ՀՕՄի «Անահիտ» Մասնաճիւղի Շաբաթօրեայ Վարժարանի Ամավերջի Հանդէսը

0621anahidsaturday1

0621anahidsaturday1

Միացեալ Նահանգներու մէջ, հայապահպանման կարեւոր կեդրոններ դարձած ՀՕՄի շաբաթօրեայ վարժարանները հպարտութիւն ներշնչող կարեւոր հաստատութիւններ են այսօր: Իւրաքանչիւր շրջանի մասնաճիւղ իր լաւագոյնը կը փորձէ տալ հայապահպանման այս մեծ եւ կարեւոր  աշխատանքին:

14 Յունիսի երեկոյեան ժամը 7ին, Ֆերահեան Ազգային վարժարանի սրահին մէջ տեղի ունեցաւ ՀՕՄի «Անահիտ» մասնաճիւղի շաբաթօրեայ վարժարանի ամավերջի հանդէսը: Ներկայ էին  Ռազմիկ Ա. քհնյ. Խաչատուրեան, Շրջանային վարչութեան եւ մասնաճիւղիս կապը՝ Արշօ Աւագեան, վարչական կազմի անդամուհիներ, Համազգայինի ներկայացուցիչ Արաքսի Գազանճեան, ծնողներ, ՀՕՄուհիներ եւ հիւրեր:

Մեր սիրելի աշակերտները ամբողջ տարուան ընթացքին, իրենց դասերուն կողքին, ազգային եւ կրօնական տօնական օրերը յիշեցին, հանդէսներ կատարեցին եւ ծանօթացան մեր ազգի պատմութեան:

Անոնք մասնակցեցան խնամակալ մարմինին կազմակերպած ընդհանուր զարգացման մրցումին, ներկայ եղան Ապրիլ 24ի հանդիսութիւններուն՝ այցելելով Մոնթեպելլոյի յուշարձանը, Բարեկենդանի առթիւ մասնակցեցան Հայ Քոյրերու վարժարանին մէջ տեղի ունեցած ձեռնարկին եւ այցելեցին «Արարատ տան» թանգարանը:

Այդ օրը, տարեվերջի հանդէսով, իրենց աշխատանքը եզրափակեցին։ Ընթացքին անոնք փառաբանեցին երկու հանճարներ՝ Յովհաննէս Թումանեանը եւ  Կոմիտաս վարդապետը, անոնց ծննդեան 150ամեակին առթիւ: Բեմը զարդարուած էր երկու տիտաններու մեծադիր նկարներով:

 

Արժանապատիւ  Տէր Ռազմիկ աւագ քահանայ Խաչատուրեան հանդէսի բացման աղօթքը կատարեց, շնորհաւորեց աշակերտութիւնը, շրջանաւարտները, տնօրէնութիւնը եւ ուսուցչական կազմը:

Ռազմիկ Ա. քհնյ. Խաչատուրեան իր բացման խօսքով ողջունեց ներկաները, դրուատեց ՀՕՄի կատարած ծառայութիւնները, որոնք, գաղափարին հաւատալով եւ համերաշխ ոգիով՝ առաջին հիմնադիրները եղած են շաբաթօրեայ վարժարաններուն: Այս տարեշրջանին, ՀՕՄի «Անահիտ» մասնաճիւղը հպարտութեամբ տօնեց վարժարանիս 45ամեակը:

Տէր հայրը յայտնեց, որ այս տարուան հանդէսը նուիրուած է երկու տիտաններու՝ ամենայն հայոց բանաստեղծ Յովհաննէս Թումանեանի եւ հայ երգի Մեսրոպ Մաշտոց՝ Կոմիտասի, անոնց  ծննդեան 150ամեակին առթիւ: Ան հակիրճ, բայց իմաստալից կերպով տուաւ երկու  մեծութիւններուն կենսագրականը եւ անոնց բերած մեծ ներդրումը հայոց մշակութային անդաստանին մէջ:

Բացման խօսքին յաջորդեց զոյգ հայկական եւ ամերիկեան քայլերգները աշակերտներու կատարողութեամբ:

Աւարտական դասարանէն Կապի Եղիայեան ընթերցեց Կոմիտաս վարդապետի կենսագրութիւնը,  որուն յաջորդեց մանկապարտէզի փոքրերուն «Այբ, Բեն, Գիմ», «Մայր Հայաստան» եւ «Ով Եմ Ես» խմբերգները, ապա՝ «Կռունկներ» եւ «Մարտ» ոտանաւորները:

Փոքրերը խմբերգեցին «Միշտ Առաջ», «Կագաւիկ» եւ «Մայրենի Լեզու» երգերը:

Մանկապարտէզի փոքրերը իրենց յայտագիրը աւարտեցին մանկական աշխուժութեամբ  պարելով «Ծափ-Ծափ» եւ «Քոչարի» պարերը:

Տիգրան Գազանճեան ընթերցեց  Յովհաննէս Թումանեանի կենսագրութիւնը, որուն  յաջորդեցին  հեղինակին ստեղծագործութիւններէն՝ «Կանաչ Ախբեր» եւ «Հայրենի Դաշտեր»  ոտանաւորները՝ կատարողութեամբ առաջին եւ երկրորդ դասարանի աշակերտներուն:

