժողովուրդներուն միջեւ՝ մարմնակրթութեան, մշակոյթի, կրթութեան եւ այլ բնագաւառներու մէջ բարեկամութիւն հաստատելու մասին: Ասիկա ոչ մէկ ձեւով կ՛ոտնահարէ գործադիր իշխանութեան իրաւասութիւնները երկրի արտաքին քաղաքականութեան ոլորտին մէջ», յայտնեց քաղաքապետը:

Ըստ անոր՝ ասիկա մոլեռանդութեան հասնող հետապնդում է, զոր դժուար է բացատրել, բայց որուն սկզբնաղբիւրը ակնյայտօրէն դիւանագիտական շրջանակներուն մէջ պէտք է փնտռել։ «Յամենայնդէպս, զարմանալի է, որ չեղարկման կ՛ենթարկուի բարեկամութեան մասին պարզ յայտարարութիւն մը եւ, մասնաւորապէս, երբ անիկա կատարուած է տեղական մարմինի պատգամաւորի մը կողմէ, այդ ալ այնպիսի երկրի մը մէջ, որ խօսքի ազատութեան առաջատար կը նկատուի։ Նշեմ, որ քաղաքական եւ դատաիրաւական նման մոլեռանդութիւն կը գործէ միայն Արցախի դէմ», եզրափակեց Փասքալ Տոլ։

Միւս կողմէ, Հայաստանի Ազգային ժողովի արտաքին յարաբերութիւններու մնայուն յանձնաժողովի նիստին այս մասին հարցում ուղղեց Ազգային ժողովի «Բարգաւաճ Հայաստան» խմբակցութեան պատգամաւոր Արման Աբովեան, որուն պատասխանեց արտաքին գործոց փոխնախարար Գրիգոր Յովհաննիսեան, որ ըսաւ, թէ Ֆրանսայի դատարաններու որոշումները, անշուշտ, չեն մեկնաբաներ, բայց ակնյայտ է, որ մասնաւոր նախաձեռնութիւն է, դատական դիմում։ Ան դիտել տուաւ, որ ասոր համար չկայ հասարակական պահանջ: Չեմ կարծեր, թէ ասիկա կրնայ հետեւանք ունենալ Ֆրանսայի մէջ Արցախի եւ Արցախի ժողովուրդին նկատմամբ վերաբերումին վրայ: Անիկա չի կասեցներ ժողովրդավարական հորիզոնական դիւանագիտութիւնը, եւ քոյր քաղաքներու յարաբերութիւնները առաւել եւս կ՛ամրապնդուին։

Գրիգոր Յովհաննիսեան նաեւ նշեց, որ ֆրանսացի քաղաքական տարբեր գործիչներ ընդվզում արտայայտեցին այս որոշումին դէմ, հետեւաբար, Հայաստանի կառավարութիւնը այս առումով ընելիք չունի: Աւելի՛ն, նշեց ան, որ ներկայ օրակարգը աւելի կ՛ամրապնդէ Հայաստան-Ֆրանսա յարաբերութիւնները, ինչ որ պիտի նպաստէ, որ Արցախի արդար դատը շարունակէ լաւապէս ընկալուիլ Ֆրանսայի մէջ։

Ազգային ժողովի «Լուսաւոր Հայաստան» խմբակցութեան պատգամաւոր Արման Բաբաջանեան քննադատեց եւ ըսաւ, որ ֆրանսական դատարանի որոշումները Հայաստանի արտաքին քաղաքական գերատեսչութեան անգործութեան հետեւանքն են: «Դատարանների այս որոշումները կանխատեսելի էին, դրան նախորդել են Ադրբեջանի կողմից մեծածաւալ աշխատանքներ: Մենք անգործութեան ենք մատնուել ու յոյսն ամբողջութեամբ դրել Սփիւռքի ներուժի վրայ՝ ակնկալելով, որ Սփիւռքն այս հարցերի համար պէտք է լուծումներ գտնի: Նրանք էլ կարողացել են միայն փաստաբան գտնել, որը չի կարողացել ըստ արժանուոյն ներկայացնել հարցը: Սա հետեւանքներ է ունենալու ԵՄ անդամ միւս երկրների քաղաքների համար», նշեց ան։

Բաբաջանեան շեշտեց, որ Ֆրանսա պէտք է հասկնայ, թէ ասիկա Սփիւռքի հարցը չէ, այլ համահայկական նշանակութիւն ունի, որովհետեւ Արցախի վերաբերեալ որեւէ հարց մեզի համար համահայկական նշանակութիւն ունի:

«Խնդիրը լուրջ է։ Գործ ունենք դատական որոշման հետ՝ սրանից բխող տարբեր հետեւանքներով: Համաձայնէք, որ մեզ համար խնդիր կը լինէր, որ, օրինակ, որեւէ դեսպանատան աշխատող գար ու խօսէր որեւիցէ հայ դատաւորի մասին: Կարծում եմ՝ չէք վիճարկի, որ Ֆրանսիայում դատական անկախութիւն կայ, չնայած համաձայն եմ՝ խնդիր կայ ու պէտք է աշխատել այդ ուղղութեամբ համապատասխան օղակներով», ըսաւ արտաքին յարաբերութիւններու մշտական յանձնաժողովի նախագահ Ռուբէն Ռուբինեան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top