Գռուզեան Զաքարեան Վասպուրականի Ամավերջի Հանդէսը Եւ Վկայականներու Բաշխումը

Կրէյս Անտոնեան

ՆՈՒՊԱՐ ՏԷՄԻՐՃԵԱՆ

 

Գռուզեան Զաքարեան Վասպուրական (ԳԶՎ) Ազգային վարժարանի 2018-2019 տարեշրջանի ամավերջի հանդիսութիւնը տեղի ունեցաւ Շաբաթ, 8 Յունիսին, երեկոյեան ժամը 5էն սկսեալ, Սան Ֆրանսիսքոյի Հայ կեդրոնի «Սարոյեան» սրահին մէջ: Հանդիսութեան ներկայ էին եւ բացման աղօթքը կատարեցին Ս. Գրիգոր Լուսաւորիչ եկեղեցւոյ հոգեւոր հովիւ Պարոյր վրդ. Շէրնէզեան, եւ Ս. Յովհաննէս եկեղեցւոյ հոգեւոր հովիւ Մեսրոպ քհնյ. Աշ, Ազգային վարչութեան անդամ Կարպիս Պէզճեան, շրջանաւարտներու ծնողներ, հարազատներ եւ միութիւններու ներկայացուցիչներ:

Հանդիսութիւնը սկսաւ Միացեալ Նահանգներու, Հայաստանի Հանրապետութեան եւ ԳԶՎի քայլերքներու կատարումով, ապա հանդիսութեան բացման խօսքով հանդէս եկաւ եւ հանդիսութիւնը ձեռնհասօրէն վարեց ԳԶՎի ուսուցչուհիներէ Կարինէ Փանոսեան: Ան իր խօսքին ընթացքին նաեւ յիշեց, թէ այս տարի Արամ Ա. վեհափառը «Հայ մամուլի տարի» հռչակած է եւ ըսաւ. «Իմ սիրտիս ու դաստիարակութեանս շատ հարազատ արժէք մըն է: Բոլորիս ծանօթ արհեստագիտութեան յառաջացումով, վտանգուած է տպագիր մամուլը ընդհանրապէս եւ հայկականը՝ առաւելապէս: Մենք յաճախ կը կրկնենք, թէ աւարտելէ ետք, մեր աշակերտները պէտք է ինքնաշխատութեամբ, ընթերցանութեամբ եւ վճռակամութեամբ իրենց հայերէնագիտութիւնը զարգացնեն եւ վստահ ենք, որ մամուլը մեծ դեր կրնայ խաղալ: Մեր մաղթանքն է, որ մեր նոր սերունդը, աւելի յանձնառութեամբ զօրավիգ կանգնի մեր տպագիր մամուլին, փայփայէ մայրենին, ընթերցէ, բաժանորդագրուի եւ բարոյապէս եւ նիւթապէս օժանդակէ ու մանաւանդ աշխատակցի հայ մամուլին»:

Շնորհաւորական ու քաջալերական խօսքերով յաջորդաբար խօսք առին՝ ԳԶՎ վարժարանի խնամակալ մարմինի ներկայացուցիչ Սագօ Պէզճեան, ՀՕՄի «Կարին» մասնաճիւղին կողմէ՝ Ճիւտի Ճինկիրեան։ Ան նաեւ յանձնեց գերազանց աշակերտի մրցանակ Արտա Թազեանին:

Ս. Գրիգոր Լուսաւորիչ եկեղեցւոյ կողմէ ելոյթ ունեցաւ հոգաբարձութեան անդամներէն Վահան Տէրունեան, որ իր մաղթանքներէն ետք գերազանց աշակերտի մրցանակը յանձնեց Գրիգոր Քարակէօզեանին:

1997ի տարեշրջանի շրջանաւարտներէն ելոյթ ունեցաւ Նոյեմի Շահինեան, մաղթելով շրջանաւարտներուն, թէ յառաջիկայ տարիներուն, ո՛ր դպրոցներն ալ յաճախեն, չմոռնան ԳԶՎի վարժարանը եւ իրենց անցեալը:

