Լոս Անճելըսի Հայ Քոյրերու Վարժարանի Ամավերջի Հանդէսները

0000ASA2019 Grad5

 

ԼԻՆՏԱ ԳԱՆՏԻԼԵԱՆ

 

Հայ Քոյրերու վարժարանը իր երեք բաժիններով՝ մանկապարտէզ, նախակրթարան եւ միջնակարգ,  2018-2019 տարեշրջանի ուսումնական, ընկերային եւ մշակութային ծրագիրները յաջողութեամբ աւարտեց, իւրաքանչիւր աւարտական դասարանի յատուկ արարողութեամբ եւ հանդիսութեամբ յանձնեց  համապատասխան վկայականները, մաղթելով յաջող եւ հեզասահ յառաջխաղացք դէպի նոր ուսումնական հանգրուան:

6 Յունիսի յետմիջօրէին տեղի ունեցաւ վարժարանիս նախամանկապարտէզի հանդէսը, երբ երեխաները մեծ խնդավառութեամբ գեղագոյն եւ փայլուն տարազներով, հայկական աշխոյժ երգերու եւ երաժշտութեան ընկերակցութեամբ պարեցին, ցատկեցին՝ արտայատելով մանկական աշխարհի ամենագեղեցիկ եւ անմեղ շարժուձեւերը, ծնողներու հոգիները լեցնելով երջանկութեամբ եւ անոնց պարգեւելով հաճոյքի պահեր:

7 Յունիսի յետմիջօրէին, զարդուած էր վարժարանի շրջափակը իր մանկապարտէզի շրջանաւարտներու գոյնզգոյն տարազներով։ Անոնք մեծ խանդավառութեամբ եկած էին իրենց վերջին հրաժեշտը տալու մանկական աշխարհին, խաղին ու պարին եւ փոխանցուելու նախակրթարան:

Մանկապարտէզի տնօրէնուհի Սոնա Գազանճեանի բացման խօսքով ընթացք առաւ հանդէսը. բեմահարթակին վրայ ներկայացուեցան հայկական հեզաճկուն եւ առնական  շուրջպարեր,  ազգագրական երաժշտութիւն, հաճելի եւ անմոռանալի վայելք պատճառելով ծնողներուն եւ ներկաներուն: Ապա աշակերտները ստացան իրենց վկայականները։

Աւարտին, տնօրէնուհի քոյր Լուսիա շնորհաւորեց ծնողները, շնորհակալութիւն յայտնեց ուսուցիչներուն, իրենց նուիրեալ աշխատանքին համար:

Ութերորդ դասարանի աշակերտները ամբողջ 10-11 տարիներ անցուցած էին այս յարկին տակ եւ անոնք պիտի վկայուէին ու պիտի մեկնէին երկրորդական տարբեր վարժարններ, շարունակելու իրենց ուսումը, միշտ հիմք ունենալով Հայ Քոյրերու վարժարանին ջամբած գիտելիքները՝ հայեցի եւ քրիստոնէական դաստիարակութիւնը:

Վարժարանին համար գեղեցիկ աւանդոյթ դարձած է ութերորդ դասարանի աւարտական հրաժեշտը սկսիլ հանդէսէն շաբաթ մը առաջ՝ եկեղեցական արարողութամբ, երբ աշակերտները իրենց մասնակցութիւնը կը բերեն Ս. պատարագին, կը ներկայացնեն իրենց սրտի խօսքերը եւ երախտագիտական խօսքեր կ՛ուղղեն Աստուծոյ, եկեղեցւոյ, դպրոցի անձնակազմին, ուսուցիչներուն եւ տնօրէնութեան, ուխտելով ըլլալ լաւ քաղաքացիներ եւ պատուաբեր հայ քրիստոնեաներ:

Այսպէս, 2 Յունիսին, Կլենտէյլի Սուրբ Գրիգոր Լուսաւորիչ Հայ կաթողիկէ աթոռանիստ եկեղեցին աննախընթաց փայլք մը ունէր. 17 շրջանաւարտներ յաղթական մուտք գործեցին եկեղեցի, առաջնորդութեամբ՝ Միքայէլ եպս. Մուրատեանի, մայրապետներուն, եկեղեցւոյ դպրաց դասին, սարկաւագներուն եւ դաստիարակներուն. անոնք գրաւեցին իրենց տեղերը, եկեղեցւոյ սպասները խորան ներկայացնելէ ետք: Բոլորն ալ մասնակցեցան արարողութեան. ընթերցուածները կարդացին՝ Սէրակ Էքմէքճեան եւ Մարի Պասմաճեան, իսկ սրտի խօսքերը  ներկայացուցին Եւա Զաքքօ եւ Լեւոն Մարկոսեան:

