Պոլսոյ Ընտրութիւններուն Իշխող Կուսակցութիւնը Դարձեալ Պարտուեցաւ

0625ekremolu

0625ekremolu

ՊՈԼԻՍ, «Ռոյթըրզ».- Կիրակի, 23 Յունիսին, Պոլսոյ մէջ տեղի ունեցած քաղաքապետի կրկնակի ընտրութիւններուն վերջնական, սակայն ոչ պաշտօնական արդիւնքներուն համաձայն՝ գլխաւոր ընդդիմադիր՝ քեմալական Հանրապետական ժողովրդային կուսակցութեան թեկնածու Էքրեմ Իմամօղլու անգամ մը եւս յաղթանակ արձանագրեց։

Արդարեւ, ըստ Թուրքիոյ կեդրոնական ընտրական յանձնաժողովին՝ ընդդիմադիր «Ազգ» դաշինքը ներկայացնող Իմամօղլու հաւաքած է քուէներուն 54.21 տոկոսը, համոզիչ յաղթանակ մը արձանագրելով իշխող Արդարութիւն եւ բարգաւաճում կուսակցութեան թեկնածու եւ նախկին վարչապետ Պինալի Եըլտըրըմին դէմ, որ ստացաւ քուէներուն 44.99 տոկոսը:

Իմամօղլուն ստացաւ 4,741,868 ձայն, իսկ Եըլտըրըմ՝ 3,935,453, ինչ որ առաւել քան 800 հազարով նուազ է ընդդիմադիր թեկնածուին ապահոված քուէներէն:

Ընտրութիւններուն մասնակցեցան ընտրելու իրաւունք ունեցող քաղաքացիներուն 84.5 տոկոսը:

Ամերիկեան մամուլը լայնօրէն արձագանգեց Պոլսոյ քաղաքապետի ընտրութիւններուն, որոնք երկորդ անգամն ըլլալով տեղի ունեցան այս տարի, որովհետեւ իշխանութիւնները օրինական խախտումներու պատրուակով փորձած էին Իմամօղլուն քաղաքապետի ազդեցիկ պաշտօնէն հեռու պահել:

Շեշտուեցաւ, որ վերընտրութեան ընթացքին քուէներու տարբերութիւնը զգալիօրէն աճած է, ի նպաստ ընդդիմութեան ներկայացուցիչին:

«Ուոլ Սթրիթ Ճըրնըլ»ը կը նշէ, որ այս արդիւնքը, ըստ էութեան, աւելի ակներեւ դարձուց իշխող քաղաքական ուժի ներկուսակցական հարցերը, իսկ «Նիւ Եորք Թայմզ»ը շեշտեց, որ իշխող կուսակցութեան նշեալ պարտութիւնը կարելի է համարել Թուրքիոյ նախագահ Ռեչեփ Թայիփ Էրտողանի քաղաքական ասպարէզի մեծագոյն պարտութիւնը:

Թուրքիոյ խորհրդարանի հայ պատգամաւոր Կարօ Փայլան այս մասին գրեց՝ ըսելով. «Էրտողանի՝ մէկ մարդու կառավարման վարչաձեւը տապալեցաւ: Այս գիշեր բոլորով շուրջպար պիտի բռնենք, իսկ վաղն ալ պիտի պատրաստուինք նոր ժողովրդավարութեան կառուցման»։

Իր կարգին, Թուրքիոյ խորհրդարանի հայազգի նախկին պատգամաւոր եւ Իմամօղլուի կուսակից Սելինա Տողան «Թուիթըր»ի վրայ շնորհաւորեց անոր յաղթանակը եւ մէջբերեց անոր յետընտրական առաջին ելոյթի խօսքերը։ «Էքրեմ Իմամօղլու կ՛ըսէ. «Այս քաղաքին մէջ փոքրամասնութիւններ չկան: Այս քաղաքին մէջ մենք մեր գիրկը պիտի առնենք բոլորը՝ յոյները, հայերը, ասորիները, հրեաները»։ Շնորհակալութիւն Իմամօղլուին Պոլսոյ մէջ բազմակարծութիւնը եւ բոլորին ինքնութիւնը կարեւոր համարելուն համար», կը գրէ Տողան:

Նշենք, որ ընտրութեան սեմին, Քիւրտիստանի բանուորական կուսակցութեան ցմահ բանտարկութեան դատապարտուած ղեկավար Ապտուլլահ Օճալան անակնկալ կերպով կոչ ըրած էր քիւրտերուն, որ չքուէարկեն՝ ո՛չ Իմամօղլուի, ոչ ալ Եըլտըրըմի ի նպաստ։ Քրտամէտ Ժողովրդային ժողովրդավարութիւն կուսակցութեան շրջանակները անհանգստացան այս կոչէն։

«Մարմարա»ն կը գրէ, որ Օճալանի այս կոչը «երկու օրէ ի վեր անօրինակ փոթորիկ մը պայթեցուցած է»։ Յայտնի դարձած է, որ Օճալան այս կոչը ըրած է նամակով մը, որ յանձնուած է բանտ այցելած ընկերաբան Ալի Քեմալ Էօզճանին։

Հանրային կարծիքը եւ մամուլը հարց կու տան, թէ ինչպէ՛ս կը պատահի, որ այսպիսի անծանօթ անձի մը կ՛արտօնուի, որ Իմրալը երթայ ու տեսակցի Օճալանի հետ։ Կը մեղադրուի նաեւ «Անատոլու» լրատու գործակալութիւնը, որ հաղորդած է այդ լուրը։

Ընդդիմադիր շրջանակները կը պնդեն, որ իշխող կուսակցութիւնը այս քայլով կը փորձէ շահագործել Օճալանը, որ իրենց կողմէ «երեխաներու ոճրագործ» կ՛անուանուէր։

Յիշեցնենք, որ քրտամէտ կուսակցութիւնը կը զօրակցէր Իմամօղլուին։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top