Մոսկուա Իրան-Ամերիկա Լարուածութիւնը Երկխօսութեամբ Լուծելու Կոչ Կ՛ընէ

0627israel-summit-jumbo
0627israel-summit-jumbo

Պոլթըն, Նեթանիահու եւ Փաթրուշեւ

ՄՈՍԿՈՒԱ, ԵՐՈՒՍԱՂԷՄ, «Ռոյթըրզ».- Ռուսիոյ արտաքին գործոց նախարար Սերկէյ Լաւրով 26 Յունիսին կոչ ըրաւ Միացեալ Նահանգներու եւ Իրանի իշխանութիւններուն, որ քաղաքակիրթ երկխօսութեան միջոցով լուծեն իրենց միջեւ տարակարծութիւնները, դադրեցնելով «սպառնալիքներու, վերջնագիրներու եւ պատժամիջոցներու քաղաքականութիւնը»:

Լաւրով այս յայտարարութիւնը կատարեց Մոսկուա այցելող Արաբական Միացեալ Էմիրութիւններու իր պաշտօնակիցին հետ հանդիպումէն ետք տեղի ունեցած միացեալ մամլոյ ասուլիսին ընթացքին՝ ազդարարելով, որ Իրան-Ամերիկա ճակատումը կործանարար պիտի ըլլայ յատկապէս Միջին Արեւելքի եւ Հիւսիսային Ափրիկէի համար, միջազգային ճգնաժամ յառաջացնելով։

Մէկ օր առաջ, Երուսաղէմի մէջ տեղի ունեցաւ Ռուսիոյ Ապահովութեան խորհուրդի քարտուղար Նիքոլայ Փաթրուշեւի, Միացեալ Նահանգներու նախագահի ազգային ապահովութեան հարցերու խորհրդական Ճան Պոլթընի եւ Իսրայէլի Ազգային ապահովութեան խորհուրդի ղեկավար Մէյիր պեն Շապաթի եռակողմանի հանդիպումը:

Քննարկումներուն գլխաւոր նիւթը Սուրիոյ իրավիճակն էր: Փաթրուշեւ յայտարարեց Սուրիոյ գերիշխանութեան եւ տարածքային ամբողջականութեան պահպանման անհրաժեշտութեան մասին: Ան նաեւ խօսեցաւ Սուրիոյ կացութեան լուծման հարցերու մեծ մասին շուրջ գոյութիւն ունեցող համաձայնութեան մասին:

«Բոլորովին համաձայն եմ (Իսրայէլի) վարչապետ Նեթանիահուի այն դիրքորոշումին, թէ մեր աշխատանքին շնորհիւ Սուրիա ի՛նչ վիճակի մէջ պէտք է ըլլայ. ինչպէս ան ըսաւ՝ խաղաղ եւ ապահով, իսկ ես կ՛ուզեմ աւելցնել, որ ապահովուին Սուրիոյ գերիշխանութիւնը, անկախութիւնը եւ տարածքային ամբողջականութիւնը», նշեց Փաթրուշեւ:

Պոլթըն բանակցութիւնները նկատեց արդիւնաւէտ: «Մենք հաւաքուած էինք, որ քննարկենք հարցերը, որոնք Միջին Արեւելքի մէջ կը մտահոգեն մեզ: Ես կը կարծեմ, թէ այդ քննարկումները արդիւնաւէտ էին», ըսաւ ան:

«Իրան ունի իր թեւերը, որոնք շրջանին մէջ բռնութիւն կը կիրարկեն եւ կը սպառնան: Անիկա կ՛աջակցի «Հըզպալլա»ին, Սուրիոյ նախագահ Պաշշար Ասատին եւ կը զինէ Իրաքի մէջ շիի զինեալները», յայտնեց Պոլթըն՝ աւելցնելով. «Պէտք է ունենանք ռազմավարութիւն մը Իրանի եւ անոր զինեալներուն Սուրիա վերադարձը արգիլելու։ Սուրիոյ տագնապի խաղաղ լուծումը ամէնէն լաւն է, եւ ռուսերը բազմիցս արտայայտեցին, թէ կը փափաքին, որ իրանցիները հեռանան Սուրիայէն: Կը գիտակցինք նաեւ շրջանին մէջ խաղաղութեան հաստատման մէջ Իսրայէլի առանցքային դերակատարութեան»:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top