Ապա, Կարինէ Փանոսեան հրաւիրեց շրջանաւարտները իրենց խմբային արտասանութիւնը կատարելու. անոնք խոր ապրումով արտասանեցին Յովհաննէս Շիրազի «Ամենայն Սրտով»ը, արժանանալով բուռն ծափահարութիւններու:

Հոս կ՛արժէ յիշել նաեւ 9 շրջանաւարտներու անունները՝ Միքի Ալոյեան, Դանիէլ Երեմեան, Գրիգոր Գարակէօզեան, Արթուր Ղազարեան, Կարէն Կիրակոսեան, Ճան Մկրտիչեան, Արտա Թազեան, Ալիսա Թեհլիրեան եւ Ատելիա Թովարեան։ Անոնք յաջորդաբար ստացան իրենց ամավերջի վկայականները, հանդիսականներու ծափողջոյններուն տակ, ձեռամբ տնօրէնուհի Կրէյս Անտոեանի եւ Պարոյր վրդ. Շէրնէզեանի, որմէ ետք հանդիսավարուհին, շնորհաւորելով շրջանաւարտները՝ թելադրեց դարձնել իրենց ծոպերը աջէն՝ ձախ:

Աւարտին, իր սրտի խօսքը եւ պատգամը տուաւ տնօրէնուհի Կրէյս Անտոնեան, ըսելով. «Ազգային առաքելութիւնն է ուսման կողքին կերտել հայ մարդն ու պիտանի քաղաքացին, որ պիտի ծառայէ իր ազգին։ Մենք կը հաւատանք, որ մեծ է դերը հայ վարժարաններուն. հոն կը տրուի ազգային դաստիարակութիւն, հայ մանուկին սիրտին մէջ հայ ազգային պատկանելիութեան վեհ դաստիարակութիւնը կը դրոշմուի, եւ անոնք կը հասնին իրենց նպատակներէն շատերուն: Դպրոցին առաքելութիւնը մեզի համար սրբազան երրորդութիւն մըն է՝ պատշաճ կրթութիւն, հայեցի դաստիարակութիւն ու մարդ արարածի կերտում: Կասկած չկայ, թէ ուսումնական գետնի վրայ ԳԶՎ վարժարանը կը գտնուի առաջատար դիրքի վրայ, վկայ՝ մեր շրջանաւարտներուն արձանագրած գերազանց արդիւնքները»:

Շարունակելով իր խօսքը, տնօրէնուհի Անտոնեան ըսաւ. «Սիրելի շրջանաւարտներ, հայեցի շունչով դաստիարակուած եւ ձեր արմատները լաւ ճանչցած՝ դուք պիտի կարենաք լաւ կատարել ձեզի վստահուած գործը եւ տէր պիտի կանգնիք Հայ Դատին: Փորձեցէք ձեր ստացածը ի սպաս դնել մեր ժողովուրդին, մեր հայրենիքին, մեր արդար դատին։ Կը մաղթենք, որ մնաք միշտ այսպէս հայօրէն հպարտ ու միշտ մասնակից՝ հայ ազգի եւ հայրենիքի կարիքներու մատակարարման:

Վերջապէս, անհուն գոհունակութեամբ կը շնորհաւորեմ մեր այս տարուան շրջանաւարտները: Համոզուած եմ ձեր ուժին, ձեր կարողութեան եւ ձեր միտքի թռիչքին։ Յաջողութի՛ւն ձեզի. երթա՛ք բարով»:

Հանդիսութիւնը վերջ գտաւ ներկայ հոգեւոր հայրեր Պարոյր վրդ. Շէրնէզեանի եւ Մեսրոպ քհնյ. Աշի աղօթքներով ու օրհնութեամբ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top