Բերիոյ Հայոց Թեմի Նորընտիր Առաջնորդին Առաջին Պատարագը

0000BADARAK

0000BADARAK

ԽՈՐԷՆ ՔՀՆՅ. ՊԷՐԹԻԶԼԵԱՆ

 

Բերիոյ Հայոց թեմի նորընտիր առաջնորդ Մասիս եպս. Զօպուեանի Հալէպ ժամանումը աւետաբեր արձագանգ ունեցաւ Թեմիս տարածքին: Հալէպ քաղաքը բարի գալուստի շքեղ ընդունելութեան պերճախօս թարգմանը հանդիսացաւ:

Արդարեւ, Կիրակի, 16 Յունիսին, Սրբոց Քառասնից Մանկանց Մայր եկեղեցւոյ մէջ, Սուրբ եւ Անմահ պատարագ մատուցեց եւ քարոզեց թեմիս առաջնորդ Մասիս եպս. Զօպուեան: Ներկայ էին ազգային, երեսփոխանական, կրօնական եւ վարչութեան ժողովի ներկայացուցիչներ, Հալէպի մօտ Հայաստանի գլխաւոր հիւպատոսը, ինչպէս նաեւ հաւատացեալներու հոծ բազմութիւն:

Եկեղեցւոյ դպրաց դասին եւ «Շողակաթ» երգչախումբին կատարողութեամբ ներդաշնակ երգեցողութիւնը ունէր մեղեդիաբարբառ առոգանութիւն: Քրիստոսասէր ներկայութիւնը երկիւղած հետեւողութեամբ մասնակից կը դառնար հոգեպարար արարողութեան: Ուրախալի շարժառիթը անգամ մը եւս կը հաստատէր ժողովուրդին անքակտելի կապուածութիւնը հայ եկեղեցւոյ նկատմամբ: Վերօծուած Ս. Քառասնից Մանկանց եկեղեցին միւռոնելի առաքելութեամբ, յաղթական երթի հոգեխօս պատկերը կը պարզէր ամէնուն աչքերուն առջեւ:

Առաջնորդ սրբազան հայրը իր քարոզին որպէս բնաբան ընտրեց Սաղմոս 121ի աղօթաբոյր խօսքերը. «Աչքերս դէպի լեռները պիտի վերցնեմ, ուրկէ իմ օգնութիւնս պիտի գայ: Իմ օգնութիւնս Տիրոջմէն է, որ երկինքը ու երկիրը ստեղծեց» (Սղ 121.1-2):

Մասիս եպս. Զօպուեան նախ անդրադարձաւ մարտահրաւէրներով շրջապատուող, նեղութեանց մատնուող եւ բազմաբնոյթ դժուարութեանց մէջ գտնուող հաւատքի մարդուն՝ սաղմոսասացին յուսադրիչ արտայայտութեան մասին: Դիտել տալով, որ Աստուծոյ ապաւինողը՝ լաւատեսութեամբ բարի դիտաւորութեամբ եւ դրական տրամադրութեամբ կը շարժի, այլ խօսքով՝ բարին կ՛ակնկալէ եւ յոյսով Աստուծոյ խոստումներուն կատարումը կը սպասէ: Սրբազան հայրը ըսաւ. «Գոհութիւն կը յայտնենք Աստուծոյ, որուն ներգործող զօրութեան շնորհիւ հալէպահայը տակաւին կը գոյատեւէ, անդրդուելի կամքով եւ հաստատուն հաւատքով կառչած կը մնայ սուրիական հայրենիքին: Բերիոյ Հայոց թեմը պատմական նշանակութիւն ունի: Թեմը իր բոլոր կառոյցներով գոյապայքար կը մղէ եւ կը շարունակէ ապրիլ, հակառակ պատերազմին վատ հետեւանքներուն: Լիայոյս ենք, որ ծառայութեան ոգիով եւ սիրոյ սկզբունքով միասնաբար պիտի կերտենք նոր հանգրուան մը, բարօրութեամբ եւ պայծառութեամբ յատկանշուած: Այս ծանր աշխատանքը իր բարի նպատակին կը ծառայէ համագործակցութեամբ: Ուստի, մեզմէ իւրաքանչիւրը կանչուած է իր բաժինը բերելու, որպէսզի վերականգնումի բոլոր ծրագիրները դառնան իրագործելի»: Սրբազան հայրը խրախուսիչ պատգամին ընդմէջէն հոգեւոր, բարոյական եւ ազգային արժէքներուն պահապանն ու տարածիչը ըլլալ թելադրեց:

Պատարագի աւարտին տեղի ունեցաւ հոգեհանգստեան պաշտօն: Ապա թափօրը «Տէր Կեցո Դու Զհայս» մաղթերգի երգեցողութեամբ ուղղուեցաւ եկեղեցւոյ շրջափակը, որմէ ետք հնչեց Կիլիկիոյ կաթողիկոսութեան նուիրուած յատուկ օրհներգը:

Առաջնորդ սրբազան հօր «Պահպանիչ» աղօթքով հաւատացեալները խաղաղութեամբ արձակուեցան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top