Ուաշինկթըն, Փարիզ Եւ Գահիրէ Մտահոգութիւն Կը Յայտնեն Կիպրոսի Մօտ Թրքական Պեղումի Աշխատանքներու Հարցին Նկատմամբ

 

ՈՒԱՇԻՆԿԹԸՆ, «Էյ.Փի.».- Միացեալ Նահանգներու արտաքին գործոց նախարարութիւնը յայտարարեց, թէ Ուաշինկթըն խորապէս մտահոգ է Թուրքիոյ կողմէ Կիպրոսի ջուրերուն մէջ շարունակուող բնական կազի պեղման գործողութիւններով։

Նախարարութիւնը իր հրապարակած հաղորդագրութեան մէջ շեշտեց, որ այս աշխատանքները ընդարձակելու նպատակով, յաւելեալ նաւ մը ուղարկելու «սադրիչ քայլը շրջանին մէջ լարուածութիւններ կը հրահրէ»՝ աւելցնելով. «Թրքական իշխանութիւններուն կոչ կ՛ուղղենք՝ դադրեցնելու այդ գործողութիւնները եւ բոլոր կողմերը կը քաջալերենք ինքնազսպում ցուցաբերելու ու խուսափելու արարքներէ, որոնք շրջանին մէջ լարուածութիւնը կը բարձրացնեն»:

Ֆրանսա եւ Եգիպտոս եւս հրապարակեցին յայտարարութիւններ՝ ազդարարութիւն ուղղելով Թուրքիոյ։ Մասնաւորաբար Եգիպտոս գրաւոր կերպով ներկայացուց իր ազդարարութիւնը՝ նշելով. «Թուրքիա կը շարունակէ ընդունիլ միակողմանի որոշումներ, որոնք կրնան աւելիով սրել Միջերկրական ծովու արեւելեան շրջաններուն լարուածութիւնը։ Գահիրէ մտահոգ է Թուրքիոյ քայլերով»։

Եգիպտոս նաեւ կոչ ուղղեց Անգարայի, որ հեռու մնայ այնպիսի քայլերէ, որոնք աւելիով պիտի սրեն իրավիճակը ու պնդեց, որ Թուրքիա պարտաւոր է յարգել միջազգային իրաւունքի չափանիշները։

Իր կարգին, Ֆրանսայի արտաքին գործոց նախարարութիւնը այս հարցին մէջ զօրակցութիւն յայտնեց Կիպրոսի իշխանութեանց՝ շեշտելով, որ Անգարա պէտք է յարգէ Կիպրոսի ինքնիշխանութեան իրաւունքը։

«Կոչ կ՛ընենք, որ Թուրքիա հեռու մնայ այնպիսի քայլերէ, որոնք կ՛ապակայունացնեն իրավիճակը», կ՛ըսուի ֆրանսական կողմի յայտարարութեան մէջ։

Այժմ Կիպրոսի տնտեսական գօտիին մէջ, ուր յայտնաբերուած են կազի հանքավայրեր, կը գտնուին թրքական երկու նաւեր: Վերջինները այդ շրջանը հասած են Երեքշաբթի օր, ինչ որ Յունաստան եւ Կիպրոս կը նկատեն սադրանք:

Նշենք, որ Ռուսիա, Հայաստան եւ Եւրոպական Միութիւնը եւս մտահոգութիւն յայտնած էին Թուրքիոյ արարքներուն նկատմամբ, եւ Ռուսիա թրքական նոր քայլերը նկատած էր «ապօրինի, անընդունելի եւ մագլցողական»:

Հակառակ այս բոլորին, Թուրքիոյ արտաքին գործոց նախարարութիւնը յայտարարեց. «Թուրքիա պիտի շարունակէ պաշտպանել կղզիի մերձակայքին մէջ թուրք կիպրացիներուն շահերը, այնքան ատեն, որ յունական կողմը թուրքերը մասնակից չի դարձներ արեւելեան Միջերկրականի մէջ հարստութիւններու եկամուտներու արդար բաժանումին»:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top