Ահաբեկչական Պայթում Մը Ցնցեց Գամիշլիի Հայահոծ Թաղամսը

0000KAMISHLI

0000KAMISHLI

 

ՀԱԼԷՊ.- Հինգշաբթի, 11 Յուլիսի երեկոյեան ժամը 6ին, ականուած ինքնաշարժի մը ահաւոր պայթումը ցնցեց Գամիշլիի բնակչութիւնը:

Կը փոխանցուի, թէ ա-կանուած ինքնաշարժ մը կանգ առած է ասորի ուղղափառ համայնքի Ս. Աստուածածին եկեղեցւոյ դիմաց եւ վայրկեաններ անց ինքնաշարժը պայթեցած է:

Արձանագրուեցան 11 վիրաւորներ եւ նիւթական վնասներ:

Նշենք, որ նոյն թաղամասին մէջ կը գտնուին հայկական Ս. Յակոբ եկեղեցին, Ազգային առաջնորդարանը, Ազգային Միացեալ միջնակարգ վարժարանը եւ Գարակէօզեան հաստատութիւնը, որոնք նիւթական թեթեւ վնասներ կրեցին:

«Տուժածներուն մէջ հայեր չկան: Համայնքը հիմա զգուշութիւն կը ցուցաբերէ, յատկապէս Գամիշլիի պարագային, որ թրքական սահմանին մօտ է։ Նահանգին շուրջը կան զինեալ խմբաւորումներ: Շարք մը հայկական կառույցներ վնասուած են: Այսպիսի պայթում Գամշլիի խաղաղ, բնակելի թաղամասին մէջ, որ զինուորական ներկայութիւն չկայ, առաջին անգամն է որ կը պատահի, եւ բնակչութիւնը ցնցուած է: Այսօր ապահովութեան նկատառումներով՝ ազգային կեդրոնները փակ էին: Կիրակի օր նախատեսուած Գամշլիի Ազգային վարժարանի ամառնային դպրոցի հանդէսը նոյնպէս յետաձգուած է մէկ շաբաթով: Պայթումը պատահեցաւ այն ատեն, երբ ելեկտրականութիւնը անջատուած էր, հետեւաբար թաղամասի կառոյցներուն տեսախցիկները չեն նկարած ահաբեկչակական գործողութիւնը», պատմեց «Գանձասար» շաբաթաթերթի գլխաւոր խմբագիր Զարմիկ Չիլափոշեան-Պողիկեան։

Բերիոյ Հայոց թեմի առաջնորդ Մասիս եպս. Զօպուեան մօտէն կը հետեւի Գամիշլիի հայ համայնքին եւ ընդհանրապէս տեղւոյն բնակչութեան կացութեան եւ անոնց դիմագրաւած դժուարութիւններուն:

Արդարեւ, սրբազան հայրը ու թեմի Ազգային վարչութիւնը կապ հաստատեցին Պսակ քհնյ. Պէրպէրեանի հետ, իրազեկ դառնալու տիրող իրավիճակին: Քահանան սրբազան հօր պարզեց իրավիճակը՝ յայտնելով, որ տեղւոյն ազգային կառոյցները նիւթական թեթեւ վնասներ կրած են, սակայն զոհեր չեն արձանագրուած:

Սրբազան հայրը, իր զօրակցութիւնը յայտնելով տեղւոյն քաղաքացիներուն՝ խաղաղութիւն մաղթեց շրջանին, թելադրելով զգուշութիւն ցուցաբերել:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top