Առաջինէն-հինգերորդ դասարաններու աշակերտները խմբերգեցին Կոմիտասի «Հոյ Նազան»,  «Սարերի Հովին» եւ «Հէյ Ջան Երեւան» երգերը: Երգերուն ընթացքին, նազանքով կատարուած պարային շարժումները խոր տպաւորութիւն գործեցին ներկաներուն վրայ: Պարուսոյց Քաթրին Հայրապետեանի յղացումով կատարուած նազելի շարժումները փոխանցեցին այնպիսի քաղցրութիւն  որ խմբերգներուն տուին բացառիկ անուշութիւն, եւ երգի ուսուցչուհի Անժէլա Եկորեանի աշխատանքը դարձուցին շատ աւելի տպաւորիչ:

Երկու աշակերտուհիներ, որոնք առանց հայերէն իմանալու՝ իրենց յարատեւ աշխատանքով  կրցան սորվիլ երկու ոտանաւորներ՝ «Ուրագ» եւ «Գրադարանս» եւ իրենց բաւական յաջող ելոյթով երջանկացուցին իրենց  ծնողները եւ ուսուցչուհիները:

Երրորդ, չորրորդ եւ հինգերորդ դասարաններու աշակերտները զգացումով արտասանեցին  Թումանեանի «Հին Օրհնութիւն» ոտանաւորը:

«Կաթիլ Մը Մեղր» հեքիաթը՝ թատերախաղի վերածուած, հարազատ կերպով ներկայացուցին  երրորդէն հինգերորդ դասարաններու աշակերտները:

Գնահատանքի արժանի էր «Կատակ Պար»ը (պարուսոյց՝ Քաթրին Հայրապետեան)։ «Զինուոր Ենք Մենք» խմբերգը մեծ խանդավառութեամբ երգեցին աշակերտները եւ արժանացան մասնաւոր գնահատանքի (երգի եւ երաժշտութեան ուսուցչուհի՝ Անժէլա Եկորեան):

Պահը հասած էր գնահատագիրներու յանձնումին: Ընդհանուր զարգացման մրցումին մասնակցած 15 աշակերտները ստացան գնահատագիրներ:

Այս տարեշրջանին, վարժարանը ունեցաւ չորս շրջանաւարտներ՝ Կեպի Եղիայեան,

Լեռնիկ Տաղտէվիրեան, Շանթ Գասպարեան եւ Տիգրան Գազանճեան: Իւրաքանչիւրը իր սրտի խօսքով յայտնեց իր երախտագիտութիւնը շաբաթօրեայ դպրոցին հանդէպ եւ դրուատեց  անմոռանալի յիշատակները:

Անոնք խոստացան, որ իրենց մէջ դրոշմուած հայու հոգին միշտ պիտի պահեն իրենց մէջ, եւ միշտ պիտի խօսին, գրեն ու կարդան հայերէն:

Շրջանայինի ներկայացուցիչը՝ Արշօ Աւագեան գնահատեց կատար-ուած յաջող աշխատանքը, ծնողներու զոհողութեան ոգին, շնորհաւորեց ՀՕՄի «Անահիտ» մասնաճիւղը, որ կը գուրգուրայ իր շաբաթօրեայ վարժարանի աշակերտներուն վրայ՝ իբրեւ հարազատ զաւակներ:

Վարչութեան ատենապետուհի Շաքէ Թոքաթլեան գնահատական խօսքերով՝ շնորհաւորեց  աշակերտները, տնօրէնութիւնը եւ ուսուցչական կազմը, կատարուած յաջող հանդէսը եւ մաղթանքներ փոխանցեց շրջանաւարտ աշակերտներուն եւ ծնողներուն:

Արշօ Աւագեան եւ Շաքէ Թոքաթլեան՝ տնօրէնուհիին մասնակցութեամբ յանձնեցին վկայականները:

Շրջանաւարտ աշակերտները ՀՕՄի «Անահիտ» մասնաճիւղին կողմէ ստացան նիւթական նուէրներ:

Անի Մաճառեան ոգեւորուած հանդէսի յաջողութենէն, ինչպէս ամէն տարի՝ կատարեց համեստ նուիրատուութիւն մը, որ տրուեցաւ աւարտական աշակերտներէն  յառաջադէմ եւ պարկեշտ աշակերտ Կեպի Եղիայեանին:

Եղան նաեւ այլ նուիրատուութիւններ:

Բեմ հրաւիրուեցան ուսուցչուհիները եւ յանձնախումբի անդամուհիները, ու վարչութեան կողմէ ծաղկեփունջերով գնահատուեցան:

Հանդէսի աւարտին եղաւ հիւրասիրութիւն մեծամասնութեամբ շրջանաւարտ աշակերտներուն  ծնողներուն կողմէ:

Վարձքը կատար բոլոր անոնց, որոնք նպաստեցին այս յաջող ձեռնարկին իրականացման:

 

(Թղթակցութիւնը՝

մասնաճիւղէն)

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

Top