Արամ Ա. Դասախօսութիւն Տուաւ Գերմանական Համալսարանի Դասախօսներուն Եւ Ուսանողներուն  

0000GERMANY1

0000GERMANY1

ԱՆԹԻԼԻԱՍ.- Ուրբաթ, 14 Յունիսին, նախապէս ճշդուած ժամադրութեան համաձայն, Անթիլիասի Մայրավանք այցելեցին Գերմանիոյ զանազան համալսարաններէ եկած խումբ մը՝ բաղկացած դասախօսներէ եւ դոկտորային աստիճանի պատրաստուող ուսանողներէ: Այցելութեան նպատակն էր լսել վեհափառ հայրապետը կրօնքին եւ քաղաքականութեան առնչութեան մասին՝ նկատի ունենալով, որ ներկաներուն մասնագիտութիւնը յիշեալ բնագաւառն է:

Կաթողիկոսը ընդհանուր ներածականէ մը ետք կեդրոնացաւ պատմութեան Արեւելքի ու Արեւմուտքի մէջ միաստուածեան երեք կրօններուն գծով տեղի ունեցած զարգացումներուն մասին. ապա, բաղդատական մօտեցումով ծանրացաւ քրիստոնեայ-իսլամ կրօններուն վրայ, յատկապէս նկատի ունենալով Միջին Արեւելքը՝ իբրեւ ծննդավայրը յիշեալ կրօններուն:

Հայրապետը նախ պարզեց քրիստոնէութեան ու իսլամութեան ինքնահասկացողութիւնը, միշտ բաղդատական մօտեցումով. քրիստոնէութեան պարագային, պարզեց կրօնքին թէ՛ առնչութիւնը եւ թէ հեռաւորութիւնը քաղաքականութենէն, եւ իսլամութեան պարագային՝ նոյնացումը քաղաքականութեան հետ:

Կաթողիկոսը յիշեց երկու պարագաներուն կրօնք-քաղաքականութիւն առնչութեան դրական եւ բացասական հետեւանքները: Ան նաեւ շեշտեց այս գծով հասարակաց յայտարարները երկու կրօններուն միջեւ: Վեհափառը կարեւորութեամբ ընդգծեց կրօնքին դերը՝ իբրեւ բարոյական հեղինակութիւն, հաշտարարի եւ միջնորդի դերակատարութեամբ, ինչպէս նաեւ իբրեւ ճշմարտութեան, արդարութեան եւ խաղաղութեան առաքեալ:

Առաւել քան ժամ մը տեւած դասախօսութենէն ետք, կաթողիկոսը պատասխանեց ներկաներուն ուղղած հարցումներուն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top