Օրուան պատարագիչը՝ Միքայէլ եպս. Մուրատեան յատուկ պատգամով մը շնորհաւորեց բոլոր մասնակցողները՝ մատնանշելով, որ այդ Կիրակին կը զուգադիպի Երկրորդ Ծաղկազարդին եւ իւրաքանչիւր աշակերտ՝ իբրեւ յատուկ ծաղիկ պիտի երթայ եւ զարդարէ տարբեր դպրոցներ, շնորհիւ իրենց ստացած հայկական եւ քրիստոնէական դաստիարակութեան: Եկեղեցական յուզումնալից արարողութեան աւարտին, ծնողք, աշակերտ եւ դաստիարակ՝ հոգեկան մեծ բաւարարութեամբ վերադարձան տուն, դարձեալ հանդիպելու յաջորդ Կիրակի, աւարտական պաշտօնական հանդիսութեան:

Կիրակի, 9 Յունիսի յետմիջօրէին, վարժարանիս «Դանիէլեան» սրսահին մէջ տեղի ունեցաւ 2018-2019 տարեշրջանի միջնակարգ բաժինի աւարտական պաշտօնական հանդիսութիւնը: Ներկայ էին Հայ կաթողիկէ համայնքի առաջնորդ Միքայէլ եպս. Մուրատեան, վարժարանիս քոյրերը, տնօրէնութիւնը, անձնակազմը, ուսուցչական կազմը, ծնողներ, հիւրեր եւ բարեկամներ:

Հանդիսութեան յայտագիրը կը պարունակէր խմբային ոտանաւոր, հայերէն եւ անգլերէն խմբային երգեր, խմբավարութեամբ վարժարանիս երաժշտութեան ուսուցչուհի Վարդուհի Պաղտասարեանի։ Առաւել, փոխանցուեցան պաշտօնական երկլեզու խօսքեր՝ տնօրէնուհի քոյր Լուսիայի եւ դաստիարակներ Լինտա Գանտիլեանի եւ Էտմոն Համբարձումեանի կողմէ: Աշակերտական ուղերձները ներկայացուցին Սթելլա Շպաթ եւ Կրէկ Քիւրքճեան, իսկ Նախագահական մրցանակակիրներու խօսքը տուաւ Անտրու Պէրպէրեան։ Աշակերտական խորհուրդի ատենապետուհի Սոֆիա Ջաբարեան ամփոփեց տարուան ընթացքին տարուած աշխատանքը եւ իր խօսքի աւարտին աշխատանքային թղ-թածրարը յանձնեց  նորընտիր ատենապետ Սասուն Քէոհնէլեանին:

Օրուան հիւր պատգամաբերն էր վարժարանիս 2006 տարեշրջանի շրջանաւարտներէն Լարա Գումճեան, որ իր մասնագիտութենէն եւ փորձառութենէն մեկնած՝ աշակերտներուն յորդորեց միշտ երախտապարտ ըլլալ եւ գոհանալ իրենց ունեցածով, հաւատարիմ մնալով Հայ Քոյրերու վարժարանին:

Հանդիսութիւնը շարունակուեցաւ մրցանակներու եւ կրթաթոշակներու տուչութեամբ.

Արմէն Տօնոյեանի անուան կր-թաթոշակը՝ հայերէնի բարձրագոյն միջին ունեցող աւարտական Սթելլա Շպաթ:

Օլիվիա Թալին Գանտիլեանի անուան կրթաթոշակը՝ հայ կնոջ ուժն ու յարատեւութիւնը ցուցաբերող աւարտականներ ստացան Սոֆիա Ջաբարեան եւ Այլին Սամուէլեան:

Յակոբ Փիլաւեանի անուան կրթաթոշակը՝ հայ կրթօճախի հաւատարմութիւն ցուցաբերող աւարտական Ալեք Բագարեան:

Նաեւ գնահատագիր յանձնուեցաւ Անտրու Պէրպէրեանին, «Սուրբ Ֆրանսիս» երկրորդական վարժարան մուտքի քննութեան գերազանց արդիւնքներ ստանալուն համար:

Հանդէսի վերջաւորութեան, ա-ռաջնորդը իր սրտի խօսքը փոխանցեց շրջանաւարտներուն եւ Պահպանիչով փակուեցաւ հանդիսութիւնը, մինչ շրջանաւարտները իրենց վկայականները եւ նուէրները ստանձնելէ ետք, հրաժեշտ տուին Հայ Քոյրերու վարժարանի ընտանիքին, խոս-տանալով  միշտ զօրավիգ կանգ-նիլ իրենց առաջին կրթօճախին:

Նախակրթարանի աւարտականները՝ հինգերորդ դասարանի աշակերտները, Չորեքշաբթի, 19 Յունիսի կէսօրին ստացան նախակրթարանը յաջողութեամբ աւարտած ըլլալու իրենց վկայագիրները եւ փոխանձուեցան նոյն վարժարանի միջնակարգ բաժինը:

Կը շնորհաւորենք եւ յաջողութիւն կը մաղթենք բոլոր շրջանաւարտներուն եւ շնորհակալութիւն կը յայտնենք բոլոր ծնողներուն, դաստիարակներուն եւ նուիրատուներուն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top